পশ্চিমবংগ বিধানসভাৰ ১০ গৰাকী বিদ্ৰোহী তৃণমূল কংগ্ৰেছ বিধায়কৰ সদস্যপদ খাৰিজৰ আৱেদন সন্দৰ্ভত বিধানসভাৰ অধ্যক্ষই তিনি মাহৰ ভিতৰত সিদ্ধান্ত গ্ৰহণ কৰিব বুলি সোমবাৰে উচ্চতম ন্যায়ালয়ে দৃঢ় বিশ্বাস ব্যক্ত কৰে। ৰিতব্ৰত বেনাৰ্জীকে ধৰি এই বিদ্ৰোহী বিধায়কসকলৰ বিৰুদ্ধে মমতা বেনাৰ্জী নেতৃত্বাধীন তৃণমূল ফৈদৰ বিধায়ক শোভনদেৱ চট্টোপাধ্যায়ে দাখিল কৰা আৱেদনৰ শুনানি গ্ৰহণ কৰি উচ্চতম ন্যায়ালয়ে এই গুৰুত্বপূৰ্ণ পৰ্যবেক্ষণ আগবঢ়ায়।
ভাৰতৰ মুখ্য ন্যায়াধীশ সূৰ্য কান্ত, ন্যায়াধীশ জয়মাল্য বাগচী আৰু ন্যায়াধীশ ভি মোহনৰ বিচাৰপীঠে ২০২০ চনৰ জানুৱাৰী মাহত মণিপুৰৰ এক গোচৰ সন্দৰ্ভত দিয়া ৰায়দানৰ প্ৰসংগ উত্থাপন কৰে। সেই ৰায়দান অনুসৰি বিধানসভাৰ অধ্যক্ষৰ ওচৰত দাখিল কৰা সদস্যপদ খাৰিজৰ আৱেদনসমূহ যুক্তিসংগত সময় অৰ্থাৎ তিনি মাহৰ ভিতৰত নিষ্পত্তি কৰাটো প্ৰয়োজনীয়। এই গোচৰটোৰ ক্ষেত্ৰত উক্ত তিনি মাহৰ সময়সীমা অহা ৮ অক্টোবৰত অন্ত পৰিব বুলি ন্যায়ালয়ে উল্লেখ কৰে। বিচাৰপীঠখনে আৱেদনখন নিষ্পত্তি কৰি কয় যে বিধানসভাৰ অধ্যক্ষই ন্যায়ালয়ৰ পূৰ্বৰ সিদ্ধান্তৰ বিষয়ে সম্পূৰ্ণৰূপে অৱগত আৰু তেওঁ নিৰ্ধাৰিত সময়সীমাৰ ভিতৰত এক উচিত সিদ্ধান্ত ল’বলৈ প্ৰয়াস কৰিব বুলি ন্যায়ালয়ৰ দৃঢ় বিশ্বাস আছে।
শুনানিৰ সময়ত আৱেদনকাৰী চট্টোপাধ্যায়ৰ হৈ জ্যেষ্ঠ অধিবক্তা কপিল চিব্বালে অংশগ্ৰহণ কৰি এনে আৱেদনসমূহৰ সিদ্ধান্ত গ্ৰহণত হোৱা বিলম্বৰ প্ৰৱণতাৰ কথা আঙুলিয়াই দিয়ে। ইয়াৰ প্ৰতিক্ৰিয়াত বিচাৰপীঠখনে কিছু ব্যংগাত্মক সুৰত কয় যে এনে নিৰ্দেশনা দিয়াৰ পূৰ্বে ন্যায়পালিকাই দাপোণৰ সন্মুখত থিয় হৈ নিজলৈ এবাৰ চোৱা উচিত। ন্যায়াধীশসকলে স্বীকাৰ কৰে যে এনে বহুতো আইন আছে য’ত ন্যায়পালিকাই এটা নিৰ্দিষ্ট সময়সীমাৰ ভিতৰত প্ৰক্ৰিয়া সম্পূৰ্ণ কৰিব লাগে, কিন্তু বাস্তৱত খোদ ন্যায়পালিকায়ো সেই নিয়ম উলংঘা কৰা দেখা যায়।
উল্লেখযোগ্য যে, যোৱা মে’ মাহত অনুষ্ঠিত বিধানসভা নিৰ্বাচনত তৃণমূল কংগ্ৰেছৰ পৰাজয়ৰ পাছতেই দল বিৰোধী কাৰ্যকলাপত লিপ্ত হোৱাৰ অভিযোগ তুলি বিধায়ক শোভনদেৱ চট্টোপাধ্যায়ে অধ্যক্ষ ৰথীন বসুৰ ওচৰত এই ১০ গৰাকী বিধায়কৰ সদস্যপদ খাৰিজৰ দাবী জনাইছিল। বৰ্তমান এই ৰাজনৈতিক বিবাদ নিৰ্বাচন আয়োগৰ মজিয়াও পাইছেগৈ। দুয়োটা ফৈদেই এতিয়া তৃণমূল কংগ্ৰেছৰ নাম আৰু দলীয় প্ৰতীক ‘ঘাঁহৰ ওপৰত যোৰা ফুল’ৰ ওপৰত নিজৰ অধিকাৰ দাবী কৰি নিৰ্বাচন আয়োগৰ কাষ চাপিছে।
