ছহিদৰ আত্মবলিদান অসমৰ ৰাইজে কেতিয়াও নাপাহৰে, সদৌ অসম ছাত্ৰ সন্থাই কেতিয়াও নাপাহৰে। সেই সকল ছহিদৰ আত্মবলিদান কেতিয়াও অথলে যাবলৈ দিয়া নহয়। সদৌ বাক্সা জিলা ছাত্র সন্থাৰ অধীনৰ পশ্চিম তামুলপুৰ শাখা ছাত্র সন্থাৰ ৰূপালী জয়ন্তী বৰ্ষৰ প্ৰথম দিনটোত সন্থাৰ কাৰ্যালয়ত নৱ নিৰ্মিত ছহিদ বেদী মুকলি কৰি আৰু ছহিদক শ্ৰদ্ধাঞ্জলি জনাই সদৌ অসম ছাত্ৰ সন্থাৰ শিক্ষা সম্পাদক ভৱজিত বেজবৰুৱাই এইদৰে কয়।
ছহিদ তৰ্পন অনুষ্ঠানত অংশ গ্ৰহণ কৰা ছাত্ৰ কৰ্মী আৰু ৰাইজক উদ্দেশ্যি তেওঁ পুনৰ কয় – বিভিন্ন সময়ত ৰজাঘৰে আমাৰ ওপৰত জাপি দিবলৈ খোজা জাতিদ্ৰোহী সিদ্ধান্তৰ বিৰুদ্ধে অসমৰ ৰাইজে, সদৌ অসম ছাত্ৰ সন্থাই সংগ্ৰাম কৰিছিল আৰু সংগ্ৰাম কৰি আহিছে। অনাগত দিনবোৰতো এই সংগ্ৰাম সমূহক আগুৱাই নিয়াৰ ক্ষেত্ৰত সদৌ অসম ছাত্ৰ সন্থা বদ্ধপৰিকৰ।
ছহিদ সকলক সোঁৱৰণ কৰি তেওঁ কয়- ছহিদৰ আত্ম বলিদানৰ কথা আমি কেতিয়াও পাহৰি নাযাওঁ। যেতিয়ালৈকে অসমৰ খিলঞ্জীয়া মানুহৰ সমস্যা সমূহ সমাধান নহয়, সদৌ অসম ছাত্ৰ সন্থাই অবিৰত ভাৱে সংগ্ৰাম কৰি যাব। ৰাজনৈতিক নেতা সকলে সমাজখনক থানবান কৰাৰ বাবে যি বিভেদকামী পৰিস্থিতিৰ সৃষ্টি কৰে, সেই সময়ত অসমৰ সকলো খিলঞ্জীয়া লোক একত্ৰিত হৈ সংগ্ৰামখন আগুৱাই নিব লাগিব বুলিও শিক্ষা সম্পাদক গৰাকীয়ে মন্তব্য কৰে।
উল্লেখ্য যে আজিৰে পৰা দুদিনীয়া বৰ্ণাঢ্য কাৰ্যসূচীৰে বাক্সা জিলা ছাত্ৰ সন্থাৰ অন্তৰ্গত পশ্চিম তামুলপুৰ শাখা ছাত্ৰ সন্থাৰ ২৫ বছৰীয়া গৌৰৱময় যাত্ৰাৰ সাক্ষী ৰূপালী জয়ন্তী বৰ্ষ উলহ মালহেৰে উদযাপন কৰা হৈছে ।
এই উপলক্ষে গীতে-মাতে, কৃষ্টি-সংস্কৃতিৰে উজলি উঠিল পশ্চিম তামুলপুৰ শাখা ছাত্র সন্থাৰ ৰূপালী বৰ্ষ উদযাপনথলী।
পুৱা ২৫ খনকৈ পতাকা উত্তোলনেৰে পশ্চিম তামুলপুৰ শাখা ছাত্ৰ সন্থাই আজি এক গৌৰৱোজ্জ্বল ঐতিহাসিক দিনত খোজ পেলালে।
বাক্সা জিলা ছাত্ৰ সন্থাৰ প্ৰাক্তন সভাপতি সোণেশ্বৰ কলিতাই আঁতধৰা প্ৰতিটো অনুষ্ঠান বৰ্ণিল ৰূপত উদ্ভাসিত হৈ পৰে ।
ছাত্র ছাত্ৰীৰ বৌদ্ধিক আৰু মানসিক উৎকৰ্ষ সাধনৰ বাবে ছাত্র-ছাত্ৰী সকলৰ মাজত অনুষ্ঠিত কৰা হয় চিত্ৰাংকণ আৰু কুইজ প্ৰতিযোগিতা।
কা আন্দোলন আৰু ক’ৰ’ণা মহামাৰীৰ বাবে নিৰ্ধাৰিত সময়তকৈ প্ৰায় এবছৰ পলমকৈ অনুস্থিত হোৱা এই ৰপালী জয়ন্তী বৰ্ষৰ কাইলৈৰ মুকলি সভাৰ কাৰ্যসূচীত উপস্থিত থাকিব ড’ সমুজ্জ্বল কুমাৰ ভট্টাচাৰ্যকে ধৰি ভালেকেইগৰাকী বিশিষ্ট ব্যক্তি ।
