এটা বছৰ সম্পূৰ্ণ হোৱাৰ দিশে ৰুছ-ইউক্ৰেইন যুদ্ধ। অহা ২৪ ফেব্ৰুৱাৰীত ৰাছিয়াৰ ‘ইউক্ৰেইন অভিযান’ সম্পূৰ্ণ হ’ব। চলিত এই যুদ্ধৰ মাজতে সোমবাৰে আচম্বিতে যুদ্ধৰত দেশ ইউক্ৰেইন ভ্ৰমণেৰে আন্ত:ৰাষ্ট্ৰীয় ৰাজনীতিৰ চমক লগাইছিল আমেৰিকা যুক্তৰাষ্ট্ৰৰ ৰাষ্ট্ৰপতি জ’ বাইডেনে।
পিছে বাইডেনৰ এই ইউক্ৰেইন ভ্ৰমণে যেন যুদ্ধৰ বিভীষিকাক অধিক ঘণীভূত কৰি তুলিলে! তাৰেই ইঙ্গিত বহন কৰিলে আজি ৰুছ ৰাষ্ট্ৰপতি ভ্লাদিমিৰ পুটিনৰ ভাষণে। আজি সংসদত দিয়া ভাষণত পুটিনে ইউক্ৰেইনত মস্কোৰ আক্ৰমণক প্ৰণালীবদ্ধভাৱে আগবঢ়াই নিয়াৰ প্ৰতিশ্ৰুতি দিয়ে।
ইউক্ৰেইন আক্ৰমণৰ বৰ্ষপূৰ্তিৰ ঠিক আগে আগে আজি নিজ ভাষণত পুটিনে কয়, “আমি আমাৰ সন্মুখত থকা লক্ষ্যসমূহ সযতনে আৰু পদ্ধতিগতভাৱে সমাধান কৰিম।” তেওঁ লগতে ইউক্ৰেইনত হোৱা ভয়াৱহতাৰ বাবে পশ্চিমীয়া দেশসমূহক দোষাৰোপ কৰে।
পুটিনৰ মতে, ইউক্ৰেইনৰ সংঘাতক ইন্ধন যোগোৱাৰ বাবে তথা ইয়াৰ তীব্ৰতা বৃদ্ধিৰ বাবে আৰু যুদ্ধত নিহত লোকৰ সংখ্যা বৃদ্ধিৰ বাবে পশ্চিমীয়া দেশসমূহ সম্পূৰ্ণৰূপে দায়ী। তেওঁ লগতে পশ্চিমীয়া দেশসমূহে স্থানীয় সংঘাতক বিশ্ব সংঘাতলৈ ৰূপান্তৰিত কৰাৰ চেষ্টা কৰিছে বুলিও অভিযোগ কৰে।
এই পৰিস্থিতিৰ প্ৰতি ৰাছিয়াই উপযুক্তভাৱে সঁহাৰি জনাব বুলিও হুংকাৰ দিয়ে পুটিনে। ইফালে ৰুছ ৰাষ্ট্ৰপ্ৰধান গৰাকীয়ে লগতে ৰাছিয়াই আমেৰিকাৰ সৈতে হোৱা পাৰমাণৱিক চুক্তিৰ অংশদাৰিত্ব স্থগিত ৰাখিছে বুলিও ঘোষণা কৰে।
২০১০ চনত প্ৰাগত স্বাক্ষৰিত হোৱা এই নিউ ষ্টাৰ্ট চুক্তিখন ২০১১ বলবৎ হৈছিল। আমেৰিকাৰ ৰাষ্ট্ৰপতি হিচাপে জ’ বাইডেনে কাৰ্যভাৰ গ্ৰহণ কৰাৰ ঠিক পিছতেই ২০২১ চনত পুনৰ পাঁচ বছৰৰ বাবে বৃদ্ধি কৰা হৈছিল এই চুক্তি।
জ’ বাইডেনৰ গোপন কিয়ভ ভ্ৰমণৰ এদিন পিছতে পুটিনৰ এই সিদ্ধান্ত স্বাভাৱিকতেই লক্ষণীয় হৈ পৰিছে। পুটিনৰ আজিৰ ভাষণে চলি থকা ৰুছ-ইউক্ৰেইন যুদ্ধ দীৰ্ঘকালীন হোৱাৰ এক ইংগিত বহন কৰিছে।
