ৰাজ্যৰ নিৱনুৱা সমস্যাই ভয়াবহ ৰূপ ধাৰণ কৰা সময়তো বিজেপি চৰকাৰ চিন্তিত নহয় ৷ নিনুৱা সংস্থাপনৰ ক্ষেত্ৰত মুখ্যমন্ত্ৰী ড০ হিমন্ত বিশ্ব শৰ্মা নেতৃত্বাধীন মিত্ৰজোঁট চৰকাৰে কথাৰ ফুলজাৰী মৰা বাদে একো কৰিব পৰা নাই ৷ নিৱনুৱা সমস্যা সমাধানৰ বাবে এই চৰকাৰৰ কোনোধৰণৰ হস্ৰম্যাদী বা দীৰ্ঘম্যাদী পৰিকল্পনা নাই ৷ — এই অভিযোগ আম আদমি পাৰ্টী (আপ), অসমৰ ৷
এক প্ৰেছ বিবৃতিত আপ, অসমৰ ৰাজ্যিক সাধাৰণ সম্পাদক (সংগঠন) ৰাজীব শইকীয়াই কয় যে, এই চৰকাৰে প্ৰথম ৫ বছৰীয়া শাসন কালতে কৈছিল , বহিৰাজ্যত গৈ যিমান যুৱক যুৱতীয়ে পেটৰ তাড়নাত কাম কৰি আছিগৈ সেই সকলক ৰাজ্যখনলৈ ঘুৰাই আনি সংস্থাপন দিয়া হ’ব ৷ কিন্তু বিজেপি চৰকাৰৰ সেই ঘোষণা কেৱল ঘোষণাতে ৰ’ল ৷ সদ্য অনুস্থিত এ ডি আৰ ই পৰীক্ষাত প্ৰায় ৮ হাজাৰ চাকৰিৰ বাবে প্ৰায় চাৰি লাখ প্ৰাৰ্থীয়ে আবেদন কৰা বিষয়টোয়ে ৰাজ্যখনৰ ভয়াৱহ নিবনুৱা সমস্যা উদঙাই দিছে বুলি তেখেতে উদ্বেগ প্ৰকাশ কৰে ৷
হিমন্ত বিশ্ব শৰ্মা নেতৃত্বাধীন বিজেপি মিত্ৰজোঁট চৰকাৰক চোকা সমালোচনা কৰি আপৰ নেতা ৰাজীব শইকীয়াই কয় যে নিৱনুৱা সমস্যা সমাধানত বিজেপি চৰকাৰ ব্যৰ্থ হৈছে ৷ মুখ্যমন্ত্ৰীৰ প্ৰতি আপৰ প্ৰশ্ন — নিৱনুৱা সমস্যা সমাধানৰ বাবে বিজেপি চৰকাৰৰ পৰিকল্পনা কি ? যোৱা ন টা বছৰত অসমত বিজেপি মিত্ৰজোঁটৰ চৰকাৰে কিমানজন নিৱনুৱাক সংস্থাপন দিলে ? এই সম্পৰ্কত মুখ্যমন্ত্ৰীক শ্বেতপত্ৰ প্ৰকাশৰ দাবী জনাইছে আপ, অসমৰ ৰাজ্যিক সাধাৰণ সম্পাদক (সংগঠন) ৰাজীব শইকীয়াই ।
