বলিউডৰ বিখ্যাত অভিনেতা শ্বাহিদ কাপুৰে আজিৰ পৰা ৮ বছৰ পূৰ্বে দিল্লীৰ যুৱতী মীৰা ৰাজপুতৰ সৈতে বিবাহপাশত আবদ্ধ হৈছিল। বৰ্তমান কন্যা মিছা আৰু পুত্ৰ জেনেৰে এটা সুখী পৰিয়াল আছে শ্বাহিদ কাপুৰৰ।
শ্বাহিদ-মীৰাৰ মধুৰ সম্পৰ্কৰ আভাস ছচিয়েল মিডিয়াত দেখা যায়। বহুতে প্ৰশ্ন কৰে যে শ্বাহিদ-মীৰাৰ সফল বিবাহিত জীৱনৰ ৰহস্য কি?
শেহতীয়াকৈ শ্বাহিদে এক সাক্ষাৎকাৰত নিজৰ বিবাহিত জীৱনৰ বিষয়ে মুকলিকৈ কয়। শ্বাহিদে কয়, ”বিবাহৰ পিছত নাৰী এগৰাকীয়ে পুৰুষৰ জীৱনলৈ আহি পুৰুষৰ জীৱন সংগঠিত কৰে। প্ৰতিজন যুৱকে নিজৰ জীৱনলৈ এগৰাকী নাৰী অহাৰ পিছতহে এজন ভাল পুৰুষ হ’ব পাৰে। এই প্ৰক্ৰিয়া দীৰ্ঘদিন ধৰি চলি থাকে। জীৱনটো এনেকুৱাই যেন অনুভৱ হয়।”
অৱশ্যে শ্বাহিদৰ এই ভিডিঅ’ সাক্ষাৎকাৰ ভাইৰেল হোৱাৰ পিছত বহুতেই সামালোচনা কৰিছে শ্বাহিদ কাপু্ৰক।
এজন নেটিজেনে লিখিছে, ”বিয়াৰ পিছত পত্নী আনিছিলা, নে দাসী ?” আন এজন ব্যক্তিয়ে লিখিছে, “শ্বাহিদৰ কথা শুনি তেওঁ স্কুলত পঢ়ি থকা যেন লাগে! পুৰুষৰ জীৱনত নাৰীৰ অস্তিত্ব সেইটোৱেই নেকি?”
বিবাহ জীৱনৰ এক ডাঙৰ সিদ্ধান্ত। য’ত নিজৰ ভৱিষ্যতৰ লগতে আন এজনৰ ভৱিষ্যতও জড়িত হৈ থাকে। গতিকে বিয়াৰ সিদ্ধান্ত লোৱাৰ সময়ত এজন সম্ভাৱ্য জীৱন সংগীৰ লাভ-লোকচানৰ বিষয়ে স্পষ্ট ধাৰণা থকাটো অতি প্ৰয়োজনীয়। প্ৰতিদিনে কাৰোবাৰ লগত কেইঘণ্টামান কথা পতা আৰু একেখন চালিৰ তলত একেলগে দিন কটাব পৰাৰ মাজত ডাঙৰ পাৰ্থক্য! খৰখেদাকৈ বিবাহৰ সিদ্ধান্ত লোৱাতকৈ কিছু সময়ৰ পাছত এই সিদ্ধান্ত সযতনে লোৱা উচিত। বিয়াৰ সিদ্ধান্ত লোৱাৰ আগতে কি কথা মনত ৰাখিব লাগে?
১) আপোনাৰ সংগীক কিমান ভাল দেখা যায় তাত গুৰুত্ব নিদিব, তেওঁলোকৰ লগত আপোনাৰ মনৰ ৰসায়নৰ মিল আছে নে সেইটোত অধিক গুৰুত্ব দিব।
২) বিবাহৰ পূৰ্বে সংগীৰ লগত আৰ্থিক দিশৰ বিষয়ে আলোচনা কৰিব। বিবাহিত জীৱনত ইজনে সিজনৰ আৰ্থিক অৱস্থাৰ প্ৰতি সচেতন হোৱাটো অতি প্ৰয়োজনীয়।
৩) দুজন মানুহৰ বাহিৰেও দুটা পৰিয়াল বিবাহৰ লগত জড়িত। দুয়োৰে পৰিয়ালৰ লগত কেনেধৰণৰ সম্পৰ্ক আছে আগতীয়াকৈ জানি লোৱা ভাল।
৪) আপোনাৰ সংগীৰ ওপৰত নিজৰ মতামত জাপি নিদিব। আপোনাৰ ভাল লগা আৰু অপছন্দৰ বিষয়ে আগতীয়াকৈ আপোনাৰ সংগীৰ লগত কথা পাতক। বিয়াৰ পিছত সংগীৰ ওপৰত এটা চৰ্ত জাপি দিয়াৰ ভুল নকৰাটোৱেই ভাল।
৫) কৰ্মজীৱন আৰু ব্যক্তিগত জীৱনৰ মাজত কেনেদৰে ভাৰসাম্য ৰক্ষা কৰিব সেই বিষয়ে আগতীয়াকৈ সংগীৰ লগত আলোচনা কৰা ভাল। বহু সময়ত জীৱিকাৰ দাবীৰ বাবে কৰ্মক্ষেত্ৰত বহু সময় কটাবলগীয়া হয়, পাৰিবাৰিক জীৱনলৈ বেছি সময় দিয়া সম্ভৱ নহয়। যদি আপোনাৰ ক্ষেত্ৰত এনেকুৱা হয়, তেন্তে আগতেই প্ৰকাশ কৰক। লগতে সংগীৰ বিষয়েও জানি লওক।
