টাৰিফ… টাৰিফ… টাৰিফ… এতিয়া সমগ্ৰ বিশ্বতে এই শব্দটোৰ চৰ্চা। কাৰণ আমেৰিকাৰ ৰাষ্ট্ৰপতি ড’নাল্ড ট্ৰাম্প। শুল্কৰ বাবে সমগ্ৰ বিশ্বৰ শ্বেয়াৰ বজাৰত অস্থিৰতাৰ সৃষ্টি হৈছে। ইয়াৰ প্ৰভাৱ ভাৰতীয় বজাৰতো দেখা গৈছে।
শুকুৰবাৰে ট্ৰাম্পে দাবী কৰে যে যদি আদালতে শুল্ক আৰোপ কৰাৰ বিৰুদ্ধে ৰায় দিয়ে তেন্তে আমেৰিকাই পুনৰ মহান হোৱাৰ সুযোগ হেৰুৱাব। আমেৰিকাৰ বজাৰত এক বৃহৎ উত্থান ঘটিছে, শ শ কোটি ডলাৰ উপাৰ্জন হৈছে।
আমেৰিকাৰ আদালতৰ শুল্ক সিদ্ধান্তৰ পূৰ্বে কি ক’লে ড’নাল্ড ট্ৰাম্পে?
ড’নাল্ড ট্ৰাম্পে শুল্ক আদালতৰ এই সিদ্ধান্তৰ বিষয়ে ছ’চিয়েল মিডিয়া প্লেটফৰ্ম ট্ৰুথত পোষ্ট কৰে। তেওঁ লিখিছে যে আমেৰিকাই নিজৰ শুল্ক নীতিৰ বাবে বিপুল অৰ্থনৈতিক সুবিধা লাভ কৰিছে। শ্বেয়াৰ বজাৰে নতুন উচ্চতা লাভ কৰিছে আৰু প্ৰতিদিনে শ শ ডলাৰ উপাৰ্জন হৈছে।
তেওঁ সকীয়াই দিয়ে যে যদি আদালতে তেওঁৰ পক্ষত ৰায় নিদিয়ে তেন্তে আমেৰিকা ‘১৯২৯ চনৰ দৰে মহামন্দা’ত পৰিব। ট্ৰাম্পে কয় যে এই শুল্কই আমেৰিকাৰ অৰ্থনীতিত ইতিবাচক প্ৰভাৱ পেলাইছে। যদিহে উগ্ৰ বাওঁপন্থী আদালতে তেওঁৰ নীতিৰ বিৰুদ্ধে সিদ্ধান্ত লয় তেন্তে আমেৰিকাই কেতিয়াও ইয়াৰ পৰা ওলাই আহিব নোৱাৰিব।
ভাৰতৰ ওপৰত শুল্কৰ প্ৰভাৱ
ভাৰতৰ ওপৰত আমেৰিকাৰ শুল্ক বৃহস্পতিবাৰৰ পৰা কাৰ্যকৰী হয়। ভাৰতে ৰাছিয়াৰ পৰা তেল আমদানি কৰাৰ বাবে ভাৰতৰ ওপৰত অতিৰিক্ত ২৫ শতাংশ শুল্ক আৰোপ কৰা হৈছে। বৰ্তমান ২৫ শতাংশ প্ৰযোজ্য। অতি সোনকালে ৫০ শতাংশ প্ৰযোজ্য হ’ব।
ফেডাৰেচন অৱ ইণ্ডিয়ান এক্সপ’ৰ্ট অৰ্গেনাইজেশ্যনৰ সভাপতি এছ চি ৰালহানে কয় যে ভাৰতে ইতিমধ্যে বহু শুল্ক আৰোপ কৰিছে। এতিয়া অতিৰিক্ত শুল্ক আৰোপ কৰিলে ব্যৱসায়ত ক্ষতি হ’ব। ইতিমধ্যেই মাৰ্জিন অতি কম।
৬০খনতকৈও অধিক দেশৰ ওপৰত শুল্ক
আমেৰিকাই ৬০খনতকৈও অধিক দেশৰ ওপৰত শুল্ক আৰোপ কৰিছে। ইয়াৰ ভিতৰত ইউৰোপীয় ইউনিয়ন, জাপান আৰু দক্ষিণ কোৰিয়াৰ লগতে টাইৱান, ভিয়েটনাম আৰু বাংলাদেশৰ দৰে দেশ আছে। টাইৱান, ভিয়েটনাম আৰু বাংলাদেশত ২০ শতাংশ শুল্ক আৰোপ কৰা হ’ব।
একে সময়তে ইউৰোপীয় ইউনিয়ন, জাপান আৰু কোৰিয়াৰ পৰা আমদানি কৰা সামগ্ৰীৰ ওপৰত এতিয়া ১৫ শতাংশ শুল্ক আৰোপ কৰা হ’ব। সেইদৰে কম্পিউটাৰ চিপৰ ওপৰত ১০০ শতাংশ শুল্ক আৰোপ কৰিছে ট্ৰাম্প প্ৰশাসনে। ৰাষ্ট্ৰপতিগৰাকীয়ে দাবী কৰিছে যে এই শুল্কসমূহে আমেৰিকাত অভূতপূৰ্ব বিকাশৰ সূচনা কৰিব।
