কেন্দ্ৰীয় নাৰী আৰু শিশু উন্নয়ন মন্ত্ৰী মানেকা গান্ধীয়ে অসমৰ অংগনৱাড়ী কেন্দ্ৰত ১৪ লাখ ভুৱা শিশু, মহিলা থকা বুলি সদৰী কৰা তথ্য পোনচাটেই নাকচ কৰি ৰাজ্যৰ সমাজ কল্যাণ মন্ত্ৰী প্ৰমীলা ৰাণী ব্ৰহ্মই এই সংখ্যা ৬ৰ পৰা ৯ লাখহে হ’ব বুলি ঘোষণা কৰাত উত্থাপিত হৈছে এই প্ৰশ্ন।
অসমৰ অংগনৱাড়ী কেন্দ্ৰত ৬ বছৰৰ তলৰ শিশু, গৰ্ভৱতী আৰু গাখীৰ খুৱাই থকা মহিলাক খুওৱা আহাৰৰ ক্ষেত্ৰত ব্যাপক লুন্ঠন হৈ থকা বুলি ৰাজ্যৰ সমাজ কল্যাণ বিভাগৰ প্ৰাক্তন সঞ্চালক এচ এচ মীনাক্ষি সুন্দৰমে কেন্দ্ৰক দাখিল কৰা প্ৰতিবেদনত উল্লেখ থকা ভুৱা হিতাধিকাৰীৰ সংখ্যা ‘অতিৰঞ্জিত’ বুলি দাবী কৰিছে ব্ৰহ্মই।
লগতে পঢ়ক অসমত ওলাইছে ১.৪ মিলিয়ন ভুৱা শিশু, মহিলা: কেন্দ্ৰীয় মন্ত্ৰী মানেকা
‘ভুৱা শিশুৰ সংখ্যাটো বহুত কম, খুব সম্ভৱ ৬ৰ পৰা ৯ লাখৰ ভিতৰত হ’ব। কিছুসংখ্যক প্ৰকৃত হিতাধিকাৰীও বাদ পৰিব পাৰে, কাৰণ গাঁৱৰ বহু মহিলাই ঘৰুৱা বা খেতি-বাতিৰ কামৰ বাবে নিজৰ সন্তানক সদায় অংগনৱাড়ী কেন্দ্ৰলৈ লৈ যাব নোৱাৰে,’ ব্ৰ্হ্মৰ দাবী।
অংগনৱাড়ী কেন্দ্ৰত মূৰ গন্তিৰ যোগেদি হিতাধিকাৰীৰ সমীক্ষা চলোৱাৰ কথা উল্লেখ কৰি এই দাবী কৰিছে মন্ত্ৰী ব্ৰহ্মই।
‘অসমৰ ৬২ হাজাৰ কেন্দ্ৰত প্ৰায় ৪৪ লাখ হিতাধিকাৰী আছে। মূৰ গন্তিৰ সময়ত এই সংখ্যা ৩৫ লাখ পোৱা গৈছিল আৰু সুন্দৰমে পূৰ্বে দিয়া প্ৰতিবেদনত এই সংখ্যাই উল্লেখ আছিল। সেয়ে ভুৱা হিতাধিকাৰী হ’লে ৯ লাখ হ’ব,’ জনায় মন্ত্ৰী ব্ৰহ্মই।
বিষয়াগৰাকী আন বিভাগলৈ বদলি হৈ যোৱাৰ দুদিন পূৰ্বে কেন্দ্ৰক দিয়া এই প্ৰতিবেদন সম্পৰ্কে ৰাজ্যৰ সমাজ কল্যাণ বিভাগ অৱগত নহয় বুলিও দাবী কৰিছে মন্ত্ৰী ব্ৰহ্মই।
ৰাজ্যৰ অংগনৱাড়ী কেন্দ্ৰৰ হিতাধিকাৰীক লৈ কেন্দ্ৰ আৰু ৰাজ্যৰ দুগৰাকী মন্ত্ৰীয়ে কৰা এই বিপৰীত দাবীৰ মীমাংসা কিদৰে হ’ব?