ভাৰতীয় সেনাসকল য’ত থাকে, মোৰ বাবে সেয়াই অযোধ্যা অৰ্থাৎ ৰামৰ জন্মভূমি। এই মন্তব্য প্ৰধানমন্ত্ৰী নৰেন্দ্ৰ মোদীৰ।
দেওবাৰে দীপাৱলীৰ দিনটোত ভাৰতীয় সেনাৰ জোৱানক শ্ৰদ্ধাঞ্জলি জ্ঞাপন কৰে নৰেন্দ্ৰ মোদীয়ে। প্ৰতি বছৰে দীপাৱলীৰ দিনটো তেওঁ ভাৰতীয় সেনাৰ জোৱানৰ সৈতে কটায়।
এইবাৰো তেওঁ এই পৰম্পৰা ৰক্ষা কৰি হিমাচল প্ৰদেশৰ লেপচাস্থিত সেনা ঘাটিত দীপাৱলী উদযাপন কৰিছে। আজিৰ দিনটোত জোৱানসকলৰ সন্মুখত ভাষণ দি তেওঁ কয়, ‘প্ৰতি বছৰে মই আমাৰ সেনা জোৱানসকলৰ সৈতে দীপাৱলী উদযাপন কৰো। অযোধ্যা হৈছে ভগৱান ৰামৰ বাসস্থান। মোৰ বাবে ভাৰতীয় সেনাৰ জোৱান থকা ঠাইসমূহ মন্দিৰতকৈ কম নহয়।”
প্ৰধানমন্ত্ৰী হোৱাৰ পিছত মোদীয়ে ২০১৪ চনৰ দীপাৱলী উদযাপনৰ বাবে চিয়াচেন সেনা ঘাটিত উপস্থিত হয়। তেতিয়াৰ পৰাই তেওঁ প্ৰতি বছৰে সেনা সকলৰ লগত দীপাৱলী পালন কৰি আহিছে।
এই অনুষ্ঠানত উপস্থিত থাকি কয় যে হিমালয়ৰ দৰে সীমান্তত জোৱানসকলে পহৰা দি থকাৰ বাবেই দেশ সুৰক্ষিত। স্বাধীনতাৰ পিছত ভাৰতীয় সেনাই অতি সাহসেৰে ইখনৰ পিছত সিখন যুদ্ধ কৰি কোটি কোটি ভাৰতীয়ৰ হৃদয় জয় কৰিছিল। আন্তঃৰাষ্ট্ৰীয় শান্তি অভিযানত অংশগ্ৰহণ কৰি আন্তঃৰাষ্ট্ৰীয় ক্ষেত্ৰখনতো দেশৰ ভাবমূৰ্তি উজ্জ্বল কৰি তুলিছে ভাৰতৰ সেনাই।
প্ৰধানমন্ত্ৰীয়ে লগতে কয় যে প্ৰতিৰক্ষাৰ ক্ষেত্ৰত আন্তঃৰাষ্ট্ৰীয় শক্তি হিচাপে ভাৰতৰ দ্ৰুতগতিত উত্থান ঘটিছে। কেৱল ভাৰতৰেই নহয়, মিত্ৰশক্তিৰ প্ৰতিৰক্ষাৰ প্ৰয়োজনীয়তাও পূৰণ কৰিছে ভাৰতীয় সেনাই। তেওঁ দাবী কৰে যে ২০১৬ চনৰ দীপাৱলীৰ পিছত ভাৰতৰ প্ৰতিৰক্ষা ৰপ্তানি ৮ গুণ বৃদ্ধি পাইছে।
মোদীয়ে লগতে কয় যে বৰ্তমান দেশত ১ লাখ কোটি টকাৰ প্ৰতিৰক্ষা সঁজুলি নিৰ্মাণ কৰা হৈছে।
