নাগৰিকত্ব বিধেয়কক লৈ মিত্ৰতা ত্যাগ কৰা বিজেপিৰে পুনৰ মিত্ৰতাৰ পাশত আৱদ্ধ হোৱা অসমৰ প্ৰধান আঞ্চলিক ৰাজনৈতিক দল অসম গণ পৰিষদ চমুকৈ অগপই আজি বৰপেটা আৰু ধুবুৰী লোকসভা সমষ্টিৰ প্ৰাৰ্থীৰ নাম ঘোষণা কৰাৰ সম্ভাৱনা আছে।
মিত্ৰতা হোৱাৰ পাছত বিজেপিয়ে দলটোক আসন্ন লোকসভা নিৰ্বাচনত কলিয়াবৰ, বৰপেটা আৰু ধুবুৰী সমষ্টিত প্ৰতিদ্বন্দ্বিতা কৰাৰ বাবে এৰি দিছিল। সেই মৰ্মে কলিয়াবৰত সদ্য পদত্যাগী আছু নেতা মণিমাধৱ মহন্তই প্ৰতিদ্বন্দ্বিতা আগবঢ়াব যদিও বৰপেটা আৰু ধুবুৰীক লৈ দলটোৱে এতিয়াও খাটাং কৰিব পৰা নাই প্ৰাৰ্থী।
সেই উদ্দেশ্যে সোমবাৰে বৰপেটা লোকসভা সমষ্টিৰ অন্তৰ্গত ১০টা বিধানসভা সমষ্টি কমিটিৰ সৈতে অগপৰ কেন্দ্ৰীয় নেতা ক্ৰমে ডাঃ কমলা কলিতা আৰু বিধায়ক ৰমেন্দ্ৰ নাৰায়ণ কলিতাই অগপৰ বৰপেটা জিলা কাৰ্যালয়ত এক গুৰুত্বপূৰ্ণ বৈঠকত মিলিত হয়। বৈঠকত সমষ্টি কমিটি সমূহৰ সৈতে লোকসভা সমষ্টিটোৰ বাবে ৰাজ্যসভাৰ প্ৰাক্তন সাংসদ কুমাৰ দীপক দাস নে প্ৰাক্তন বিধায়ক ভূপেন ৰায় উপযুক্ত প্ৰাৰ্থী হ’ব সেই সম্পৰ্কে আলোচনা কৰে।
বৈঠকৰ অন্তত অগপৰ সাধাৰণ সম্পাদক কমলা কলিতাই জানিবলৈ দি কয় যে বৈঠকত সমষ্টি কমিটি সমূহৰ প্ৰতিজন সভাপতি সম্পাদকৰ মতামত লোৱা হৈছে আৰু এই মতামতৰ ওপৰতে প্ৰতিবেদন প্ৰস্তুত কৰি কেন্দ্ৰীয় সমিতিলৈ প্ৰেৰণ কৰা হ’ব। আৰু কেন্দ্ৰীয় সমিতিয়ে এই প্ৰতিবেদনৰ ওপৰত ভিত্তি কৰিয়েই মঙলবাৰে সমষ্টিটোৰ বাবে প্ৰাৰ্থীৰ নাম ঘোষণা কৰিব।
আনহাতে অগপৰ বাবে অস্তিত্বহীন সমষ্টি ধুবুৰীত জাভেদ ইছলামকেই প্ৰাৰ্থিত্ব আগবঢ়াব বুলি জানিব পৰা গৈছে। উল্লেখ্য যে মানকাচৰৰ প্ৰাক্তন বিধায়ক জাভেদ ইছলামে যোৱা বৰ্ষৰ মাৰ্চ মাহত আঞ্চলিকতাবাদী দল অগপত যোগদান কৰিছিল।
উল্লেখ্য যে তৃতীয় পৰ্যায়ত অনুষ্ঠিত হ’ব লগীয়া নিৰ্বাচনৰ বাবে এই পৰ্যন্ত কংগ্ৰেছ দলেও বৰপেটা আৰু ধুবুৰীত প্ৰাৰ্থীৰ নাম ঘোষণা কৰা নাই। কিন্তু ইয়াৰ বিপৰীতে এ আই য়ু ডি এফে ধুবুৰীৰ পৰা দলটোৰ প্ৰমুখ বদৰুদ্দিন আজমল আৰু বৰপেটা সমষ্টিৰ পৰা প্ৰাৰ্থিত্ব আগবঢ়াইছে ড০ হাফিজ ৰফিকুল ইছলামক।
