প্ৰধানমন্ত্ৰী হিচাপে নৰেন্দ্ৰ মোদীৰ দুটা কাৰ্যকাল প্ৰায় শেষ হোৱাৰ দিশে। এই দীৰ্ঘ সময়ছোৱাত প্ৰধানমন্ত্ৰী মোদীয়ে মাত্ৰ এবাৰলৈ সম্বোধন কৰিলে সংবাদ মেল। প্ৰধানমন্ত্ৰী হিচাপে এই অনাকাংক্ষিত নজিৰৰ বাবে প্ৰায়ে সমালোচিত হয় মোদী।
পিছে এইবাৰ নৰেন্দ্ৰ মোদী নিজেই সংবাদ মাধ্যমৰ মুখামুখি নোহোৱাৰ বাবে নহয়, আমেৰিকান ৰাষ্ট্ৰপতি বাইডেনক সংবাদ মেল সম্বোধনত বাধা দিহে চৰ্চিত হৈ পৰিছে মোদী। মোদীৰ এই কাৰ্য চৰ্চিত হৈ পৰিছে আন্ত:ৰাষ্ট্ৰীয় মহলতো।
উল্লেখ্য যে, G20 সন্মিলনৰ বাবে বৰ্তমান ভাৰতত আছে আমেৰিকান ৰাষ্ট্ৰপতি বাইডেন। পিছে অতিথি বাইডেনক নিমন্ত্ৰণ দি আশাহত কৰিছে মোদীয়ে। মাৰ্কিন প্ৰশাসনে সদৰী কৰা এক তথ্যই দাবী কৰিছে এই কথা।
হোৱাইট হাউছে প্ৰকাশ কৰিছে যে মাৰ্কিন ৰাষ্ট্ৰপতি জো বাইডেনে বাৰম্বাৰ অনুৰোধ কৰা পাছতো ভাৰতৰ প্ৰধানমন্ত্ৰীয়ে সংবাদ মেল সন্বোধন কৰিবলৈ সন্মত হোৱা নাই। যাৰ ফলত ভাৰতৰ বাহিৰত সংবাদ মেল সম্বোধন কৰিব ৰাষ্ট্ৰপতি বাইডেনে।
হোৱাইট হাউছে প্ৰকাশ কৰা মতে জো বাইডেন প্ৰশাসনৰ শীৰ্ষ বিষয়াই ভাৰতত সংবাদ মেল সম্বোধন কৰাৰ বাবে ভাৰতক বাৰম্বাৰ অনুৰোধ কৰাৰ পাছতো কোনো ফল নধৰিল। ভাৰত চৰকাৰে মাৰ্কিন প্ৰশাসনক নিৰাশ কৰি সংবাদ মেলৰ সন্মতি প্ৰদান নকৰিলে।
