অসমৰ সংবাদ মাধ্যমৰ ক্লাছিক সংলাপ “হু ইজ বদৰুদ্দিন”ৰ স্ৰষ্টা তৰুণ গগৈয়ে শনিবাৰে সুধিছে: Who am I?
প্ৰাক্তন মুখ্য মন্ত্ৰীজনৰ এই প্ৰশ্ন অসমৰ শেহতীয়া উপ নিৰ্বাচনত ধৰ্মীয় সংখ্যালঘু ভোটাৰপ্ৰধান জনিয়াৰ আসনখন হেৰুওৱাক লৈ তেওঁক একাংশই দায়ী কৰাৰ প্ৰত্যুত্তৰ।
“জনিয়াত মই ফেক্টৰ হ’লো কেনেকৈ? মই দেখোন যোৱাই নাছিলো। মোক দেখোন মতাই নাছিল। ক্ৰেডিট ল’বলৈ চালে আব্দুল খালেকে। খালেকে মোক গুৰুত্ব দিবলৈ Who am I?” গগৈয়ে কয়।
গগৈয়ে অসমৰ এন আৰ চিক লৈ কৰা “পেলনীয়া কাগজ”— ইত্যাদি মন্তব্যৰ বাবে ধৰ্মীয় সংখ্যালঘুৰ মাজত কংগ্ৰেছে গ্ৰহণযোগ্যতা হেৰুওৱা বুলি এক চৰ্চা চলি আছে।
উপ নিৰ্বাচনটোত প্ৰাক্তন মুখ্য মন্ত্ৰীজনে অসমৰ বাকী সমষ্টিকেইটাত প্ৰচাৰ চলোৱাৰ বিপৰীতে জনিয়ালৈ যোৱা নাছিল।
এতিয়া ওলোটাই তেওঁৰ প্ৰশ্ন, “গগৈক নোহোৱাকে হাৰিল কিয় (জনিয়া)?’’
জনিয়াক এৰিও উপ নিৰ্বাচনটোত কংগ্ৰেছে অসমত এখনো আসন নোপোৱাটো “নেতৃত্বৰ ভুল” বুলি তেওঁ মন্তব্য কৰিছে।
“চাৰিখন আসনত অসমত হৰাৰ বাবে আমি নিজেই দায়ী। লীডাৰৰ ভুল আমি মানি লৈছো,” গগৈয়ে কয়।
বৰ্ষীয়ান ৰাজনীতিকজনে অসমত দলৰ নেতৃত্বত সালসলনি বিচাৰিছে আৰু ধাৰণা কৰিব পাৰি তেওঁ বিজেপিৰ বিৰুদ্ধে আক্ৰমণাত্মক নীতি লোৱাৰ পোষকতা কৰিছে।
“মহাত্মা গান্ধীক বিজেপিয়ে হাইজেক কৰোঁতে আমি বহি আছো কিয়?” কংগ্ৰেছক গগৈৰ প্ৰশ্ন। “নতুন লীডাৰ ল’ব লাগিব আমি। প্ৰয়োজনত আমাৰ নেতৃত্ব সলনি কৰিব লাগিব।”
বিচাৰিলে বিজেপিক ৰুধিবলৈ নিজে প্ৰদেশ কংগ্ৰেছৰ দায়িত্ব ল’বলৈ সাজু বুলিও প্ৰকাশ কৰিছে।
“মই সভাপতি হ’বলৈ ৰে’দি। যদি সকলোৱে ভাবে, মই দায়িত্ব ল’ম। কামো কৰি দেখুৱাই দিম মই। সকলোৰে সহায় হ’লে বিজেপিক ৰুধিব পৰাকৈ মোৰ আত্মবিশ্বাস আছে,” গগৈয়ে কয়।
কংগ্ৰেছত কোনো “ডিক্টেটৰশ্বিপ” নাই বুলি উল্লেখ কৰি গগৈয়ে কয় যে সকলোৰে বিৰোধ আৰু সমৰ্থন কৰাৰ অধিকাৰ আছিল আৰু আছে।
একে সময়তে, দেশৰ শাসক দলে শেহতীয়া নিৰ্বাচনত আন ৰাজ্যসমূহত দেখুওৱা ফলাফলক লৈ গগৈয়ে কয় যে বিজেপিৰ অশ্বমেধ ঘোঁৰা থমকিছে।
“মহাৰাষ্ট্ৰ,হাৰিয়ানাৰ লগতে উপ নিৰ্বাচনক লৈ মোদীয়ে দেখা সপোন বাস্তৱ নহ’ল। ভাৰতৰ মানুহক আৱেগিক কৰি ভোট ল’ব নোৱাৰে, প্ৰমাণ হ’ল,” গগৈৰ মন্তব্য।
তেওঁ কয়, প্ৰধান মন্ত্ৰী মোদীৰ জনপ্ৰিয়তা হ্ৰাস হোৱাৰ মূলতে আছে প্ৰতিশ্ৰুতি পূৰণ কৰিব নোৱাৰাটো।
অভিজ্ঞ ৰাজনীতিকজনে লগতে কয় যে ২০২১ চনৰ অসম বিধান সভা নিৰ্বাচনত বিজেপিৰ ফলাফল বেয়া হ’ব।
অসমৰ লগতে, তেওঁৰ মতে, সৰ্বভাৰতীয় পৰ্য্যায়তো বহু কাৰকে বিজেপিৰ আসন কমাব।
ইফালে, পূৰ্বৰ স্থিতি সলাই গগৈয়ে এতিয়া এ আই ইউ দি এফৰ সৈতে কংগ্ৰেছৰ মিত্ৰতাৰ পোষকতা কৰিছে।
কাকতালীয়ভাৱে, গগৈৰ সংবাদমেলৰ দিনাই এ আই ইউ দি এফ সভাপতিৰূপে পঞ্চমবাৰলৈ পুনৰ নিৰ্বাচিত হৈছে বদৰুদ্দিন আজমল।
“এ আই ইউ দি এফৰ লগত মিত্ৰতাত মই বাধা আৰোপ কৰিছিলো পূৰ্বে। এতিয়া মই মিত্ৰতা বিচাৰো,” গগৈয়ে কয়।
স্থিতি সলনিৰ কাৰণৰূপে গগৈয়ে সমগ্ৰ দেশজুৰি বিজেপিয়ে গ্ৰহণ কৰা মিত্ৰতাৰ নীতিলৈ আঙুলিয়ায়।
“বিজেপিৰ মিত্ৰতাৰ নীতি সফল হৈছে সকলোতে। বিজেপিয়ে পাৰিলে আমি কিয় নোৱাৰিম?” গগৈৰ মন্তব্য।
কংগ্ৰেছত এতিয়াও প্ৰভাৱশালী প্ৰবীণ নেতাজনে লগতে কয় যে ’২১ৰ নিৰ্বাচনত এ আই ইউ দি এফৰ সৈতে কংগ্ৰেছৰ মিত্ৰতা হোৱাৰ ৯০ শতাংশই সম্ভাৱনা আছে আৰু তেওঁ আশাবাদী।
