বিশ্ব স্বাস্থ্য সংস্থা (WHO)ই বিশ্বৰ নেতাসকলক কৰ’না ভাইৰাছৰ সংকটৰ সময়ত ৰাজনীতি কৰাৰ পৰা বিৰত থাকিবলৈ আহ্বান জনাইছে।
সংস্থাটোৱে যুদ্ধৰ বিপৰীতে ঐক্যবদ্ধ হোৱাৰ আহ্বান জনায়। সংস্থাৰ মুৰব্বী টেড্ৰ’ছ অধানাম ঘেব্ৰিয়েছুছে সোমবাৰে কয় যে অতিমাৰীৰ গতি এতিয়াও বৃদ্ধি পাই আছে আৰু প্ৰতিদিনে আক্ৰান্তৰ সংখ্যাই নতুন অভিলেখ সৃষ্টি কৰিছে।
টেড্ৰ’ছে কয় যে প্ৰথম ১০লাখ আক্ৰান্ত হোৱাৰ বাবে ৩মাহ সময় লাগিছিল। কিন্তু শেহতীয়া ১০ লাখ আক্ৰান্ত হ’বলৈ মাত্ৰ ৮দিন সময় লাগিল।
তেওঁ কয় যে এতিয়া আমাৰ আটাইতকৈ ডাঙৰ বিপদটো ভাইৰাছৰ পৰা নহয়, বৰঞ্চ বিশ্বৰ ঐক্যবদ্ধতা তথা নেতৃত্বহীনতাৰ অভাৱৰ বাবে হৈছে। আমি সকলোৱে একগোট হ’লে পৃথিৱীৰ পৰা এই অতিমাৰীক বিদায় দিব পাৰিম।
টেড্ৰ’ছে লগতে কয় যে কোভিড-১৯ অতিমাৰীয়ে এইটো দেখুৱাই দিছে যে বিশ্ব সাজু নাছিল। বিশ্বস্তৰত অতিমাৰী এতিয়াও বৃদ্ধি পাই আছে।
আনহাতে, WHOৰ বিশেষ প্ৰতিনিধি ডেভিড নেব্ৰ’ই কয় যে বিশ্বৰ সকলো লোকে ভেকচিন লাভ কৰিবলৈ কমেও আঢ়ৈ বছৰ সময় লাগিব পাৰে।
তেওঁ কয় যে চলিত বছৰ শেষৰ ফাললৈয়ো যদি ভেকচিন সফল হয় তেতিয়াও আৰু আন পৰীক্ষাসমূহ কৰাৰ বাবে সময় লাগিব পাৰে।তদুপৰি, ইয়াৰ পাছত বৃহৎ সংখ্যাত ভেকচিন উৎপাদনৰ প্ৰত্যাহ্বানো আছে।
বিশ্ব স্বাস্থ্য সংস্থাই লগতে স্পষ্ট কৰে যে কৰ’নাৰ সংক্ৰমণ বৃদ্ধিৰ আঁৰত কেৱল অধিক পৰীক্ষাৰ তত্ত্ব সঠিক নহয়।
