মহাৰাষ্ট্ৰৰ ৰাজনীতিত বুধবাৰে পুৱা এক শোকাকুল পৰিৱেশৰ সৃষ্টি হয়। এক গুৰুত্বপূৰ্ণ ৰাজনৈতিক ভ্ৰমণৰ সময়তে পুনে জিলাৰ বাৰামতী বিমানবন্দৰৰ ওচৰত এখন চাৰ্টাৰ্ড বিমান দুৰ্ঘটনাগ্ৰস্ত হোৱাৰ ফলত মহাৰাষ্ট্ৰৰ উপ-মুখ্যমন্ত্ৰী অজিত পাৱাৰৰ কৰুণ মৃত্যু ঘটে। এই ভয়াৱহ দুৰ্ঘটনাত অজিত পাৱাৰৰ লগতে তেওঁৰ ব্যক্তিগত নিৰাপত্তাৰক্ষী আৰু দুজন পাইলটসহ বিমানখনত থকা মুঠ ছয়জন লোকৰ প্ৰাণহানি হয়।
স্থানীয় প্ৰত্যক্ষদৰ্শীৰ মতে, বিমানখন মুম্বাইৰ পৰা পুৱা প্ৰায় ৮ বজাত উৰা মাৰিছিল আৰু বাৰামতীত অৱতৰণ কৰাৰ চেষ্টা চলোৱাৰ সময়তে নিয়ন্ত্ৰণ হেৰুৱাই মাটিত আচাৰ খাই পৰে। ইয়াৰ লগে লগে বিমানখনত প্ৰচণ্ড বিস্ফোৰণ ঘটে আৰু এক বৃহৎ অগ্নিকাণ্ডৰ সৃষ্টি হয়।
এই দুৰ্ভাগ্যজনক ঘটনাত প্ৰাণ হেৰুওৱা দুই পাইলট আছিল কেপ্তেইন সুমিত কাপুৰ আৰু কেপ্তেইন শাম্ভৱী পাঠক। ভিএছআৰ এভিয়েচনৰ দ্বাৰা পৰিচালিত এই বিমানখনৰ দুই পাইলটেই আছিল যথেষ্ট অভিজ্ঞ। কেপ্তেইন শাম্ভৱী পাঠক এগৰাকী সেনা বিষয়াৰ কন্যা আছিল আৰু তেওঁ মুম্বাই বিশ্ববিদ্যালয়ৰ পৰা শিক্ষা গ্ৰহণ কৰি নিউজিলেণ্ডত পাইলটৰ প্ৰশিক্ষণ লৈছিল।
আনহাতে, কেপ্তেইন সুমিত কাপুৰ আছিল অত্যন্ত অভিজ্ঞ এজন পাইলট, যাৰ ১৬ হাজাৰ ঘণ্টাতকৈও অধিক সময় বিমান উৰুওৱাৰ অভিজ্ঞতা আছিল। তেওঁ পূৰ্বে চাহাৰা আৰু জেট এয়াৰৱেজৰ দৰে আগশাৰীৰ বিমান সংস্থাত কাম কৰিছিল।
ভিএছআৰ এভিয়েচনৰ শীৰ্ষ বিষয়া ভি কে সিঙে জনোৱা মতে, বিমানখন কাৰিকৰীভাৱে সম্পূৰ্ণৰূপে সুস্থ আছিল আৰু ইয়াত কোনো বিসংগতি নাছিল। তেওঁৰ মতে, দুৰ্ঘটনাটোৰ প্ৰাথমিক কাৰণ হয়তো আছিল অতি কম দৃশ্যমানতা। বিমানখন অৱতৰণ কৰিবলৈ চেষ্টা কৰাৰ সময়ত কুৱঁলী বা ধূলিৰ বাবে পাইলটে ৰানৱে দেখা পোৱা নাছিল আৰু সেইবাবেই পুনৰ ওপৰলৈ উঠিবলৈ চেষ্টা কৰাৰ সময়তে এই অঘটন ঘটে। বিষয়াগৰাকীয়ে অত্যন্ত দুখেৰে কয় যে দুই পাইলট তেওঁৰ পৰিয়ালৰ সদস্যৰ দৰে আছিল আৰু তেওঁলোকৰ মৃত্যুত এক অপূৰণীয় ক্ষতি হৈছে।
বৰ্তমান অসামৰিক বিমান পৰিবহণ সঞ্চালকালয়ে এই সমগ্ৰ ঘটনাৰ এক উচ্চস্তৰীয় তদন্ত আৰম্ভ কৰিছে। তদন্তকাৰী দলটোৱে বতৰৰ অৱস্থা, দৃশ্যমানতা আৰু কাৰিকৰী দিশসমূহ পৰীক্ষা কৰি আছে। ৬৬ বছৰীয়া অজিত পাৱাৰে আগন্তুক স্থানীয় নিৰ্বাচনৰ বাবে এখন ৰাজনৈতিক সভাত অংশ ল’বলৈ গৈ থকা অৱস্থাতে এই শোকাৱহ মৃত্যুৰ মুখত পৰে। এই ঘটনাই মহাৰাষ্ট্ৰৰ লগতে সমগ্ৰ দেশতে শোকৰ ছাঁ পেলাইছে আৰু বিভিন্ন ৰাজনৈতিক নেতাই এই মৃত্যুত গভীৰ সমবেদনা জ্ঞাপন কৰিছে।
