ভাৰতত কৰ’নাৰ দ্বিতীয়টো ঢৌত সংক্ৰমণ কিয় ইমান বৃদ্ধি পাইছে? কেবল ভাইৰাছৰ ৰূপ সলনি হোৱাটোৱেই নে আন কিবা কাৰণ আছে? ইয়াৰ উত্তৰ দিছে বিশ্ব স্বাস্থ্য সংস্থাৰ প্ৰধান বিজ্ঞানী সৌম্যা স্বামীনাথনে।
আন্তৰাষ্ট্ৰীয় সংবাদ সংস্থাক দিয়া এক সাক্ষাৎকাৰত স্বামীনাথনে কয়,’’মানুহৰ সচেতনতাৰ অভাৱৰ বাবেই ভাৰতত কৰ’নাৰ ব্যাপক সংক্ৰমণ ঘটিছে। জনসমাৱেশ বৃদ্ধি পাইছিল। মানুহে মাস্ক পৰিধান কৰা বা আন কোভিড বিধি মানি চলিবলৈও এৰিছিল। ফলত প্ৰথমাৱস্থাত তলৰ পৰ্যায়ত বহুদিন ধৰি সংক্ৰমণ বিয়পিছে। লাহে লাহে সেয়া বিস্তাৰিত হৈ পৰিছে।‘’
বিজ্ঞানীগৰাকীয়ে লগতে সকীয়াই দিছে যে এনেদৰে চলি থাকিলে এসময়ত সংক্ৰমণ নিয়ন্ত্ৰণৰ বাহিৰলৈ গুচি যাব পাৰে।
বিশেষজ্ঞসকলে আগজাননী দিয়া অনুসৰি চলিত মাহতেই কৰ’না সংক্ৰমণৰ হাৰ শীৰ্ষত উপনীত হ’ব পাৰে। মৃত্যুৰ সংখ্যা বাঢ়ি ১০ লাখ হ’বগৈ পাৰে।
বিজ্ঞানীগৰাকীয়ে লগতে জানিবলৈ দিয়ে যে ভাৰতত যিটো প্ৰজাতি সক্ৰিয় সেইটো .১.৬১৭। এই প্ৰজাতিক বিশ্ব স্বাস্থ্য সংস্থাই এতিয়া উদ্বেজনক আখ্যা নিদিলেও আমেৰিকা, ব্ৰিটেইনৰ দৰে দেশে সেই আখ্যা দিছে।
বিশ্ব স্বাস্থ্য সংস্থাই এই প্ৰজাতিকো উদ্বেগজনক প্ৰজাতি হিচাপে চিহ্নিত কৰা উচিত বুলি মন্তব্য কৰে সৌম্যা স্বামীনাথনে।
তেওঁ লগতে কয়,’’ বি.১.৬১৭ প্ৰজাতিয়ে ক্ৰমে চৰিত্ৰ সলনি বা মিউটেট কৰিছে। ইয়াৰ ফলত এই ভাইৰাছৰ সংক্ৰমণ ক্ষমতা আৰু বৃদ্ধি পাইছে। কেবল সেয়াই নহয়, আগন্তুক দিনত এই ভাইৰাছ এন্টিবডী ৰোধক হৈয়ো উঠিব পাৰে। অৰ্থাৎ ভেকচিন বা আন কাৰণত শৰীৰত প্ৰতিৰোধ ক্ষমতা গঢ়ি উঠিলেও এই ভাইৰাছক ৰোধ কৰা কঠিন হৈ উঠিব পাৰে। সেয়ে, এতিয়াই সাৱধান হ’ব লাগিব।‘’
তেওঁ কয় যে এতিয়ালৈকে ভাৰতৰ মাত্ৰ ২ শতাংশ লোকক ভেকচিন দিয়া সম্ভৱ হৈছে।এনেদৰে চলি থাকিলে সকলোকে ভেকচিন দিওতে বছৰ পাৰ হৈ যাব। তেতিয়ালৈকে হয়তো ভাইৰাছে চৰিত্ৰ সলনি কৰি পেলাব। তেতিয়া ভেকচিনৰ কাৰ্যকৰিতা নাথাকিব।
বিজ্ঞানীগৰাকীয়ে স্পষ্ট কৰি দিয়ে যে ভাইৰাছটো যিমানে বিয়পিব সিমানেই ইয়াৰ চৰিত্ৰ সলনিৰ আশংকা বৃদ্ধি পাব। সেয়ে সকলোকে সতৰ্ক হ’বলৈ আহ্বান জনাইছে বিজ্ঞানী সৌম্যা স্বামীনাথনে।
