অসমৰ অন্যান্য সমষ্টিৰ লগতে গোলাঘাট বিধানসভা সমষ্টিটোত এতিয়া ৰাজ্যৰ বহুতৰে দৃষ্টি বিশেষ ভাবে নিৱদ্ধ হৈছে।
মুলতঃ কংগ্ৰেছৰ আধিপত্য থকা গোলাঘাট সমষ্টিত এইবাৰ প্ৰাৰ্থীৰ ক্ষেত্ৰত সম্পূৰ্ণ ওলোটা ছবি এখন প্ৰকট হোৱাত জয়-পৰাজয়ৰ অংক অধিক জটিল হৈ পৰিছে।
অসমৰ এটা সন্মানীয় সমষ্টি গোলাঘাট সমষ্টিত ১৯৫১ চনৰে পৰা কংগ্ৰেছে বিশেষ আধিপত্য বিস্তাৰ কৰি আহিছে।
১৯৫১ চনত সমষ্টিটোত কংগ্ৰেছৰ ৰাজেন্দ্ৰ নাথ বৰুৱা বিজয়ী হোৱাৰ পিছৰে পৰা একাদিক্ৰমে ১৯৫৭,১৯৬২ চনৰ বিধানসভা নিৰ্বাচনতো সমষ্টিটো কংগ্ৰেছৰ হাতলৈয়ে গৈছিল।১৯৬২ চনৰ পিছত মাজতে দেশৰ ৰাজনৈতিক দৃশ্যপট সলনি হোৱাৰ বাবে সমষ্টিটো আন দলৰ দখললৈ গৈছিল যদিও ১৯৮৩ চনৰ নিৰ্বাচনত কংগ্ৰেছৰ নগেন নেওগে পুনৰ সমষ্টিটো কংগ্ৰেছৰ দখললৈ আনিবলৈ সক্ষম হৈছিল।
অসম আন্দোলনৰ ভৰপক সময়ত সমষ্টিটো নিৰ্দলীয় প্ৰাৰ্থী দেৱেশ্বৰ বৰাৰ দখললৈ গৈছিল যদিও ১৯৯১ চনৰ বিধানসভা নিৰ্বাচনত পুনৰ কংগ্ৰেছৰ নগেন নেওগ বিজয়ী হৈছিল।
ইয়াৰ পিছত এক অনাহুত পৰিস্থিতিত নগেন নেওগৰ মৃত্যু হোৱাৰ পিছত নেওগৰ পত্নী অজন্তা নেওগে গোলাঘাট সমষ্টিত একেৰাহে ২০০১,২০০৬,২০১১ আৰু ২০১৬ ৰ বিধানসভা নিৰ্বাচনত বিজয়ী হৈছিল।মুলতঃ কংগ্ৰেছৰ ঘাটি হিচাবে পৰিচিত সমষ্টিটোত অজন্তা নেওগৰ চাৰিবাৰকৈ বিজয়ৰ আঁৰত অনুকম্পামূলক কাৰক বিশেষ জৰিত থকা বুলি ক’ব নোৱাৰি।
কাৰণ সমষ্টিটোৰ চাহ বাগিচা অঞ্চলৰ বহু ভোটাৰৰ বাবে অজন্তা নেওগৰ সলনি কংগ্ৰেছৰ নামটোহে় বেছি চিনাকী।
কংগ্ৰেছৰ পৰা একেৰাহে চাৰিবাৰকৈ বিজয়ী হোৱা এজন্তা নেওগে এইবাৰ বিজেপিত যোগদান কৰিছে।একেদৰে বিতুপন শইকীয়াই বিজেপি এৰি যোদ দিছে কংগ্ৰেছত।
আনহাতে বিজেপিৰ পৰা টিকট নাপাই যোৱা নিৰ্বাচনত অজন্তা নেওগৰ হাতত পৰাজিত হোৱা বিজেপি নেতা বিতুপন শইকীয়াই যোগ দিছে কংগ্ৰেছত।
লক্ষ্যণীয় কথাটো হ’ল প্ৰাক্তন বিজেপি তথা ন-কংগ্ৰেছী বিতুপন শইকীয়াই ২০১৬ চনৰ বিধানসভা নিৰ্বাচনত অজন্তা নেওগৰ হাতত পৰাজিত হৈছিল মাত্ৰ ৫,২১৩ টা ভোটত।
অজন্তা নেওগে লাভ কৰা ভোটৰ সংখ্যা আছিল ৭৩,৮৬২ টা।
আনহাতে সেই সময়ৰ বিজেপি প্ৰাৰ্থী বিতুপন শইকীয়াই লাভ কৰিছিল ৬৮,৬৪৯ টা ভোট।বিতুপন শইকীয়াৰ গণভিত্তিও যে গোলাঘাট সমষ্টিত মুঠেও কম নহয় সেই কথা ২০১৬ৰ বিধানসভা নিৰ্বাচনৰ ফলাফলৰ পৰাই প্ৰকট হৈ পৰে।
কংগ্ৰেছত যোগদান কৰা বিতুপন শইকীয়াই এইবাৰ কংগ্ৰেছৰ স্থায়ী ভোট খিনি লাভ কৰাটো একপ্ৰকাৰ নিশ্চিত। ইয়াৰ উপৰি তেওঁৰ শুভাকাংক্ষী তথা অনুৰাগীসকলৰ ভোট আছেই।
বিপৰীতে অজন্তা নেওগে বিজেপিলৈ অহা কথাটো গোলাঘাট বিজেপিৰে বহু নেতা-কৰ্মীয়ে অন্তৰেৰে মানি ল’ব পৰা নাই।
বিজেপিৰ পৰা আহি কংগ্ৰেছত যোগদান কৰা বিতুপন শইকীয়াক কংগ্ৰেছৰ নেতা কৰ্মী সকলে বিপুল আদৰণি জনোৱাৰ বিপৰীতে বিজেপিত যোগদান কৰা অজন্তাই পিছে বহু ঠাইত নিজৰ দলৰ কৰ্মীৰে প্ৰতিবাদৰ মুখামুখী হ’বলগীয়া হৈছে।
এনে পৰিস্থিতিত সেয়ে বিতুপন শইকীয়া অজন্তা নেওগৰ বাবে হৈ পৰিছে বৃহৎ ফেক্টৰ।
সমষ্টিটোত চাৰিবাৰৰ বিজয়ী বিধায়িকাগৰাকীৰ ভাগ্যৰ চকৰি কোন দিশে ঘূৰে সেয়া স্পষ্ট হ’ব ২ মে’ৰ দিনা।
এতিয়া অপেক্ষা মাত্ৰ সেই দিনটোলৈ।
