কি কয় গৱেষকে? কিয় কোভিড-১৯ প্ৰতিৰোধী শক্তি বেছি ভাৰতীয়ৰ?
বিশুদ্ধ খোৱাপানীৰ অভাৱ, অস্বাস্থ্যকৰ খাদ্য গ্ৰহণ, প্ৰদূষিত বায়ু সেৱন আৰু ঘন বসতিৰ মাজত বাস কৰা কোটি কোটি ভাৰতীয়ই হাৰ্টৰ বেমাৰ, শ্বাস-প্ৰশ্বাসজনিত ৰোগ, কেন্সাৰ তথা ডায়েবেটিছত আক্ৰান্ত হোৱাৰ কথা গৱেষকসকলে প্ৰকাশ কৰিছে।
অকল বায়ু প্ৰদূষণেই প্ৰতিবছৰে দহ লাখতকৈয়ো অধিক লোকৰ মৃত্যু ঘটায় বুলি চৰকাৰী প্ৰতিবেদন প্ৰকাশ পাইছে।
বিশ্ব স্বাস্থ্য সংস্থাই কোভিড-১৯ৰ বিৰুদ্ধে স্বাস্থ্যৰ সুৰক্ষাৰ ক্ষেত্ৰত বিশুদ্ধ পানী, পৰিচ্ছন্নতা আৰু স্বাস্থ্যকৰ পৰিৱেশৰ প্ৰয়োজন বুলি দোহাৰি আহিছে।
বিশ্ব স্বাস্থ্য সংস্থা আৰু য়ুনিচেফৰ এক অধ্যয়নত কোৱা হৈছে যে বিশ্বৰ প্ৰায় ৪০শতাংশ জনসংখ্যাই উন্নয়নশীল ৰাষ্ট্ৰসমূহত বসবাস কৰে আৰু তেওঁলোকৰ প্ৰাথমিকভাৱে হাত থোৱাৰ সুবিধাৰো অভাৱ।
কাউন্সিল অফ ছায়েন্টিফিক এণ্ড ইণ্ডাষ্ট্ৰিয়েল ৰিচাৰ্ছৰ মতে এনেধৰণৰ স্বাস্থ্যসেৱাৰ সুবিধা, স্বাস্থ্যকৰ তথা পৰিচ্ছন্নতাৰ অভাৱত ভোগা দেশসমূহত অধিক সংক্ৰামক ৰোগৰ ঘটনা ঘটা বুলি প্ৰায়েই ভৱা হয় যদিও কোভিড-১৯ৰ ক্ষেত্ৰত নিম্ন-মজলীয়া আয়ৰ এই দেশসমূহত ই ভুল ধাৰণা হিচাপে প্ৰমানিত হৈছে।
বিশ্বৰ জনসংখ্যাৰ ফালৰ পৰা বৃহত্তম দেশ হিচাপে ভাৰতত কৰ’নাত আক্ৰান্তৰ সংখ্যাও সিমান উদ্বেগজনক হৈ উঠা নাই আৰু বিশ্বৰ মৃত্যুৰ হাৰৰ মাত্ৰ ১০শতাংশহে ভাৰতত হৈছে।
শেহতীয়াভাৱে ভাৰতীয় বিজ্ঞানীৰ নতুন গৱেষণাই প্ৰকাশ কৰা মতে কম স্বাস্থ্যকৰ, বিশুদ্ধ খোৱা পানীৰ অভাৱ আৰু অপৰিচ্চন্ন অৱস্থাই প্ৰকৃততে মাৰাত্মক কোভিড-১৯ৰ পৰা বহু লোকৰ জীৱন বচাইছে।
বিজ্ঞানীসকলে স্পষ্ট কৰি দিছে যে মানুহে ক্ৰমাগতভাৱে যিটো পৰিৱেশৰ সৈতে মিলি বাস কৰে সেই পৰিৱেশটোৰ প্ৰভাৱ শৰীৰত পৰে।
চৌপাশৰ অপৰিচ্ছন্ন পৰিৱেশৰ পৰা সৃষ্টি হোৱা বিভিন্ন প্ৰকাৰৰ বীজাণু তথা উপাদানে শৰীৰক প্ৰতিকূল পৰিৱেশৰ সৈতে যুঁজাত সহায় কৰে।