নতুন প্ৰজন্ম বা ‘জেন জি’ (Gen Z) বুলি ক’লেই আমাৰ মনলৈ আহে মুক্ত চিন্তাধাৰা, আধুনিক সাজ-পোছাক আৰু সমাজৰ পুৰণি অন্ধবিশ্বাসৰ পৰা আঁতৰি থকা এটা ছবি। যৌন শিক্ষা (Sex Education) বা এই সন্দৰ্ভত মুকলিকৈ কথা পতাটো তেওঁলোকৰ বাবে কোনো লাজৰ বিষয় নহয়। কিন্তু তাৰ পিছতো তেওঁলোক সঁচাকৈয়ে যৌন জীৱনত পূৰ্বৰ প্ৰজন্মতকৈ আগবঢ়া নে?
শেহতীয়া এক সমীক্ষাই এই ধাৰণাক সম্পূৰ্ণ ভুল প্ৰমাণিত কৰিছে। পূৰ্বৰ প্ৰজন্মৰ তুলনাত জেন জি এই ক্ষেত্ৰত বহু পিছপৰি আছে। আমেৰিকাৰ এটা সংস্থাই কৰা সমীক্ষা অনুসৰি, ১৯৯০ চনত যুৱ প্ৰজন্মৰ মাজত যৌন সম্পৰ্কত সক্ৰিয়ভাৱে জড়িত থকাৰ হাৰ আছিল ৫৫ শতাংশ, যি বৰ্তমান সময়ত হ্ৰাস পাই মাত্ৰ ৩৭ শতাংশ হৈছেগৈ। ভাৰতৰ ক্ষেত্ৰতো এই ছবিখন প্ৰায় একেই হ’ব বুলি বিশেষজ্ঞসকলে ধাৰণা কৰিছে।
আগ্ৰহ কমি যোৱাৰ মূল কাৰণসমূহ:
গৱেষণাত যুৱ প্ৰজন্মৰ এই অনাগ্ৰহৰ অন্তৰালত কেইবাটাও গুৰুত্বপূৰ্ণ কাৰণ পোহৰলৈ আহিছে:
উচ্চ শিক্ষাৰ প্ৰভাৱ: সমীক্ষাত দেখা গৈছে যে শিক্ষাৰ হাৰ বৃদ্ধি পোৱাৰ লগে লগে মানুহৰ যৌন সম্পৰ্কৰ প্ৰতি স্বাভাৱিক আগ্ৰহ কিছু পৰিমাণে কমি আহে।
ডিজিটেল জীৱন আৰু অতিৰিক্ত ব্যস্ততা: বৰ্তমানৰ ‘ডিজিটেল’ জীৱনশৈলীৰ বাবে যুৱ প্ৰজন্মৰ বেছিভাগ সময় মোবাইল বা কম্পিউটাৰৰ স্ক্ৰীণৰ সন্মুখতে পাৰ হয়। কেৰিয়াৰত পিছপৰি যোৱাৰ ভয় আৰু আৰ্থিক চিন্তাই তেওঁলোকক অহৰহ ব্যস্ত কৰি ৰাখে।
মানসিক অৱসাদ (Depression): যৌনতা কেৱল এটা শাৰীৰিক ক্ৰিয়া নহয়, ইয়াত মনৰ সংযোগো অতি প্ৰয়োজনীয়। বৰ্তমান সময়ত মানসিক চাপ আৰু অৱসাদে যুৱ প্ৰজন্মক ইমান বেছি গ্ৰাস কৰিছে যে তেওঁলোক এইবোৰৰ প্ৰতি উদাসীন হৈ পৰিছে। সঠিক সময়ত মানসিক স্বাস্থ্যৰ চিকিৎসা নকৰিলে যৌন ক্ষমতাও হ্ৰাস পাব পাৰে।
চছিয়েল মিডিয়া আৰু প্ৰতিযোগিতাৰ দৌৰ: চছিয়েল মিডিয়াৰ জগতখনে সকলোৰে মাজত এক অদৃশ্য প্ৰতিযোগিতাৰ সৃষ্টি কৰিছে। ভাল চাকৰি, ডাঙৰ ঘৰ, দামী গাড়ী, বিদেশ ভ্ৰমণ— এই সকলোবোৰ কম সময়তে পাবলৈ গৈ তেওঁলোক এক অন্তহীন দৌৰত নামি পৰিছে। আনৰ জকমকীয়া জীৱন দেখি নিজৰ মাজত হীনমন্যতা আৰু হতাশাৰ সৃষ্টি হৈছে, যাৰ ফলত এটা শান্তিপূৰ্ণ সম্পৰ্ক বা প্ৰেমময় যৌন মিলনৰ বাবে তেওঁলোকৰ জীৱনত কোনো সময়েই নাইকীয়া হৈ পৰিছে।
শেষ কথা: এই সমীক্ষাই এতিয়া ডাঙৰ প্ৰশ্নৰ সৃষ্টি কৰিছে— তেন্তে পুৰণি দিনৰ সেই শান্ত আৰু ধীৰ-স্থিৰ জীৱনশৈলীয়েই এক সুখী দাম্পত্য আৰু সুস্থ যৌন জীৱনৰ বাবে বেছি উপযোগী আছিল নেকি?
