বৃহস্পতিবাৰে কিৰেন ৰিজিজুক কেন্দ্ৰীয় আইন মন্ত্ৰালয়ৰ দায়িত্বৰ পৰা অব্যাহতি দিয়া হৈছে। তেওঁৰ ঠাইত এই মন্ত্ৰালয়ৰ দায়িত্ব দিয়া হৈছে প্ৰাক্তন আই এ এছ বিষয়া তথা ৰাজস্থানৰ সাংসদ অৰ্জুন মেঘৱালক।
ইপিনে, কিৰেন ৰিজিজুক আইন মন্ত্ৰালয়ৰ পৰা অপসাৰণ কৰি ভূতত্ত্ব মন্ত্ৰালয়ৰ দায়িত্ব দিয়া হৈছে। আইন মন্ত্ৰালয়ৰ দায়িত্ব স্বতন্ত্ৰ দায়িত্ব থকা ৰাজ্য মন্ত্ৰী মেঘৱালক দিয়াৰ আঁৰত আগন্তুক ৰাজস্থান নিৰ্বাচনৰ বাবে সমীকৰণ আছে নে মোডী চৰকাৰে ৰিজিজুক অপসাৰণ কৰি উচ্চতম ন্যায়ালয়লৈ বাৰ্তা প্ৰেৰণ কৰিছে সেয়া সম্পূৰ্ণ স্পষ্ট হোৱা নাই।
উল্লেখ্য যে উচ্চতম ন্যায়ালয়ৰ কলেজিয়াম আৰু চৰকাৰৰ মাজত সংঘাত দীৰ্ঘদিন ধৰি চলি আহিছে। ন্যায়াধীশ নিযুক্তি সন্দৰ্ভত এই বিবাদ বাৰে বাৰে চৰ্চালৈ আহিছে। আনকি আইন মন্ত্ৰী কিৰেন ৰিজিজুৱেও কেইবাবাৰো বিতৰ্কিত মন্তব্য কৰিছে। এই পৰিস্থিতিত ৰিজিজুৰ অপসাৰণ যথেষ্ট তাৎপৰ্যপূৰ্ণ বুলি গণ্য কৰা হৈছে।
লগতে পঢ়ক: কৰ্ণাটকৰ পৰৱৰ্তী মুখ্যমন্ত্ৰী সিদ্দাৰামাইয়া! উপ-মুখ্যমন্ত্ৰী শিৱকুমাৰ; জনালে কংগ্ৰেছে
ইয়াৰ পূৰ্বে আইন মন্ত্ৰী কিৰেন ৰিজিজুৱে ধাৰাবাহিকভাৱে উচ্চতম ন্যায়ালয়ৰ কলেজিয়াম ব্যৱস্থাৰ বিৰোধিতা কৰি আহিছে। আইন মন্ত্ৰীগৰাকীৰ ভাষাত, “কলেজিয়াম পৰিচালনাত কেইবাটাও সুৰুঙা আছে, গতিকে কলেজিয়াম পৰিচালনা স্বচ্ছ নহয় বুলি এতিয়া মানুহে ভাবিবলৈ লৈছে।”
উচ্চতম ন্যায়ালয়ৰ ন্যায়াধীশ সঞ্জয় কিষাণ কৌল আৰু এ এছ ওকাৰ বিচাৰপীঠে এই ক্ষেত্ৰত চৰকাৰক কেইদিনমান আগতে সকীয়াই দিছিল। কিন্তু উচ্চতম ন্যায়ালয়ৰ কলেজিয়ামকলৈ প্ৰশ্ন উত্থাপন কৰা বন্ধ নকৰিলে। চৰকাৰে অভিযোগ উত্থাপন কৰে যে উচ্চতম ন্যায়ালয়ৰ কলেজিয়ামত নিযুক্তি আৰু বদলি প্ৰক্ৰিয়া স্বচ্ছ নহয়।
ৰিজিজুৱে দাবী কৰে যে উচ্চ ন্যায়ালয় আৰু উচ্চতম ন্যায়ালয়ৰ ন্যায়াধীশ নিযুক্তিৰ ক্ষেত্ৰত কেৱল জনসাধাৰণৰ নিৰ্বাচিত প্ৰতিনিধিয়েহে ভূমিকা ল’ব পাৰে। কলেজিয়ামে প্ৰেৰণ কৰা প্ৰস্তাৱটো কেৱল মানি লোৱাটো চৰকাৰৰ ভূমিকা হ’ব নোৱাৰে। তেওঁ লগতে কৈছিল যে এই কলেজীয়া ব্যৱস্থা ভাৰতীয় সংবিধানৰ ‘বহিৰ্ভূত’।
মন কৰিবলগীয়া যে উচ্চতম ন্যায়ালয়ৰ বহু পৰামৰ্শ কেন্দ্ৰৰ ওচৰত বিচাৰাধীন হৈ আছে আৰু এতিয়াও অনুমোদন পোৱা নাই। আনকি কেইবাখনো উচ্চ ন্যায়ালয়ৰ মুখ্য ন্যায়াধীশ পদৰ পৰামৰ্শও কেন্দ্ৰীয় আইন মন্ত্ৰীৰ টেবুলত পৰি আছে অনুমোদনৰ অপেক্ষাত। শেহতীয়াকৈ এই বিতৰ্কৰ বিষয়ে সোধাত ৰিজিজুৱে সাংবাদিকৰ আগত কয়, ‘কলেজিয়ামৰ বিষয়টো সঁচাকৈয়ে এটা মাইণ্ড গেম। মই এই বিষয়ে কথা ক’ব নিবিচাৰো।’
লগতে পঢ়ক: হিমন্ত বিশ্ব শৰ্মাৰ বিৰুদ্ধে মানহানিৰ গোচৰত লিপিবদ্ধ কংগ্ৰেছ নেতাৰ বক্তব্য
প্ৰসংগক্ৰমে ২০১৫ চনৰ পূৰ্বে মোডী চৰকাৰে কলেজিয়াম ব্যৱস্থা সলনি কৰিবলৈ ৰাষ্ট্ৰীয় ন্যায়িক নিযুক্তি আয়োগ বা এনজেএচি গঠন কৰাৰ সিদ্ধান্ত লৈছিল। সংসদ আৰু ১৬খন ৰাজ্যৰ বিধানসভাতো বিধেয়কখন গৃহীত হয়। অৱশ্যে উচ্চতম ন্যায়ালয়ে এই আইনখন অবৈধ বুলি ঘোষণা কৰে। কিন্তু শেহতীয়াকৈ আইন মন্ত্ৰীৰ সৈতে উচ্চতম ন্যায়ালয়ৰ প্ৰত্যক্ষ সংঘাত ৰাজহুৱা হৈ পৰাত মোডী চৰকাৰে অস্বস্তিত পৰিবলগীয়া হৈছিল।
কিৰেন ৰিজিজুৰ বৰ্ণাঢ্য কেৰিয়াৰো চকুত লগা। অৰুণাচল প্ৰদেশৰ ৰাজনীতিবিদগৰাকী ২০২৩ চনৰ ১৮ মে’ৰ পৰা মোডী মন্ত্ৰীসভাত ভাৰত চৰকাৰৰ ভূ বিজ্ঞানৰ কেবিনেট মন্ত্ৰী আৰু ২০০৪ চন আৰু ২০১৪ চনৰ পৰা অৰুণাচল পশ্চিম লোকসভা সমষ্টিক প্ৰতিনিধিত্ব কৰি লোকসভাৰ সদস্য।
ইয়াৰ পূৰ্বে ২০১৪ চনৰ পৰা ২০১৯ চনলৈ কেন্দ্ৰীয় গৃহ পৰিক্ৰমা ৰাজ্য মন্ত্ৰী আৰু ২০১৯ চনৰ পৰা ২০২১ চনলৈ সংখ্যালঘু পৰিক্ৰমা বিভাগৰ ৰাজ্যিক মন্ত্ৰী আৰু ২০১৯ চনৰ পৰা ২০২১ চনলৈ যুৱ পৰিক্ৰমা আৰু ক্ৰীড়া বিভাগৰ ৰাজ্যিক মন্ত্ৰী (স্বতন্ত্ৰ) হিচাপে কাৰ্যনিৰ্বাহ কৰিছিল। ২০২১ চনৰ পৰা ২০২৩ চনলৈকে তেওঁ মোডী মন্ত্ৰীসভাৰ আইন আৰু ন্যায় বিভাগৰ ৩৪ সংখ্যক কেবিনেট মন্ত্ৰী আছিল।
লগতে পঢ়ক: হত্যাৰ বলি হৈছিল নেকি জোনমণি! প্ৰত্যক্ষদৰ্শীৰ ভাষ্যই দিছে নতুন ইংগিত
১৯৭১ চনৰ ১৯ নৱেম্বৰত অৰুণাচল প্ৰদেশৰ পশ্চিম কামেং জিলাৰ নাফ্ৰাৰ সমীপৰ নখুত ৰিজিজুৰ জন্ম হৈছিল। তেওঁৰ পিতৃ অৰুণাচল প্ৰদেশৰ প্ৰথম প্ৰ’টেম অধ্যক্ষ আছিল যিয়ে প্ৰথম ৰাজ্য বিধানসভাৰ সদস্যসকলক শপত গ্ৰহণ কৰাইছিল।
ৰিজিজুৱে দিল্লী বিশ্ববিদ্যালয়ৰ হংসৰাজ কলেজৰ পৰা স্নাতক ডিগ্ৰী সমাপ্ত কৰি ১৯৯৮ চনত দিল্লী বিশ্ববিদ্যালয়ৰ আইন অনুষদৰ কেম্পাছ ল চেণ্টাৰৰ পৰা আইন বিষয়ত স্নাতক ডিগ্ৰী সম্পূৰ্ণ কৰে।
কিৰেণ ৰিজিজুক উত্তৰ-পূব ভাৰতৰ ভাৰতীয় জনতা পাৰ্টিৰ প্ৰধান মুখ হিচাপে গণ্য কৰা হয়। তেওঁ ২০০০ চনৰ পৰা ২০০৫ চনলৈকে খাদী আৰু গ্ৰামোদ্যোগ আয়োগৰ সদস্য হিচাপে কাৰ্যনিৰ্বাহ কৰিছিল।
লগতে পঢ়ক: ভাষণ দি থকা মুখ্যমন্ত্ৰীৰ মঞ্চলৈ নিজৰ ১ বছৰীয়া সন্তানক দলিয়াই দিলে পিতৃয়ে! কিন্তু কিয়?
২০০৪ চনত তেওঁ জোৰাম ৰিনা ৰিজিজুৰ সৈতে বিবাহপাশত আবদ্ধ হয়। পত্নীও নতুন দিল্লীৰ লেডী শ্ৰী ৰাম কলেজ ফৰ উইমেনৰ পৰা স্নাতক ডিগ্ৰী লাভ কৰাৰ লগতে অৰুণাচল বিশ্ববিদ্যালয়ৰ পৰা স্বৰ্ণ পদক বিজয়ী। জোৰাম ৰিনা অৰুণাচল প্ৰদেশৰ ইটানগৰৰ ডেৰা নাটুং চৰকাৰী মহাবিদ্যালয়ত ইতিহাস বিষয়ৰ সহযোগী অধ্যাপিকা।
