কৰ্ণাটকৰ পৰৱৰ্তী মুখ্যমন্ত্ৰী হ’ল সিদ্দাৰামাইয়া। উপ-মুখ্যমন্ত্ৰীৰ দায়িত্ব লাভ কৰিছে প্ৰদেশ কংগ্ৰেছৰ সভাপতি ডি কে শিৱকুমাৰে। কৰ্ণাটক বিধানসভা নিৰ্বাচনত জয়লাভৰ ৫ দিনৰ পাছত বৃহস্পতিবাৰে কংগ্ৰেছ হাইকমাণ্ডক এই কথা অৱগত কৰে এআইচিচিৰ সাংগঠনিক সাধাৰণ সম্পাদক কেচি বেনুগোপালে। তেওঁ কয় যে উপ-মুখ্যমন্ত্ৰী পদৰ উপৰিও শিৱকুমাৰ প্ৰদেশ কংগ্ৰেছৰ সভাপতি পদতো বাহাল থাকিব।
শিৱকুমাৰে বৃহস্পতিবাৰে সন্ধিয়া ৭ বজাত কৰ্ণাটকৰ নৱনিৰ্বাচিত কংগ্ৰেছ বিধায়কসকলৰ বৈঠক আহ্বান কৰে। সিদ্দাৰামাইয়াৰ নাম তাত আনুষ্ঠানিকভাৱে ঘোষণা কৰিব পাৰিব।
লগতে পঢ়ক: হত্যাৰ বলি হৈছিল নেকি জোনমণি! প্ৰত্যক্ষদৰ্শীৰ ভাষ্যই দিছে নতুন ইংগিত
শিৱকুমাৰে বৃহস্পতিবাৰে টুইট কৰি কংগ্ৰেছৰ সভাপতি মল্লিকাৰ্জুন খৰ্গেৰ সৈতে তেওঁ আৰু সিদ্ধাৰমাইয়াৰ এখন ছবি টুইট কৰে। তেওঁ টুইটাৰত লিখিছে, কৰ্ণাটকৰ সুৰক্ষিত ভৱিষ্যত আৰু আমাৰ জনসাধাৰণৰ কল্যাণ আমাৰ সৰ্বোচ্চ অগ্ৰাধিকাৰ। আৰু আমি ইয়াৰ নিশ্চয়তা দিবলৈ একত্ৰিত হৈছো।” কংগ্ৰেছৰ এক সূত্ৰই কয় যে অহা শনিবাৰে নতুন চৰকাৰে শপত গ্ৰহণ কৰিব।
কংগ্ৰেছৰ এক সূত্ৰই পূৰ্বে জনাইছিল যে অৱশেষত কৰ্ণাটকৰ ৰাজস্থান আৰু ছত্তীশগড়ৰ ‘মডেল’ অনুসৰণ কৰিব পাৰে হাইকমাণ্ডে। সিদ্দাৰমাইয়াক মুখ্যমন্ত্ৰী আৰু শিৱকুমাৰক উপ-মুখ্যমন্ত্ৰী পদ দিব পাৰে। সেই ভৱিষ্যদ্বাণী বৃহস্পতিবাৰে সঁচা হ’ল। ইয়াৰ ফলত অৱশ্যে ভৱিষ্যতে ৰাজ্যখনৰ ক্ষমতাৰ নিয়ন্ত্ৰণক লৈ দলৰ ভিতৰত সংঘাতৰ পৰিৱেশ সৃষ্টি হোৱাৰ আশংকাৰো সৃষ্টি হৈছে।
২২৪খন আসনৰ কৰ্ণাটক বিধানসভাত কংগ্ৰেছে ১৩৫খন আসন লাভ কৰিছে। মিত্ৰশক্তিৰ ‘সৰ্বোদয় কৰ্ণাটক পক্ষ’ই ১খন আসনত জয়লাভ কৰে। দেওবাৰে নৱনিৰ্বাচিত কংগ্ৰেছ বিধায়কৰ বৈঠকত খৰ্গেক পৰৱৰ্তী মুখ্যমন্ত্ৰীক মনোনীত কৰাৰ দায়িত্ব দিয়া হৈছিল।
লগতে পঢ়ক:হিমন্ত বিশ্ব শৰ্মাৰ বিৰুদ্ধে মানহানিৰ গোচৰত লিপিবদ্ধ কংগ্ৰেছ নেতাৰ বক্তব্য
ইয়াৰ উপৰিও মহাৰাষ্ট্ৰৰ প্ৰাক্তন মুখ্যমন্ত্ৰী সুশীলকুমাৰ শিণ্ডেৰ নেতৃত্বত ৩ জন কেন্দ্ৰীয় পৰ্যবেক্ষকক মুখ্যমন্ত্ৰী পদৰ বাবে তেওঁলোকৰ ‘পছন্দ’ জানিবলৈ ব্যক্তিগত পৰ্যায়ত বিধায়কৰ সৈতে আলোচনা কৰিবলৈ নিৰ্দেশ দিয়া হৈছিল।
মঙলবাৰে দলটোৰ সৰ্বভাৰতীয় সভাপতিৰ ওচৰত এই প্ৰতিবেদন দাখিল কৰা হয়। এআইচিচিৰ এক সূত্ৰই জনোৱা মতে, গৰিষ্ঠসংখ্যক বিধায়কে সিদ্দাৰামাইয়াকে মুখ্যমন্ত্ৰী হিচাপে বিচাৰিছিল।
