তৰুণ গগৈৰ এসময়ৰ ব্লু আইড বয় দক্ষ মন্ত্ৰী হিমন্ত বিশ্ব শৰ্মা এতিয়া যেন গগৈৰ বাবে হৈ পৰিছে চকুৰ কূটা দাঁতৰ শূল। প্ৰত্যেকখন সংবাদমেলতে গগৈৰ আক্ৰমণৰ লক্ষ্য হৈ পৰে মন্ত্ৰী ড০ হিমন্ত বিশ্ব শৰ্মা।
বিগত সময়ছোৱাৰ পৰা আজি পৰ্য্যন্ত গগৈয়ে সম্বোধন কৰা সংবাদমেলত স্থান পাই আহিছে লুইচ বাৰ্জাৰ আৰু সাৰদা কেলেংকাৰীৰ সৈতে মন্ত্ৰী হিমন্ত বিশ্বৰ সম্পৰ্ক। গগৈৰ পোনপটীয়া অভিযোগ যে হিমন্ত বিশ্ব এই দুই কেলেংকাৰীৰ সৈতে জড়িত।
স্বাভাৱিকতে গগৈয়ে একালৰ নয়নৰ মণিৰ বিৰুদ্ধে বাৰেপতি এনে অভিযোগ উত্থাপন কৰাৰ পাছত প্ৰশ্ন উত্থাপন হয় যে ‘গগৈৰ শাসনৰ কালত এনেবোৰ কেলেংকাৰী হিমন্তই সংঘটিত কৰাৰ পাছতো মুখ্যমন্ত্ৰী হিচাপে গগৈ নিমাত আছিল কিয়?’
আজি পুনৰ সেই সম্পৰ্কে উত্থাপন কৰি গগৈৰ প্ৰশ্ন ‘সাৰদা কেলেংকাৰী মই কৰিব কৈছিলো নেকি? সাৰদাত পইছা খাবলৈ মই কৈছিলো নেকি? লুইছ বাৰ্জাৰত মই পইছা খাব কৈছিলো নেকি?’
তেওঁ আৰু কয় ‘বৰঞ্চ মইহে ক’ব লাগিছিল যে ফাণ্ডৰ কাৰণে কেইটকামান আনা।’
গগৈৰ এই মন্তব্যৰ পাছতে সংবাদমেলত উপস্থিত থকা এগৰাকী সাংবাদিকৰ প্ৰশ্ন ‘গোটেই কেলেংকাৰীসমূহ আপোনাৰ দিনতে হৈছিল গতিকে আপুনিয়ে দায়িত্ব ল’ব লাগিব। আপুনি কিয় মনে মনে আছিল?’
উত্তৰত গগৈয়ে বিজেপিলৈ দোষ থেলি কয় ‘অ মোৰ দিনতে হৈছিল, মইটো নাই হোৱা বুলি কোৱা নাই। বিজেপিয়ে তদন্ত নকৰে কিয়? তদন্ত কৰিবলৈ ভয় কৰি আছে কেলৈ?’
পুনৰ সাংবাদিকগৰাকীৰ প্ৰশ্ন ‘আপুনি সেই সময়ত কিয় ব্যৱস্থা গ্ৰহণ নকৰিলে, মুখ্যমন্ত্ৰী হিচাপে কিয় দায়িত্ব নল’লে?’
‘দায়িত্বত মই আছিলো, কিন্তু এতিয়া বিজেপিয়ে ব্যৱস্থা গ্ৰহণ নকৰিলে কিয়? মই নাই লোৱা বেলেগ কথা। কমপ্লেইন অহাহেঁতেন ল’লোহেঁতেন। কমপ্লেইন বিজেপিয়ে আনিছিল, যদি মোৰ কাৰণে হৈছিল ধৰা। এতিয়ালৈকে তেওঁলোকে এজনো মন্ত্ৰীক ধৰিব পৰা নাই কিয়?’ পুনৰ নিজৰ স্থিতিতে থাকি বিজেপিলৈ দোষ থেলে প্ৰাক্তন মুখ্যমন্ত্ৰীগৰাকীয়ে।
উক্ত সংবাদমেলতে স্বভাৱসূলভ ভাৱে একালৰ নয়নৰ মণি হিমন্ত বিশ্ব শৰ্মাক সমালোচনা কৰি কয় ‘তেওঁ মোক নুসুধি আলফাকো ধন দিছিল। ক’ত কেতিয়া যায় ধৰিবলৈ বৰ টান। হিমন্ত সময় মতে ছালফাও হ’ব, আলফাও হ’ব। কংগ্ৰেছৰ আদৰ্শ এতিয়া বেলেগ হ’ল। জাপ মাৰি দিলে বিজেপিলৈ।’
ইপিনে, হিমন্তই কংগ্ৰেছত থাকোতে গগৈৰ গুণ গান গাই এতিয়া মোদী অমিত শ্বাহৰ গুণ-গান গাবলৈ আৰম্ভ কৰা বুলিও গগৈয়ে কয়।
‘এসময়ত তৰুণ গগৈৰ জয়গান, এতিয়া মোদী শ্বাহ আৰু সৰ্বানন্দৰ জয়গান। মোক যেনেকৈ লেং মাৰিলে, সৰ্বানন্দকো লেং মাৰিবলৈ বেছি দিন নাই। সৰ্বানন্দৰ যিমানে গুণ গাব, সিমানে সৰ্বানন্দ সাৱধান হৈ থকাটো ভাল।’