প্ৰেমত পৰি পৰস্পৰক আপোন কৰি লোৱাৰ বছৰচেৰেক নৌ হওঁতেই স্বামীৰ ক্ৰুৰতাৰ বলি হৈ কৰুণ মৃত্যুক সাৱটিব লগীয়া হ’ল শিৱসাগৰ জিলাৰ আমগুৰিৰ শৰ্মিষ্ঠা চেতিয়া (২৩) নামৰ এগৰাকী যুৱতীয়ে, যিগৰাকীয়ে এৰি গৈছে মৰমৰ ৭ মহীয়া সন্তানক।
অভিযোগ মতে, শৰ্মিষ্ঠাক যোৱা ২৩ এপ্ৰিলত স্বামী ৰিমন গগৈয়ে গাত কেৰাচিন ঢালি জুই লগাই দিছিল। ইয়াৰ পিছতে প্ৰথমে শিৱসাগৰ অসামৰিক চিকিৎসালয়ত আৰু পিছত ডিব্ৰুগড়ৰ অসম চিকিৎসা মহাবিদ্যালয় আৰু চিকিৎসালয়ত চিকিৎসাধীন হৈ আছিল।
আজি দুপৰীয়া মৃত্যুক সাৱটি লোৱা শৰ্মিষ্ঠাই মৃত্যুৰ পূৰ্বে নিজ মুখে কৈ যায় নিজৰ স্বামীৰ নিষ্ঠুৰতা আৰু তেওঁৰ গাত কেৰাচিন ঢালি জুই লগোৱাৰ কথা।
ৰিমন গগৈৰ গাঁও আমগুৰি থানাৰ অন্তৰ্গত বৰাহীবাৰীৰ ডিব্ৰুৱাল বচাশায়েক গাঁৱৰ স্থানীয় লোকে জনোৱা মতে, ৰিমনে পূৰ্বেও শৰ্মিষ্ঠাক প্ৰায়ে মাৰপিট কৰিছিল। ঘটনাৰ দিনা সাতমহীয়া সন্তানটোৰ শুদ্ধি-সবাহ পতাক লৈ প্ৰথমে দুয়োৰ মাজত সাধাৰণ যুক্তিতৰ্ক হৈছিল। পিছত খঙত হিতাহিত জ্ঞান হেৰুওৱা ৰিমনে শৰ্মিষ্ঠাৰ গাত কেৰাচিন ঢালি জুই লগাই দিয়ে। শৰীৰৰ ৭০ শতাংশ অগ্নিদগ্ধ হয় শৰ্মিষ্ঠাৰ।
প্ৰথমে চিকিৎসাধীন পত্নীৰ কাষত ৰিমন আছিল যদিও শৰ্মিষ্ঠাৰ দেউতাকে আমগুৰি থানাত ২৪ এপ্ৰিলত তেওঁৰ কন্যাক হত্যাৰ চেষ্টাৰে জ্বলাই দিয়া বুলি এজাহাৰ দিয়াত চিকিৎসালয়ৰ পৰাই পলায়ন কৰে, অৱশ্যে পিছত যোৱা ১২ মে’ত আমগুৰি থানাত আত্মসমৰ্পণ কৰে। ১৩ মে’ত ৰিমনক জেইললৈ প্ৰেৰণ কৰা হয়। তেওঁৰ বিৰুদ্ধে ভাৰতীয় দণ্ডবিধিৰ ৩০৭ ধাৰা (হত্যাৰ চেষ্টা)ৰ অধীনত এটা গোচৰ ৰুজু হয়।
ইপিনে আজি শৰ্মিষ্ঠাৰ মৃত্যুৰ পিছতে উত্তেজিত হৈ পৰা শৰ্মিষ্ঠাৰ মাকৰ ঘৰৰ পৰিয়ালে স্বামী ৰিমন গগৈৰ ঘৰৰ চোতালতে মৃতদেহটো সৎকাৰৰ ব্যৱস্থা কৰে। এই কথায়ো উত্তপ্ত পৰিস্থিতি সৃষ্টি কৰে, যাৰ ফলত ঘটনাস্থলীত আৰক্ষী, অৰ্ধ-সামৰিক বাহিনী মোতায়েন কৰিব লগীয়া হয়।
ঘটনাটোৱে ছচিয়েল মিডিয়া য়ুজাৰৰ মাজত ক্ষোভৰ উদগিৰণ ঘটোৱা দেখা গৈছে। এসময়ৰ নিজৰ প্ৰিয়তম পুৰুষজনৰ হাততে কৰুণ মৃত্যুক সাৱটা শৰ্মিষ্ঠাক ন্যায় দিয়াৰ বাবে সকলোৱে দাবী তুলিছে।
প্ৰয়াত শৰ্মিষ্ঠা এসময়ত চহিদ পিয়লি ফুকন মহাবিদ্যালয়ৰ ৰাজনীতি বিজ্ঞান বিভাগৰ ছাত্ৰী আছিল।
