ভাৰতীয় ক্ৰিকেটাৰ হাৰ্দিক পাণ্ডিয়া আৰু মুনাফ পেটেল আৰু জ্যেষ্ঠ কংগ্ৰেছ নেতা তথা বিচিচিআইৰ প্ৰাক্তন অধ্যক্ষ ৰাজীৱ শুক্লাৰ বিৰুদ্ধে ধৰ্ষণৰ অভিযোগ উত্থাপন কৰিছে আণ্ডাৰৱৰ্ল্ড গেংষ্টাৰ দাউদ ইব্ৰাহিমৰ সহযোগী ৰিয়াজ ভাটিৰ পত্নীয়ে।
বাতৰি অনুসৰি তেওঁ মুম্বাই আৰক্ষীৰ ওচৰত তেওঁৰ স্বামীৰ বিৰুদ্ধে ধৰ্ষণ আৰু এটা হাই-প্ৰফাইল যৌন ৰেকেট চলাই থকাৰ অভিযোগ উত্থাপন কৰি আবেদন দাখিল কৰিছিল।
ৰেহনুমা ভাটিয়ে অভিযোগ কৰিছে যে তেওঁৰ স্বামী ৰিয়াজ ভাটিয়ে তেওঁক তেওঁৰ ব্যৱসায়িক সহযোগী আৰু অন্যান্য হাই-প্ৰফাইল ব্যক্তিসকলৰ সৈতে যৌন সম্পৰ্ক স্থাপন কৰিবলৈ হেঁচা দিছিল।
যদিও ৰেহনুমাই তেওঁ ধৰ্ষণৰ অভিযোগ উত্থাপন কৰা সকলৰ ঠিকনা আৰু এই ঘটনা সংঘটিত হোৱা নিৰ্দিষ্ট তাৰিখ বা স্থানৰ কথা উল্লেখ কৰা নাই, তেওঁ হাৰ্ডিক পাণ্ডিয়া, মুনাফ পেটেলক আৰু ৰাজীৱ শুক্লাৰ ওপৰত অভিযোগ উত্থাপন কৰিছে।
আনহাতে আৰক্ষীয়ে অভিযুক্তক ৰক্ষণাবেক্ষণ দিছে বুলি অভিযোগ কৰিছে ৰেহনুমাই। সংবাদ মাধ্যমৰ আগত তেওঁ কয়, “মই আৰক্ষীৰ ওচৰত এখন এজাহাৰ পঞ্জীয়ন কৰিবলৈ চেষ্টা কৰিছিলো, কিন্তু তেওঁলোকে কোনো সঁহাৰি নিদিলে। ছেপ্টেম্বৰত মই আবেদন দাখিল কৰিছিলো। এতিয়া ইতিমধ্যে নৱেম্বৰ হৈছে, কিন্তু আৰক্ষীয়ে কোনো ব্যৱস্থা গ্ৰহণ কৰা নাই।”
তেওঁ লগতে অভিযোগ কৰে যে “মই বিভিন্ন স্তৰৰ আৰক্ষী কৰ্তৃপক্ষৰ সৈতে একাধিকবাৰ যুগাযোগ কৰিছো। মোক তেওঁলোকে ইয়াৰ বাবে ধন দাবী কৰিছে, কিন্তু মই কিয় দুৰ্নীতি বিয়পাব লাগে? মই মোৰ ঠাইত ঠিকেই আছোঁ। তেওঁলোকেই অপৰাধী।”
ৰেহনুমাই এই অভিযোগেৰে এখন আবেদন দাখিল কৰা বুলি স্বীকাৰ কৰিছে মুম্বাই আৰক্ষীৰ এজন বিষয়াই। কিন্তু এই বিষয়ত আন কোনো অগ্ৰগতিৰ কথা অস্বীকাৰ কৰে বিষয়াজনে।