কাজিৰঙাৰ ষষ্ঠ সংযোজনৰ পৰা ওলাই অহা এটা বনৰীয়া গোনা ম’হে বিশ্বনাথ চাৰিআলিত দুদিনত দুজনকৈ লোকক হত্যা কৰি সন্ত্ৰাসৰ সৃষ্টি কৰিছে।
কালি বিশ্বনাথৰ মটক গাৱৰ জয়ন্ত দাস নামৰ এজন লোকৰ বনৰীয়া ম’হটোৰ আক্ৰমণত মৃত্যু হৈছিল। ইয়াৰ পিছতে উত্তেজিত ৰাইজে বিশ্বনাথ ঘাটৰ কাজিৰঙা ষষ্ঠ সংযোজনৰ কেন্দ্ৰীয় বনাঞ্চলিক বিষয়াৰ কাৰ্যালয় লণ্ড-ভণ্ড কৰি বন বিভাগৰ এখন বলেৰ’ জ্বলাই দিয়াৰ লগতে কাৰ্যালয়টোৰ কেইবাটাও গৃহ জলাই দিছিল।
এই ঘটনাৰ উত্তেজনা মাৰ নৌযাওতেই আজি পুনৰ পুৱা বিশ্বনাথৰ শলমাৰীৰ চিকু চেণ্টাৰৰ শুকুৰ আলী নামৰ এজন ব্যক্তিক আক্ৰমণ কৰি হত্যা কৰে বনৰীয়া ম’হটোৱে।
ইপিনে, বনৰীয়া ম’হটোৱে গাঁৱখনত সন্ত্ৰাস চলাই মহিদুল ইছলাম, সমত্ত ভানু নামৰ এগৰাকী মহিলা আৰু বুলবুল হুছেইন নামৰ এটা ৬ বছৰীয়া শিশুকো আহত কৰে।
আহত সকলৰ ভিতৰত সমত্ত ভানুৰ অৱস্থা সংকটজনক বুলি জানিব পৰা গৈছে।
ইফালে, দুদিন ধৰি সন্ত্ৰাসৰ সৃষ্টি কৰা বনৰীয়া গোনা ম’হটোক বন বিভাগৰ লোকে নিয়ন্ত্ৰণ কৰিব নোৱাৰি ১ নং আদাভেটিত এখন পথাৰত ঘেৰি ধৰি গুলীয়াই হত্যা কৰে।
প্ৰায় ১৬ জাই গুলী কৰাৰ পিছতহে ম’হটো নিহত হয়।
ম’হটো নিধন হোৱাৰ পিছত বিশ্বনাথৰ ৰাইজে স্বস্তিৰ নিশ্বাস পেলাইছে যদিও পুনৰ কাজিৰঙাৰ ষষ্ঠ সংযোজনৰ পৰা যাতে বনৰীয়া জন্তু ওলাই আহি জনাঞ্চলত সন্ত্ৰাসৰ সৃষ্টি কৰিব নোৱাৰে তাৰ বাবে বন বিভাগক ব্যৱস্থা গ্ৰহণ কৰিবলৈ দাবী জনাইছে স্থানীয় ৰাইজে।
ইফালে মৃত জয়ন্ত দাস আৰু শুকুৰ আলীৰ পৰিয়ালক ক্ষতিপুৰণ দিবলৈও দাবী জনাইছে স্থানীয় ৰাইজে।
