ভয়াৱহ বানৰ পাছতেই এতিয়া বনৰীয়া হাতীৰ ধাৰাবাহিক উপদ্ৰৱে নিদ্ৰাহৰণ কৰিছে চামগুৰিৰ লাওখোৱাবাসী ৰাইজৰ। লাওখোৱা বন্যপ্ৰাণী অভয়াৰণ্যৰ সমীপৰ অঞ্চলসমূহত বিগত কিছুদিন ধৰি বনৰীয়া হাতীয়ে বহুকেইঘৰ লোকৰ ঘৰ-বাৰী নষ্ট কৰিছে।
আজি পুৱতি নিশাও লাওখোৱাৰ দক্ষিণ বেলগুৰিত এটা বনৰীয়া হাতীয়ে দুটাকৈ বাসগৃহ ভাঙি বিধ্বস্ত কৰাৰ লগতে ধ্বংস কৰিলে মজুত কৰি ৰখা বহু খাদ্য-শস্য।
উল্লেখযোগ্য যে, ভয়াবহ বানৰ পাছত সৃষ্টি হোৱা খাদ্য সংকটৰ বাবে বনৰীয়া হাতীটোৱে খাদ্যৰ সন্ধানত সমীপৱৰ্ত্তী লাওখোৱা বন্যপ্ৰাণী অভয়াৰণ্যৰ পৰা ওলাই আহি এইদৰে উপদ্ৰৱ চলোৱা বুলি স্থানীয় ৰাইজে কয়।
আনহাতে বন বিভাগৰ নিৰ্লিপ্ততাৰ লগতে বৃহত্তৰ অঞ্চলটোত অনিয়মীয়া বিদ্যুৎ কৰ্তনৰ ফলতেই এনেদৰে হাতীয়ে উপদ্ৰৱ চলাবলৈ সুবিধা পোৱা বুলি অভিযোগ কৰি ভুক্তভোগী পৰিয়াল কেইটাই সংবাদ মাধ্যমৰ আগত তীব্ৰ ক্ষোভ উজাৰিছে।