কলিয়াবৰ মহকুমাৰ হাতীমূৰাৰ টেঙাবাৰীৰ ব্ৰহ্মপুত্ৰৰ কাষত আজি যোৱা প্ৰায় তিনিবছৰ ধৰি অঞ্চলটোত থিতাপি লৈ গাঁৱৰ ৰাইজৰ চিনাকি হৈ পৰা এটা বনৰীয়া দঁতাল হাতীৰ মৃত্যু ঘটে।
স্থানীয় ৰাইজে জানিবলৈ দিয়া মতে শিলঘাট, হাতীমূৰা অঞ্চলত কাৰো ক্ষতি নকৰাকৈয়ে স্থানীয় বাসিন্দাৰ সৈতে হাতীটোৱে বহু বছৰে সহৱস্থান কৰি আহিছিল।
অৱশ্যে যোৱা কিছু দিনৰপৰা অসুস্থ হৈ থকা বনৰীয়া হাতীটোক বনবিভাগৰ এটা দলে চিকিৎসাৰ ব্যৱস্থা কৰিছিল যদিও বিশেষ সফল নোহোৱাত হাতীটোৰ দিনক-দিনে স্বাস্থ্যৰ অৱনতি হৈ আহিছিল।
আনহাতে আজি স্থানীয় ৰাইজৰ সহযোগত বন বিভাগৰ এটা দলে অসুস্থ হাতীটোৰ চিকিৎসাৰ বাবে কাজিৰঙাৰ পৰা চিকিৎসকৰ এটা দল আনি হাতীটোৰ কাষত উপস্থিত হৈছিল যদিও চিকিৎসা কৰাৰ পূৰ্বেই হাতীটোৰ মৃত্যু ঘটে। নিহত হাতীটো বহু দিনৰ পৰা যকৃত ৰোগত আক্রান্ত হৈ আছিল বুলি মৰণোত্তৰ পৰীক্ষাৰ অন্তত চিকিৎসকে জানিবলৈ দিয়ে।
হাতীটোৰ মৃত্যুত স্থানীয় ৰাইজে দুখ প্ৰকাশ কৰাৰ লগতে ধূপ, দ্বীপ, ফুল চটিয়াই হাতীটোক শেষ বিদায় জনাই আৰু ইয়াৰ পাছতে বনবিভাগে হাতীটো পোতাৰ ব্যৱস্থা গ্ৰহণ কৰে।
