ডিগবৈ বন সংমণ্ডলৰ অধীনৰ জাগুনত বনৰীয়া হাতীৰ অবিৰত তাণ্ডৱে বৃহত্তৰ অঞ্চলৰ ৰাইজৰ নিদ্ৰাহৰণ কৰিছে৷ উল্লেখযোগ্য যে চোৰাং কাঠ ব্যৱসায়ীৰ দৌৰাত্ম্যত খাদ্যৰ সন্ধানত বনাঞ্চলৰ পৰা ওলাই অহা বন্যহস্তীৰ জাকে কালি পুৱা অৰ্থাৎ ৬ জানুৱাৰিত জাগুনৰ কঠা চেমা গাঁৱৰ বুধিমান ছেত্ৰীৰ লগতে আন এজন ব্যক্তিৰ বাসগৃহ ভাঙি লণ্ডভণ্ড কৰাৰ লগতে খেতিৰ পৰা আনি জমা কৰি ৰখা ধান খাই তহিলং কৰে।
তদুপৰি বন্যহস্তীৰ আক্ৰমণৰ পৰা পৰিয়াল দুটাৰ সদস্য সকলে কোনোমতে নিজৰ প্ৰাণ ৰক্ষা কৰিবলৈ সক্ষম হয়। উক্ত অঞ্চলটোত বিগত সময়ত বনৰীয়া হাতীৰ আক্ৰমণত কেইবাজনো লোক নিহত হোৱাৰ লগতে অৰ্ধশতাধিক বাসগৃহ ভাঙি লণ্ডভণ্ড কৰিছে।
গতিকে স্থানীয় ৰাইজে এই ক্ষেত্ৰত প্ৰশাসনক যথোচিত পদক্ষেপ গ্ৰহণ কৰিবলৈ দাবী জনাইছে।
