ৰাজ্যত পুনৰ বৃদ্ধি পাবলৈ ধৰিছে হাতী-মানুহৰ সংঘাত। ক’ৰ’নাৰ লগতে বানে হোজাই জিলাত আতংকিত কৰাৰ সমতে এইবাৰ হাতীৰ জাকে অঞ্চলবাসীৰ চিন্তা বৃদ্ধি কৰিছে।
জানিব পৰা মতে সোমবাৰে হোজাইৰ দীঘলবাৰী সংৰক্ষিত বনাঞ্চলৰ পৰা এটা বনৰীয়া হাতীৰ জাকে খাদ্যৰ সন্ধানত ওলাই আহি অঞ্চলটোত উপদ্ৰৱ চলায়।
হাতীৰ জাকটোৱে হোজাইৰ দীঘলবাৰী গাঁৱৰ মৌচুমী হাচাম, জিতেশ্বৰ হাচাম আৰু জ্যোতিকা কুৰ্মীৰ ঘৰ ভাঙি লণ্ড ভণ্ড কৰে।
‘এই ঘটনাটো ৰাতিপুৱা প্ৰায় ৩ মান বজাত সংঘটিত হৈছে। বনৰীয়া হাতীৰ এটা জাকে হঠাৎ আক্ৰমণ কৰে। লগে লগে ওচৰ চুবুৰীয়াৰ লোকে আমাক উদ্ধাৰ কৰে যদিও ঘৰটো লণ্ডভণ্ড কৰে’, জ্যোতিকা কুৰ্মীয়ে এইদৰে কয়।
তেওঁ লগতে কয়, ‘এতিয়া আমাৰ হাতত খাবলৈও একো নাই আৰু চালিও নাই। বছৰৰ তৃতীয়টো বান, হাতীৰ আক্ৰমণে আমাক শেষ কৰি পেলালে। চৰকাৰে শীঘ্ৰে সাহায্য প্ৰদান কৰিব লাগে’।
‘বানৰ বাবে বনৰীয়া হাতী সমূহে খাদ্যৰ অভাৱত ভুগিছে যাৰ বাবে খাদ্যৰ সন্ধানত লোকালয়লৈ আহি উপদ্ৰৱ চলাইছে’, এজন গাঁওবাসীয়ে এই মন্তব্য কৰে।
ইফালে গাঁওবাসীয়ে অভিযোগ কৰা মতে বন বিভাগে হাতী-মানুহৰ সংঘাত দূৰ কৰাৰ ক্ষেত্ৰত কোনো পদক্ষেপ গ্ৰহণ নকৰাৰ লগতে ৰাইজৰ অভাৱ অভিযোগো গুৰুত্বসহকাৰে নলয়।
