বন বিভাগৰ অকৰ্মণ্যতা-অচেতনাৰ বাবে বনৰীয়া হাতীৰ জাকে ৰাজ্যৰ বিভিন্ন অঞ্চলত তাণ্ডৱ অব্যাহত ৰখাৰ সমান্তৰালকৈ এইবাৰ চামগুৰিৰ সমীপৱৰ্তি চাপানালাত বনৰীয়া হাতীৰ মুকলি বিচৰণে নিদ্ৰাহৰণ কৰিছে অঞ্চলবাসী ৰাইজৰ।
বালিজুৰি-কাজিৰঙা গাঁৱৰ মূল হস্তী দণ্ডীটোৰে বনৰীয়া হাতীৰ জাকটোৱে প্ৰৱেশ কৰি অঞ্চলটোৰ খেতি পথাৰ বিনষ্ট কৰাত এতিয়া মূৰে কপালে হাত দিব লগীয়া হৈছে কৃষক সকল।
হাতীৰ জাকটোক খেদি পঠিয়াবলৈ চাপানালা খণ্ড বন বিষয়াৰ কাৰ্যালয়ৰ বনৰক্ষীয়ে দোভাগৰাতি পৰ্য্যন্ত বালিজুৰি-কাজিৰঙাত পহৰা দিয়ে যদিও খেদি পঠিওৱাত ব্যৰ্থ হয়।
আনহাতে সদ্যজাত পোৱালি থকাৰ বাবেই বেছি দূৰ পৰিভ্ৰমণ কৰিব নোৱাৰি জাকটোৱে উক্ত অঞ্চলটোতে বিচৰণ কৰি থকাৰ সন্দেহ প্ৰকাশ কৰিছে স্থানীয় ৰাইজে।
উল্লেখ্য যে চামগুৰিত হাতীৰ মুক্ত বিচৰণৰ বিপৰীতে মঙলবাৰৰ দিনটোত গোৱালপাৰা জিলাৰ বিভিন্ন প্ৰান্তত সংঘটিত হাতীৰ আক্ৰমণত পাঁচজন লোকে প্ৰাণ হেৰুৱাব লগীয়া হয়। ৰাজ্য চৰকাৰে হাতীৰ আক্ৰমণত প্ৰাণ হেৰুওৱা সকলৰ পৰিয়াল বৰ্গলৈ ৪ লাখ টকাকৈ আৰ্থিক সাহায্য প্ৰদানৰ কথা ঘোষণা কৰিছে।