গোৱালপাৰা জিলাত অব্যাহত আছে বন্যহস্তীৰ সন্ত্ৰাস ।
যোৱা নিশা ৰংজুলি ৰাজহ চক্ৰৰ অন্তৰ্গত কাহিবাৰীত প্ৰায় ৩০-৩৫ জনীয়া বৃহৎ বন্যহস্তীৰ জাকে বনাঞ্চলৰ পৰা খাদ্যৰ সন্ধানত জনাঞ্চলত প্ৰৱেশ কৰে ।
গাঁৱত প্ৰৱেশ কৰিয়ে আৰম্ভ কৰে তাণ্ডৱলীলা ৷
নিশা দুই মান বজাত বৰষুণ দি থকাৰ মাজতে বৃহৎ হাতীৰ জাক টোৱে গাঁও খনৰ কেইবাটাও পৰিয়ালৰ কঁঠাল আৰু কল গছ খোৱাৰ লগতে তামোল গছ, নাৰিকল গছকে আদি কৰি বিভিন্ন গছ-গছনি ভাঙি ছাৰখাৰ কৰে ।
তাতে ক্ষান্ত নাথাকি পৰিয়াল দুটাৰ ঘৰ-দুৱাৰ ভাঙি লণ্ডভণ্ড কৰাৰ লগতে ঘৰৰ ভিতৰত থকা আচ-বাব পত্ৰ ভাঙিও বিস্তৰ ক্ষতি সাধন কৰে ।
তদুপৰি ঘৰৰ ভিতৰত থকা ধান-চাউল খাই তহিলং কৰে ।
ইপিনে পৰিয়ালৰ লোক সকলে কোনো মতে ঘৰৰ পৰা ওলাই দৌৰি পলায় আৰু কথমপি প্ৰাণ ৰক্ষা কৰে ।
গোটেই নিশা তেওঁ লোক উজাগৰে থাকিবলগীয়া হয় ।
