হাতী-মানুহৰ সংঘাতে বিধ্বস্ত কৰা গোৱালপাৰা জিলাত এতিয়া কেৱল হাহাকাৰ৷ প্ৰতি নিশাই বন্য হস্তীয়ে বহু পৰিয়ালৰ ঘৰ দুৱাৰ ভাঙি তহিলং কৰিছে৷
যাৰ পৰিপ্ৰেক্ষিতত স্থানীয় পৰিয়ালবোৰে ঘৰ-দুৱাৰ হেৰুৱাই মুকলি আকাশৰ তলত আশ্ৰয় ল’ব লগা পৰিবেশৰ সৃষ্টি হৈছে৷
যোৱা নিশাও জিলাখনৰ কৃষ্ণাই আঞ্চলিক বন বিভাগৰ অন্তৰ্গত মোলানডুবি ৰায়পুৰ গাৱঁত এটা দৰিদ্ৰ পৰিয়াল গৃহহাৰা হ’বলগীয়া হৈছে বনৰীয়া হাতীৰ আক্ৰমণত৷
নিশা শুই থকা অৱস্থাত প্ৰায় ৩ বজাত এজাক বনৰীয়া হাতীয়ে আক্ৰমণ চলাই পৰিয়ালটোৰ ঘৰ দুৱাৰ চূৰমাৰ কৰে৷
এই আক্ৰমণত কথমপি ৰক্ষা পৰে পৰিয়ালটোৰ শাৰীৰিক ভাৱে অসুস্থ এজন লোক৷ হাতীৰ আক্ৰমণৰ সময়ত ঘৰৰ ভিতৰত আবদ্ধ হৈ পৰা লোকজনে বিচনাৰ তলত লুকাই কোনোমতে নিজৰ প্ৰাণ ৰক্ষা কৰে৷
অৱশ্যে পৰিয়ালৰ অন্যান্য সদস্য সকল পলাই যাবলৈ সক্ষম হয়৷
হাতীৰ জাকটোৱে পৰিয়ালটোৰ প্ৰায় ২০ মোন ধান নষ্ট কৰে বুলি জানিবলৈ দিয়ে৷ চৰকাৰ তথা বন বিভাগৰ পৰা পৰ্যাপ্ত সাহায্য বাঞ্চা কৰিছে হাতীৰ আক্ৰমণত গৃহহাৰা হোৱা পৰিয়ালটোৱে৷