দেশত সম্প্ৰতি সাম্প্ৰদায়িক বিদ্বেষৰ এক উদ্বেগজনক পৰিস্থিতিৰ উদ্ভৱ হৈছে বুলি ব্যাপক ৰূপত চৰ্চা চলিছে। বিশেষকৈ হিন্দুত্ববাদৰ আধাৰত কেন্দ্ৰৰ শাসনাধিষ্ঠ বিজেপি চৰকাৰৰ আশীৰ্বাদপুষ্ট হৈ এচাম উগ্ৰ ধৰ্মীয় মৌলবাদীয়ে দেশত সাম্প্ৰদায়িক অসহিষ্ণু পৰিৱেশৰ সৃষ্টি কৰিছে বুলি অভিযোগ কৰিছে সচেতন মহলে।
দেশৰ এনে চৰ্চিত অসহিষ্ণু পৰিৱেশৰ শেহতীয়া এক উদাহৰণ পোৱা গৈছে বিজেপি সাংসদ প্ৰতাপ সিমহাৰ মন্তব্যত। কৰ্ণাটকৰ এই সাংসদগৰাকীয়ে ৰাজ্যখনৰ মাইচুৰু-উটি ৰোডত থকা মছজিদ সদৃশ এটা বাছ ষ্টেণ্ড বুলড’জাৰেৰে ভাঙি পেলোৱাৰ হুংকাৰ দিছে।
কেৱল মাত্ৰ মছজিদৰ আকৃতিৰে নিৰ্মাণ কৰাৰ বাবেই প্ৰতাপ সিমহাই এই বাছ ষ্টেণ্ডটো বুলড’জাৰেৰে ধ্বংস কৰাৰ ভাবুকি দিছে।
সাংসদ সিমহাই কয়, “মই এই বাছ ষ্টেণ্ডটো ছ’চিয়েল মিডিয়াত দেখিছো। বাছ ষ্টেণ্ডটোত দুটা গম্বুজ আছে। ষ্টেণ্ডৰ মাজত এটা ডাঙৰ আৰু তাৰ কাষত এটা সৰু গম্বুজ আছে। সেয়া কেৱল এটা মছজিদহে হ’ব পাৰে।”
“মই অভিযন্তাসকলক তিনি-চাৰি দিনৰ ভিতৰত এই বাছ ষ্টেণ্ডটো ভাঙিবলৈ নিৰ্দেশ দিছো। যদি তেওঁলোকে এই নিৰ্দেশ পালন নকৰে, মই নিজেই এখন জেচিবি লৈ এই ষ্টেণ্ডটো ধ্বংস কৰিম।”
বিজেপি সাংসদগৰাকীৰ এই মন্তব্যই সম্প্ৰতি ব্যাপক প্ৰতিক্ৰিয়াৰ সৃষ্টি কৈছে। ৰাজ্যখনৰ প্ৰদেশ কংগ্ৰেছে সাংসদ সিমহাৰ এই মন্তব্যক সমালোচনা কৰিছে।
কৰ্ণাটক কংগ্ৰেছৰ মুৰব্বী চেলিম আহমেদে এক বিবৃতিত এয়া মাইচুৰৰ সাংসদ সিমহাৰ মূৰ্খতাপূৰ্ণ মন্তব্য বুলি অভিহিত কৰিছে। সাংসদ সিমহাই গম্বুজ থকা চৰকাৰী কাৰ্যালয়বোৰো ভাঙি পেলাব নেকি বুলি প্ৰশ্ন উত্থাপন কৰিছে আহমেদে।