দেশৰ জনসাধাৰণৰ মূৰত ৰামটাঙোন সোধাই কেন্দ্ৰীয় চৰকাৰে বুধবাৰে পুনৰ বৃদ্ধি কৰে ৰন্ধন গেছৰ মূল্য। শাসনাধিষ্ঠ বিজেপি চৰকাৰে আজি ঘৰুৱা ৰন্ধন গেছৰ চিলিণ্ডাৰৰ মূল্য ৫০ টকাকৈ আৰু বাণিজ্যিক চিলিণ্ডাৰৰ মূল্য ৩৫০.৫০ টকাকৈ বৃদ্ধি কৰে। বিজেপি চৰকাৰৰ এই সিদ্ধান্তক ক্ষুৰধাৰ সমালোচনা কৰিছে দেশৰ প্ৰধান বিৰোধী দল কংগ্ৰেছে।
গেছ চিলিণ্ডাৰৰ মূল্য বৃদ্ধি কৰি মোদী চৰকাৰে দেশৰ জনসাধাৰণক হোলীৰ উপহাৰ দিয়া বুলি কটাক্ষ কৰে কংগ্ৰেছে। বিজেপি চৰকাৰে এইদৰে জনসাধাৰণক লুণ্ঠন চলোৱা বুলি অভিযোগ কৰি কংগ্ৰেছে ক্ষমতালৈ আহিলে বিজেপিৰ লুণ্ঠন বন্ধ কৰি ৫০০ টকাতে ৰন্ধন গেছ দিয়াৰ প্ৰতিশ্ৰুতি দিছে।
দলটোৰ মুখপাত্ৰ গৌৰৱ ভল্লাই কংগ্ৰেছ পুনৰ ক্ষমতালৈ আহিলে এই লুণ্ঠন বন্ধ হ’ব বুলি মন্তব্য কৰে। ভল্লাই কয়, “মোদী চৰকাৰে এল পি জিৰ মূল্য বৃদ্ধি কৰি হোলীৰ উপহাৰ দিছে। কেন্দ্রত কংগ্ৰেছ পুনৰ ক্ষমতালৈ আহিলে ৫০০ টকাৰ মূল্যত সাধাৰণ মানুহক গেছ দিয়া হ’ব।”
ৰাজস্থানৰ কংগ্ৰেছ চৰকাৰে ইতিমধ্যে ৫০০ টকাত গেছ চিলিণ্ডাৰ দিয়াৰ ব্যৱস্থা আৰম্ভ কৰিছে বুলি উল্লেখ কৰি ভল্লাই মোদী চৰকাৰে ৰাজস্থান চৰকাৰৰ পৰা এই শিক্ষা ল’ব পাৰে বুলি পৰামৰ্শ আগবঢ়ায়। তেওঁ লগতে অত্যধিক কৰ আৰোপ কৰি জনসাধাৰণৰ ওপৰত চলোৱা লুণ্ঠন বন্ধ কৰিবলৈ দাবী জনায় কেন্দ্ৰীয় চৰকাৰক।
ইফালে কংগ্ৰেছ নেত্ৰী প্ৰিয়ংকা গান্ধীয়ে কেন্দ্ৰীয় চৰকাৰক আক্ৰমণ কৰি কয় যে ২০১৪ চনৰ পৰা গেছৰ মূল্য ২৭৫ শতাংশ বৃদ্ধি পাইছে। “কংগ্ৰেছৰ দিনত চিলিণ্ডাৰৰ দাম আছিল ৪০০ টকা। এতিয়া ৰাজস্থান চৰকাৰে মাত্ৰ ৫০০ টকাত গেছ দিছে। তেওঁৰ চৰকাৰে কিয় এনেকৈ মানুহক লুটপাত কৰিছে সেই প্ৰশ্নৰ উত্তৰ প্ৰধানমন্ত্ৰীয়ে দিব লাগিব।”— গান্ধীয়ে কয়।
গেছ চিলিণ্ডাৰৰ মূল্য বৃদ্ধিৰ পিছতে কংগ্ৰেছৰ সভাপতি মল্লিকাৰ্জুন খৰ্গেয়েও এক টুইট যোগে বিজেপিক সমালোচনা কৰে। “ৰাইজে জানিব বিচাৰে, হোলীৰ বিশেষ খাদ্য কেনেকৈ বনাব? কিমান দিনলৈ এই ডকাইতি চলিব? মোদী চৰকাৰে সৃষ্টি কৰা মূল্যবৃদ্ধিৰ ফলত সাধাৰণ জনতাই ক্ষতিগ্ৰস্ত হৈছে।”— টুইটটোত খৰ্গেই কয়।
প্ৰসংগক্ৰমে উল্লেখ কৰিব পাৰি যে, ২০১১ চনত তদানীন্তন কংগ্ৰেছ চৰকাৰে গেছৰ মূল্য ৫০ টকা বৃদ্ধি কৰিছিল। সেই সময়ৰ বিৰোধী দল বিজেপিয়ে কংগ্ৰেছ চৰকাৰৰ এই সিদ্ধান্তক তীব্ৰ সমালোচনা কৰিছিল। বিজেপি নেত্ৰী তথা বৰ্তমানৰ কেন্দ্ৰীয় মন্ত্ৰী স্মৃতি ইৰাণীয়ে সেই সময়ত প্ৰতীকি প্ৰতিবাদো সাব্যস্ত কৰিছিল। বুধবাৰে মূল্যবৃদ্ধিৰ পিছত কংগ্ৰেছে স্মৃতি ইৰাণী এতিয়া কিয় মৌন হৈ আছে বুলি কটাক্ষ কৰে।