চমু চাপিছে ২৪ ৰ লোকসভা নিৰ্বাচন। দিল্লীৰ মচনদ দখলৰ লক্ষ্যৰে শাসক-বিৰোধী উভয়েই ৰাজনৈতিক অংক সমাধানৰ যো-জা চলাইছে যদিও বিৰোধীৰ অংকত আউল লগাই বৃহস্পতিবাৰে এক বৃহৎ ঘোষণা কৰিছে তৃণমূল কংগ্ৰেছৰ মুৰব্বী তথা পশ্চিম বংগৰ মুখ্যমন্ত্ৰী মমতা বেনাৰ্জীয়ে।
ঐক্যবদ্ধ বিৰোধীৰ বাবে কিছুদিন পূৰ্বলৈকে সক্ৰিয় হৈ থকা মমতা বেনাৰ্জীয়ে বিৰোধী মহাজোঁটৰ আশা ত্যাগ কৰি অকলেই ২৪ ৰ লোকসভা নিৰ্বাচনী ৰণত নমাৰ মনস্থ কৰিছে। লোকসভা নিৰ্বাচনত তৃণমূলে ৰাইজৰ সমৰ্থনত অকলেই যুঁজিব বুলি ঘোষণা কৰিছে দলটোৰ মুৰব্বী বেনাৰ্জীয়ে।
বৃহস্পতিবাৰে এক বিবৃতি যোগে মমতা বেনাৰ্জীয়ে ২০২৪ চনত তৃণমূল আৰু জনসাধাৰণৰ মাজত মিত্ৰতা দেখিবলৈ পোৱা যাব বুলি মন্তব্য কৰে। বিৰোধী শক্তিৰ সৈতে লগ হোৱাৰ সম্ভাৱনা নাকচ কৰি কয়, “আমি আন কোনো ৰাজনৈতিক দলৰ সৈতে নাযাওঁ। আমি জনসাধাৰণৰ সমৰ্থনত অকলে যুঁজিম।”
“যিসকলে বিজেপিক পৰাস্ত কৰিব বিচাৰে, তেওঁলোকে আমাক ভোট দিব বুলি মোৰ বিশ্বাস। একে সময়তে মই বিশ্বাস কৰোঁ যে চিপিআই (এম) আৰু কংগ্ৰেছক ভোট দিয়াসকলে আচলতে বিজেপিক ভোট দিছে। এই সত্য আজি পোহৰলৈ আহিছে।”— বেনাৰ্জীয়ে লগতে কয়।
উল্লেখ্য যে, পশ্চিম বংগৰ বিগত বিধানসভা নিৰ্বাচনত বিজেপিক পৰাস্ত কৰাৰ পাছতে ৰাষ্ট্ৰীয় ৰাজনীতিত প্ৰৱেশ কৰিছিল তৃণমূলে। অহা বৰ্ষত হ’বলগীয়া লোকসভা নিৰ্বাচনৰ বাবে তেতিয়াৰ পৰাই বিৰোধীৰ ঐক্যৰ যো-জা চলাইছিল মমতা বেনাৰ্জীয়ে।
অৱশ্যে এই লক্ষ্যত বিফল হ’লেও তেওঁ তৃণমূল কংগ্ৰেছক কেইবাখনো ৰাজ্যৰ ৰাজনীতিত প্রৱেশ ঘটাইছিল। বৃহস্পতিবাৰে ঘোষিত মেঘালয় নিৰ্বাচনতো প্ৰথমবাৰৰ বাবে অৱতীৰ্ণ হৈ তৃণমূলে ৫ খন আসনত জয়লাভ কৰিবলৈ সক্ষম হয়।
