ভাৰতীয় ক্ৰিকেট দলৰ তাৰকা বেটছমেন বিৰাট কোহলীয়ে এক ডাঙৰ ঘোষণা কৰিছে। শেহতীয়াকৈ তেওঁ জনাইছে যে ২০২৭ চনত অনুষ্ঠিত হ‘বলগীয়া এদিনীয়া বিশ্বকাপেই হ‘ব ভাৰতৰ হৈ তেওঁৰ শেষ বিশ্বকাপ।
ইতিমধ্যে টেষ্ট আৰু টি-টুৱেণ্টি ক্ৰিকেটৰ পৰা অৱসৰ গ্ৰহণ কৰা কোহলীয়ে বৰ্তমান কেৱল এদিনীয়া ক্ৰিকেটতহে ভাৰতক প্ৰতিনিধিত্ব কৰি আছে। ৩৭ বছৰীয়া এইগৰাকী মহান খেলুৱৈয়ে এদিনীয়া ক্ৰিকেটত ৫৪ টা শতক অৰ্জন কৰিছে আৰু শচীন তেণ্ডুলকাৰৰ ১৮,৪২৬ ৰাণৰ পিছতেই ১৪,৯৪১ ৰাণেৰে বিশ্বৰ ভিতৰতে দ্বিতীয় স্থানত আছে।
২০১১ চনত নিজৰ দেশত বিশ্বকাপ জয়ৰ সোৱাদ পোৱা কোহলীয়ে ২০২৩ চনৰ ফাইনেলত অষ্ট্ৰেলিয়াৰ হাতত পৰাজয়ৰ সন্মুখীন হ‘বলগীয়া হৈছিল।
অহা ২০২৭ চনৰ অক্টোবৰ আৰু নৱেম্বৰ মাহত দক্ষিণ আফ্ৰিকা, জিম্বাবৱে আৰু নামিবিয়াই যুটীয়াভাৱে এই বিশ্বকাপ আয়োজন কৰিব, যিখন কোহলীৰ কেৰিয়াৰৰ পঞ্চমখন বিশ্বকাপ হ‘ব। সম্প্ৰচাৰকাৰী প্ৰতিষ্ঠান জিঅ‘ ষ্টাৰৰ আগত শনিবাৰে কোহলীয়ে কয় যে ভাৰতৰ হৈ এইখনেই তেওঁৰ অন্তিম বিশ্বকাপ হ‘ব আৰু এয়াই তেওঁৰ বাবে আটাইতকৈ ডাঙৰ প্ৰেৰণা। খেলপথাৰত নিজৰ সৰ্বস্ব উজাৰি দিবলৈ তেওঁ প্ৰস্তুত বুলিও জানিবলৈ দিয়ে। তেওঁৰ একমাত্ৰ লক্ষ্য হৈছে বিশ্বকাপ জয় কৰা আৰু ইয়াৰ বাবে প্ৰয়োজন হোৱা সকলো ত্যাগ স্বীকাৰ কৰিবলৈ তেওঁ সম্পূৰ্ণ সাজু।
পঞ্চাশ অভাৰৰ বিশ্বকাপক ক্ৰিকেটৰ অন্যতম কঠিন প্ৰত্যাহ্বান বুলি অভিহিত কৰি কোহলীয়ে কয় যে বিদেশৰ মাটিত খেলিবলগীয়া হোৱাৰ বাবে ই আৰু অধিক প্ৰত্যাহ্বানজনক হ‘ব। তেওঁৰ মতে, এখন এদিনীয়া খেলৰ তীব্ৰতা টি-টুৱেণ্টি ক্ৰিকেটৰ দৰেই, কিন্তু ইয়াত এদিনতে প্ৰায় আঢ়ৈখন টি-টুৱেণ্টি খেলৰ সমান কষ্ট কৰিবলগীয়া হয়। এনে এখন ডাঙৰ প্ৰতিযোগিতাত ক্ৰমাগতভাৱে দহখন খেলত একেই শক্তি আৰু তীব্ৰতা বজাই ৰখাটো সঁচাকৈয়ে এক ডাঙৰ কথা আৰু ই খেলুৱৈ এজনৰ পৰা বহুতখিনি শক্তি কাঢ়ি নিয়ে বুলি তেওঁ উল্লেখ কৰে।
আনহাতে, বৰ্তমান কেৱল এদিনীয়া ক্ৰিকেট খেলা ভাৰতীয় দলৰ প্ৰাক্তন অধিনায়ক ৰোহিত শৰ্মায়ো আগন্তুক বিশ্বকাপক লৈ নিজৰ অপৰিসীম আগ্ৰহ প্ৰকাশ কৰিছে। তেওঁ কয় যে ক্ৰিকেটৰ পৰা তেওঁৰ কাম শেষ হৈছে বুলি তেওঁ কেতিয়াও ভবা নাই। যিমান দিনলৈকে খেলি থাকিব, সিমান দিনলৈকে সন্মুখত নতুন লক্ষ্য থাকিব আৰু তেওঁ বিশ্বকাপলৈ আগ্ৰহেৰে বাট চাই আছে।
ইফালে, ৱেষ্ট ইণ্ডিজৰ বিৰুদ্ধে হ‘বলগীয়া তিনিখনীয়া এদিনীয়া শৃংখলাৰ বাবে ভাৰতীয় দলত কোহলী আৰু ৰোহিত দুয়োকে অন্তৰ্ভুক্ত কৰা হৈছে। অহা দেওবাৰে তিৰুৱনন্তপুৰমত এই শৃংখলাৰ প্ৰথমখন খেল অনুষ্ঠিত হ‘ব।
