নাগৰিকত্ব সংশোধনী আইন (CAA) এক বাস্তৱিক আইন আৰু ক’ভিদ পৰিস্থিতিৰ অৱসান ঘটাৰ লগে লগে ইয়াক কাৰ্যকৰী কৰা হ’ব। কেন্দ্ৰীয় গৃহ মন্ত্ৰী অমিত শ্বাহে আজি বংগত বিতৰ্কিত নাগৰিকত্ব আইন সন্দৰ্ভত এই হুংকাৰ প্ৰদান কৰিছে।
উত্তৰ বংগৰ শিলিগুৰিত এখন ৰাজহুৱা সভা সম্বোধন কৰি অমিত শ্বাহে বংগৰ মুখ্যমন্ত্ৰী মমতা বেনাৰ্জীয়ে নাগৰিকত্ব আইন বলবৎ নহয় বুলি মন্তব্য কৰি উৰাবাতৰি বিয়পাইছে বুলি অভিযোগ কৰে।
“মই স্পষ্ট কৰিব বিচাৰো যে তৃণমূল কংগ্ৰেছে CAA কাৰ্যকৰী নহ’ব বুলি উৰাবাতৰি বিয়পাই আছে। মই ক’ব বিচাৰো যে ক’ভিদ ঢৌ শেষ হোৱাৰ লগে লগে আমি দেশত CAA কাৰ্যকৰী কৰিম।” অমিত শ্বাহে কয়।
CAA বলৱৎ কৰাৰ ক্ষেত্ৰত তৃণমূল কংগ্ৰেছে কোনো বাধা প্ৰদান কৰিব নোৱাৰে বুলিও গৃহমন্ত্ৰী শ্বাহে একপ্ৰকাৰ প্ৰত্যাহ্বান জনায়।
উল্লেখ্য যে ২০১৯ চনৰ শেষৰ ফালে আৰু ২০২০ চনৰ আৰম্ভণিতে দেশৰ বহু প্ৰান্ততে নাগৰিকত্ব সংশোধনী আইনৰ বিৰুদ্ধে ব্যাপক প্ৰতিবাদৰ সৃষ্টি হৈছিল।
CAA ৰ বিৰুদ্ধে অসমতো এক তীব্ৰ জনজাগৰণৰ সৃষ্টি হৈছিল। CAA বিৰোধী প্ৰতিবাদী আন্দোলনত সেনা বাহিনীৰ গুলীত নিহত হৈছিল ৫ জনকৈ অসমীয়া যুৱক।
কেৱল এইবাৰেই নহয়, গৃহমন্ত্ৰী অমিত শ্বাহে কেইবাবাৰো ৰাজহুৱাকৈ CAA শীঘ্ৰেই বলৱৎ কৰা হ’ব বুলি হুংকাৰ দি আহিছে।
হিন্দুত্ববাদৰ ৰাজনীতিৰে দেশৰ মছনদ দখল কৰা বিজেপিয়ে CAA ৰ কাৰ্যকৰীতা নিজৰ অন্যতম নিৰ্বাচনী ইচ্ছ্যু হিচাপে প্ৰকাশ কৰিছিল।