ভাৰতীয় ক্ৰিকেট দলৰ পৰৱৰ্তী প্ৰশিক্ষক নিৰ্বাচনৰ ক্ষেত্ৰত কপিল দেৱৰ নেতৃত্বৰ তদৰ্থ সমিতিয়ে যদি উচ্চতম ন্যায়ালয়ৰ অনুমতি পায়, তেতিয়াহ’লে এইক্ষেত্ৰত অধিনায়ক বিৰাট কোহলীৰ কোনোধৰণৰ মতামত নাথাকিব। সংবাদ মাধ্যমত প্ৰকাশিত বাতৰিৰ পৰা এইকথা জানিব পৰা গৈছে।
বিচিচিআইৰ এজন কৰ্মকৰ্তাই জানিবলৈ দিছে, ‘’যোৱাবাৰ প্ৰশিক্ষক নিৰ্বাচনৰ সময়ত অধিনায়ক কোহলীয়ে জনাইছিল যে প্ৰাক্তন প্ৰশিক্ষক অনিল কুম্বলেক লৈ তেওঁৰ তথা দলৰ সমস্যা আছে। পিচে, এইবাৰ নতুন প্ৰশিক্ষক নিৰ্বাচনৰ সন্দৰ্ভত অধিনায়কৰ কোনো মতামত নাথাকিব। এইবাৰ প্ৰশিক্ষক নিৰ্বাচন সমিতিত কপিল দেৱ আছে। তেওঁ কোহলীৰ কথা নুশুনিব।‘’
বিচিচিআইৰ সূত্ৰই লগতে জানিবলৈ দিয়া মতে এইবাৰ আৰু মুখ্য প্ৰশিক্ষকক তেওঁৰ ছাপোৰ্ট স্টাফ বাচি লোৱাৰ স্বাধীনতা দিয়া নহয়। নিৰ্বাচকসকলেই সহকাৰী প্ৰশিক্ষক তথা ছাপোৰ্ট স্টাফ বাচি দিব।
ছাপোৰ্ট স্টাফ নিৰ্বাচনৰ আগেয়েই যদি প্ৰশিক্ষক নিযুক্তি দিয়া হয়, তেতিয়াহ’লে ছাপোৰ্ট স্টাফ নিয়োগৰ বিষয় সন্দৰ্ভত প্ৰশিক্ষকৰ মতামত লোৱা হ’ব।
উল্লেখযোগ্য যে বিশ্বকাপৰ পাছতেই মুখ্য প্ৰশিক্ষক ৰবি শাস্ত্ৰী, বেটিং প্ৰশিক্ষক সঞ্জয় বাংগাৰ, বলিং প্ৰশিক্ষক ভৰত অৰুণ আৰু ফিল্ডিং প্ৰশিক্ষক আৰ শ্ৰীধৰৰ সৈতে বিচিচিআইৰ চুক্তিৰ ম্যাদ সমাপ্ত হৈছে।
ইপিনে, আগন্তুক ৱেষ্ট ইণ্ডিজ ভ্ৰমণৰ বাবে তেওঁলোকৰ চুক্তিৰ ম্যাদ ৪৫ দিন বঢ়াই দিয়া হৈছে। অৱশ্যে অহা ১৫ ছেপ্টেম্বৰৰ পৰা ঘৰুৱা খেলপথাৰত দক্ষিণ আফ্ৰিকাৰ বিৰুদ্ধে হ’বলগীয়া ছিৰিজৰ পূৰ্বে বিচিচিআইয়ে নতুন প্ৰশিক্ষক নিযুক্তি দিব বিচাৰিছে।
