কোভিডসৃষ্ট পৰিস্থিতিৰ মাজতে জামগুৰিহাটৰ একাংশ লোকক উচ্ছেদ কৰাক লৈ ইতিমধ্যে আৰম্ভ হ’ল ৰাজনীতি।
এই উচ্ছেদৰ পাছৰ সময়ছোৱাত দুটা মত দেখিবলৈ পোৱা গৈছে। এতিয়া প্ৰশ্ন হৈছে যে কোন সঁচা কোন মিছা? এফালে যদি ধিং সমষ্টিৰ বিধায়ক আমিনুল ইছলামে ফেচবুকযোগে দাঙি ধৰিছে এটা মত তাৰ বিপৰীতে চতিয়া সমষ্টিৰ বিধায়ক পদ্ম হাজৰিকাই দাঙি ধৰিছে অন্য এটা মত।
প্ৰথমে আমি উল্লেখ কৰিছো যোৱা ২০ মে’ৰ দিনা ধিং সমষ্টিৰ বিধায়ক আমিনুল ইছলামে এআইয়ুডিএফে মুখ্যমন্ত্ৰীক সাক্ষাৎৰ পাছত ফেচবুকত কি লিখিছিল?
‘কৰোনাৰ সংকটকালত জামুগুৰিহাটত একাংশ লোকক উচ্ছেদ কৰা অমানৱীয় ঘটনা সম্পৰ্কত আজি আমি এআইইউডিএফ বিধায়িনী দলৰ তৰফৰ পৰা অসমৰ মুখ্যমন্ত্ৰী মহোদয়ক সাক্ষাৎ কৰি এক স্মাৰক পত্র প্ৰদান কৰিলোঁ। এক সৌহার্দ্যপূর্ণ আলোচনাৰ অন্তত মূখ্যমন্ত্রী মহোদয়ে সাম্প্ৰতিক পৰিস্থিতিত উচ্ছেদ কাৰ্য বন্ধ ৰখা হ’ব বুলি প্ৰতিশ্ৰুতি দিয়ে আৰু ইতিমধ্যে উচ্ছেদিত ভূমিহীন লোকসকলক ২/৩ বিঘাকৈ মাটিৰ আৱণ্টন দি প্ৰধানমন্ত্ৰী আৱাস যোজনাৰ অধীনত গৃহ নিৰ্মাণ কৰি দিয়াৰ সংকল্পৰ কথা ব্যক্ত কৰে।‘ এয়া আছিল বিধায়ক আমিনুল ইছলামৰ মত।
আমিনুল ইছলামৰ উদ্ধৃতিৰে বিভিন্ন সংবাদ মাধ্যমে বাতৰি পৰিৱেশন কৰিলে। কিন্তু এই কথা মুঠেও মানি নলয় চতিয়া সমষ্টিৰ বিধায়কগৰাকীয়ে।
কালি অৰ্থ্যাৎ ২২ মে’ৰ দিনা নিশা এক ফেচবুক পোষ্টযোগে পদ্ম হাজৰিকাই কয় ‘মোৰ সমষ্টিৰ অন্তৰ্গত চৰ-চাপৰি অঞ্চলত অবৈধভাৱে বসবাস কৰা যিসকল লোকক প্ৰশাসনৰ দ্বাৰা উচ্ছেদ কৰা হৈছে, সেই লোকসকলক চৰকাৰীভাৱে কোনো ধৰণৰ সংস্থাপন দিয়া নহয়। দুই এটা ৱেব পৰ্টেলে এই সন্দৰ্ভত কিছু ভুল বাতৰি পৰিবেশন কৰাটো আমাৰ দৃষ্টি গোচৰ হৈছে।‘
‘মাননীয় মূখ্যমন্ত্ৰী মহোদয়ে এই বিষয়ত ইতিমধ্যেই স্থিতি স্পষ্ট কৰি দিছে। কেৱল মাত্ৰ চতিয়া সমষ্টিৰ ভোটাৰ তালিকাত নাম সন্নিবিষ্ট লোকৰ প্ৰতি আমাৰ দায়িত্ব থাকিব আৰু ইতিমধ্যেই প্ৰায় ১৭০ টি পৰিয়ালক ভূমি পট্টা প্ৰদান কৰা হৈছে। চতিয়াৰ ভূমিত অবৈধভাৱে বসবাসকাৰী লোকৰ দপদপনি সহ্য কৰা নহ’ব। কঠোৰ হাতেৰে ইয়াক প্ৰতিহত কৰা হ’ব।‘ পোষ্টটোত এইদৰে লিখি কয় পদ্ম হাজৰিকাই।
অৱশ্যে, ৰাজ্যৰ মুখ্যমন্ত্ৰীয়ে এই সন্দৰ্ভত নিজাববীয়াকৈ কোনোধৰণৰ স্থিতি প্ৰকাশ কৰা নাই।
এতিয়া চতিয়াৰ উচ্ছেদক লৈ হোৱা ৰাজনীতিক লৈ বিমোৰত পৰিছে সাধাৰণ জনতা। প্ৰশ্ন হৈছে ‘প্ৰকৃততে সত্য কোন? কাৰ বাবে উচ্ছেদিত লোকসকল বলিৰ পাঠা হ’বলগীয়া হৈছে?’
