অহা ১ ডিচেম্বৰৰ পৰা ১৯ ডিচেম্বৰলৈ অনুষ্ঠিত হ’বলগীয়া সংসদৰ শীতকালীন অধিৱেশনত কেইবাটাও গুৰুত্বপূৰ্ণ আইনী সংস্কাৰৰ বাবে সাজু হৈছে কেন্দ্ৰীয় চৰকাৰ। এই অধিৱেশনত চৰকাৰে প্ৰশাসনিক, অৰ্থনৈতিক আৰু শিক্ষা খণ্ডৰ আমূল পৰিৱৰ্তনৰ লক্ষ্যৰে মুঠ ১০খন নতুন বিধেয়ক উত্থাপন কৰাৰ পৰিকল্পনা কৰিছে।
চৰকাৰে প্ৰস্তাৱ কৰা বিধেয়কসমূহৰ ভিতৰত ‘১৩১ সংখ্যক সংবিধান সংশোধনী বিধেয়ক, ২০২৫’ বিশেষভাৱে চৰ্চালৈ আহিছে। এই বিধেয়কৰ জৰিয়তে কেন্দ্ৰীয় শাসিত অঞ্চল চণ্ডীগড়ক সংবিধানৰ ২৪০ নং অনুচ্ছেদৰ আওতালৈ অনাৰ প্ৰচেষ্টা চলোৱা হ’ব। এই বিধেয়কখন গৃহীত হ’লে বৰ্তমান পঞ্জাৱৰ ৰাজ্যপালে চণ্ডীগড়ৰ প্ৰশাসক হিচাপে দায়িত্ব পালন কৰা ব্যৱস্থাৰ অন্ত পৰিব আৰু অঞ্চলটোৰ প্ৰশাসনৰ দায়িত্ব এজন ‘লেফটেনেণ্ট গৱৰ্ণৰ’ৰ হাতত ন্যস্ত হ’ব। ইয়াৰ লগতে ৰাষ্ট্ৰপতিয়ে প্ৰত্যক্ষভাৱে চণ্ডীগড়ৰ বাবে আইন প্ৰণয়নৰ ক্ষমতা লাভ কৰিব।
আনহাতে, ‘পাৰমাণৱিক শক্তি বিধেয়ক, ২০২৫’-ৰ জৰিয়তে চৰকাৰে ভাৰতৰ অসামৰিক পাৰমাণৱিক খণ্ডত ব্যক্তিগত খণ্ডৰ কোম্পানীসমূহৰ প্ৰৱেশৰ পথ মুকলি কৰাৰ লক্ষ্য স্থিৰ কৰিছে।
অধিৱেশনত উত্থাপন হ’বলগীয়া অন্যান্য গুৰুত্বপূৰ্ণ বিধেয়কসমূহৰ ভিতৰত আছে:
ভাৰতীয় উচ্চ শিক্ষা আয়োগ বিধেয়ক: দেশৰ উচ্চ শিক্ষাৰ স্বায়ত্তশাসন আৰু গুণগত মান সুনিশ্চিত কৰাৰ লক্ষ্যৰে নতুন শিক্ষা নিয়ন্ত্ৰক সৃষ্টি কৰা।
ৰাষ্ট্ৰীয় ঘাইপথ (সংশোধনী) বিধেয়ক: ঘাইপথ নিৰ্মাণৰ বাবে দ্ৰুত আৰু স্বচ্ছ ভূমি অধিগ্ৰহণ প্ৰক্ৰিয়া নিশ্চিত কৰা।
কৰ্পৰেট আইন (সংশোধনী) বিধেয়ক, ২০২৫: ব্যৱসায়িক পৰিৱেশ সহজ কৰাৰ বাবে কোম্পানী আৰু এল এল পি (LLP) নিয়মসমূহৰ আপডেট।
ছিকিউৰিটিজ মাৰ্কেটছ ক’ড বিল, ২০২৫: বৰ্তমানৰ বিভিন্ন ছিকিউৰিটিজ আইনক একত্ৰিত কৰি এটা সৰল ক’ডলৈ ৰূপান্তৰ কৰা।
বীমা আইন (সংশোধনী) বিধেয়ক: বীমা খণ্ডত বিনিয়োগ বৃদ্ধি আৰু প্ৰসাৰণ।
মধ্যস্থতাকাৰী আৰু মীমাংসা বিধেয়ক (Arbitration and Conciliation Bill): বিবাদ নিষ্পত্তি প্ৰক্ৰিয়াটো অধিক শৃংখলাবদ্ধ কৰা।
আইন বাতিলকৰণ বিধেয়ক: প্ৰায় ১২০খন পুৰণি আৰু অপ্ৰয়োজনীয় আইন বাতিল কৰা।
মণিপুৰ সামগ্ৰী আৰু সেৱা কৰ (সংশোধনী) বিধেয়ক, ২০২৫: বৰ্তমানৰ অধ্যাদেশৰ ঠাইত এই বিধেয়কখন অনা হ’ব।
চৰকাৰী সূত্ৰৰ মতে, এই শীতকালীন অধিৱেশনত মূলতঃ অৰ্থনৈতিক সংস্কাৰ ত্বৰান্বিত কৰা আৰু প্ৰশাসনিক দক্ষতা বৃদ্ধি কৰাৰ ওপৰত গুৰুত্ব আৰোপ কৰা হ’ব।
