ভাৰতীয় ইতিহাসত অনাকাংক্ষিত নজিৰ গঢ়ি বিৰোধী শূন্য হোৱাৰে দিশে আগবাঢ়িছে দেশৰ সংসদ। সংসদৰ নিৰাপত্তা ভংগৰ বিষয়ক লৈ প্ৰতিবাদ কৰাৰ কাৰণে দুই তৃতীয়াংশ বিৰোধী সাংসদক নিলম্বন কৰাৰ পিছত এতিয়া প্ৰায় বিৰোধী শূন্যভাৱেই চলিছে সংসদৰ শীতকালীন অধিৱেশন।
সোমবাৰলৈকে দুই সদনত মুঠতে ৯২ জন বিৰোধী সাংসদক নিলম্বন কৰাৰ পিছত লোকসভাই আজি পুনৰ ৪৯ জন বিৰোধী সদস্যক নিলম্বন কৰে। ইয়াৰ পিছত আজি শাসকীয় বিজেপিয়ে সংসদৰ কোনো এখন সদনত প্ৰায় কোনো বিৰোধিতাৰ সন্মুখীন নহয়।
ৰাজ্যসভাৰ সাংসদকে ধৰি এইপৰ্যন্ত দুই সদনৰ পৰা মুঠ ১৪১জন সাংসদক এই পৰ্যন্ত নিলম্বন কৰা হৈছে। অহা বছৰ অনুষ্ঠিত হ’বলগীয়া সাধাৰণ নিৰ্বাচনৰ পূৰ্বে সংসদৰ অন্তিমখন চূড়ান্ত পূৰ্ণাংগ বৈঠক এই শীতকালীন অধিৱেশন সমাপ্ত হ’বলৈ এতিয়াও তিনিদিন বাকী আছে।
উল্লেখ্য যে, বৰ্তমান লোকসভাত মুঠ ৫২২ জন সাংসদ আছে। ইয়াৰে ৩২৩ জন সাংসদ হয় বিজেপিৰ অথবা দলটোৰ কোনো মিত্ৰ দলৰ। আনহাতে ১৪২ জন বিৰোধী সাংসদৰ এইপৰ্যন্ত ৬৭ শতাংশক নিলম্বন কৰা হৈছে। এনে অৱস্থাত এতিয়া সংসদত বিৰোধী সদস্যক মাত্ৰ ৪৭ জন।
আনহাতে ৰাজ্যসভাত নিলম্বিত নোহোৱাকে আছে ১০০ জনতকৈও কম বিৰোধী সাংসদ। ইয়াৰে কেইগৰাকীমান বিৰোধী সাংসদ অন্ধ্ৰ প্ৰদেশৰ শাসকীয় ৱাই এছ আৰ কংগ্ৰেছ পাৰ্টি আৰু উৰিষ্যাৰ শাসকীয় বিজু জনতা দলৰ দৰে দলৰ সদস্য।
কিন্তু এই দলকেইটাই বিগত সময়ছোৱাত বহু বিষয়ত চৰকাৰক সমৰ্থন কৰা পৰিলক্ষিত হৈছে। সংসদৰ পৰা নিলম্বিত হোৱাৰ পিছত কংগ্ৰেছ নেতা শশী থাৰুৰে এনে কাৰ্যক সংসদীয় গণতন্ত্ৰৰ প্ৰতি বিশ্বাসঘাতকতা আখ্যা দিছে।
উল্লেখ্য যে, যোৱা সপ্তাহত সংসদৰ নিৰাপত্তা ভংগক লৈ তীব্ৰ প্ৰতিবাদৰ মাজতে এইদৰে সাংসদসকলক অভূতপূৰ্ব হাৰত নিলম্বন কৰা হৈছে। সংসদ ভৱন আক্ৰমণৰ ২২ বছৰীয়া জয়ন্তীত কিদৰে এনে ঘটনা হ’বলৈ পালে, সেই বিষয়ে প্ৰধানমন্ত্ৰী মোডী বা গৃহমন্ত্ৰী শ্বাহক সদনত বক্তব্য প্ৰদান কৰিবলৈ দাবী জনাইছে বিৰোধীয়ে।
