অসমৰ এন আৰ চিৰ কামত “ছিষ্টেম ইণ্টিগ্ৰেটৰ” হিচাপে কাম কৰা উইপ্ৰ’ নামৰ তথ্য প্ৰযুক্তিৰ বৃহৎ প্ৰতিষ্ঠানটোৱে আজি ইয়াৰ ৱেবছাইটৰ পৰা অসমত কৰা কামৰ বিষয়ে কৰা সবিশেষ মচি পেলায়।
এই আচৰিত ঘটনাটো ঘটে প্ৰধান মন্ত্ৰী নৰেন্দ্ৰ মোদীয়ে ৰামলীলা ময়দানত এটা সমাৱেশত গোটেই দেশজুৰি এন আৰ চি অনাৰ কথা অস্বীকাৰ কৰাৰ এদিন পিছতে।
অৱশ্যে পিছত নিজৰ এই ভুলৰ শুধৰনি কৰি কোম্পানিটোৱে ইয়াক পুনৰ ডিছপ্লেই কৰা দেখা যায়।
কোম্পানিটোৱে ইয়াৰ ৱেবছাইটত Digital Governance: Achieving Citizen Enrolment in Record Time শীৰ্ষক এটা পোষ্টত অসমত কৰা কামক তেওঁলোকৰ এটা উল্লেখযোগ্য কৃতিত্ব হিচাপে দাঙি ধৰিছে।
যোৱা ৩১ আগষ্টত চূড়ান্ত ৰূপত প্ৰকাশ পোৱা এন আৰ চিৰ উন্নীতকৰণ প্ৰক্ৰিয়াটোত আৰম্ভণিৰ পৰা শেষলৈকে কোম্পানিটোৱে টেকনিকেল সহযোগী হিচাপে কাম কৰি আহিছিল। কোম্পানিটোৱে অসমত এন আৰ চিৰ কামত নিয়োগ কৰা কৰ্মচাৰীক কম দৰমহা দিয়াৰো অভিযোগ আছে।
চূড়ান্ত তালিকাত মুঠ ৩,১১,২১,০০৪গৰাকী লোকৰ নাম সন্নিৱিষ্ট হোৱাৰ বিপৰীতে দাবী আৰু আপত্তি দাখিল নকৰা সকলকে ধৰি মুঠ ১৯,০৬,৬৫৭ গৰাকী লোকৰ নাম বাদ পৰে।
অসমত এন আৰ চি উন্নীতকৰণ প্ৰক্ৰিয়াটো প্ৰায় ৬ বছৰ ধৰি চলিছিল আৰু চূড়ান্ত তালিকা প্ৰকাশৰ পিছতো এতিয়াও ইয়াৰ গ্ৰহণযোগ্যতাক লৈ ৰাজ্যখনত ভিন্ন মত দেখা যায়।