পাকিস্তানলৈ কঠোৰ বাৰ্তা প্ৰেৰণ কৰি ভাৰতীয় সেনাৰ ছাউদাৰ্ণ কমাণ্ডৰ সুদৰ্শন চক্ৰ বাহিনীয়ে থৰ মৰুভূমিত এক আটাইতকৈ বৃহৎ সামৰিক অনুশীলন চলাইছে।
ইয়াৰ দ্বাৰা পশ্চিম দিশৰ শত্ৰু ভূমিৰ সীমান্ত জুৰি আক্ৰমণৰ সক্ষমতা জুখি চোৱাৰ চেষ্টা চলোৱা হৈছে।
সিন্ধু নদীক ঢুকি পোৱাৰ লক্ষ্য আগত ৰাখি কৰা উক্ত অনুশীলনৰ নাম ৰখা হৈছে সিন্ধু সুদৰ্শন। ৰাষ্ট্ৰীয় সংবাদ মাধ্যম ইণ্ডিয়ান এক্সপ্ৰেছৰ বাতৰিত ইয়াৰ সৱিশেষ প্ৰকাশ পাইছে।
প্ৰায় দুমাহ জুৰি চলিবলগীয়া সিন্ধু সুদৰ্শন অনুশীলন বৰ্তমান শেষ পৰ্যায়ত উপনীত হৈছে। “সকলো অস্ত্ৰ’ৰে এখন যুদ্ধৰ অনুশীলনত ভাগ লৈছে ৪০,০০০ সেনাই। “সকলো অস্ত্ৰ’ই ৰকেট লাঞ্চাৰ, অত্যাধুনিক বৃহৎ বন্দুক, সশস্ত্ৰ বাহন, পদাতিক সেনা আৰু বায়ুসেনা বাহিনীৰ সহযোগত শত্ৰুভূমিত আঘাত হানিব পৰা সেনাৰ এক যুঁজাৰু গোট হিচাপে কাম কৰা সেনা আকাশমাৰ্গ প্ৰতিৰক্ষাক সামৰি লোৱা হৈছে।
এই বৃহৎ অনুশীলনটো থৰ মৰুভূমিত এটা কাল্পনিক আন্তৰ্জাতিক সীমান্ত চিহ্নিত কৰি শত্ৰুপক্ষ হিচাপে একাংশ বাহিনীক মকৰল কৰি চলোৱা হৈছে।
সেনা বিষয়াৰ উদ্ধৃতি দি বাতৰিটোত কোৱা হৈছে যে অনুশীলনটোৰ মুখ্য দিশ হৈছে ইয়াত নিৰীক্ষণ, ধ্বংসলীলা আৰু সহযোগী ব্যৱস্থাসমূহক এটা নেটৱৰ্কত ইটোৰে-সিটোৰ সম্পৰ্কিত কৰাৰ প্ৰচেষ্টা।
অনুশীলনটোত লগতে সেনা আৰু বায়ুসেনাৰ মাজত এক উচ্চ পৰ্যায়ৰ সহযোগিতা গঢ়াৰ প্ৰয়াস কৰা হৈছে কিয়নো ভাৰতীয় বায়ুসেনাই আকাশমাৰ্গেৰে আক্ৰমণ তথা জৰুৰী সেনা সঞ্চালনত মুখ্য ভূমিকা পালন কৰে।
অনুশীলনত সেনাৰ ছাউদাৰ্ণ কমাণ্ডৰ সুদৰ্শন চক্ৰৰ বাহিনীৰ ৪০,০০০ সেনাৰ উপৰি ৭০০খন সশস্ত্ৰ বাহন আৰু ৩০০ অত্যাধুনিক বন্দুক ব্যৱহাৰ কৰা হৈছে।
তদুপৰি, ইলেক্ট্ৰ’-অপটিকেল পডছ, হেলমেট-মাউন্টেড ছাইটছ আৰু নাইট ভিছন গুগুলছৰে সৈতে নতুনকৈ অন্তৰ্ভুক্ত কৰা সশস্ত্ৰ হেলিকপ্টাৰ ৰুদ্ৰ ব্যৱহাৰ কৰা হৈছে। ইয়াৰ লগতে ব্যৱহাৰ কৰা হৈছে অলপতে অন্তৰ্ভুক্ত কৰা ১৫৫এমএম কে৯ “বজ্ৰ’ৰো।
এই প্ৰচেষ্টাৰ অংশ হিচাপে বিভিন্ন সংহত যুঁজাৰু গোটক ১০০ কিলোমিটাৰ সীমান্তৰ বেলেগ বেলেগ স্থানত আক্ৰমণৰ বাবে উদ্যত কৰি তোলা হয়। গোটসমূহৰ মাজত যোগাযোগৰ লগতে এটা গোটে আনটো গোটৰ সৈতে সম্পৰ্ক ৰক্ষা কৰি এটা ঐক্যবদ্ধ শক্তি হিচাপে যুঁজ দিয়াত গুৰুত্ব দিয়া হয়।
সীমান্ত অঞ্চলত ভাৰতৰ এনে সামৰিক অনুশীলনে সীমান্তৰ সিপাৰৰ শত্ৰুপক্ষৰ বাবে মূৰৰ কামোৰণিৰ যে সৃষ্টি কৰিব তাত কোনো সন্দেহ নাই।
