চলিত ৰুছ-ইউক্ৰেইন যুদ্ধ প্ৰায় এটা বছৰ সম্পূৰ্ণ কৰাৰ দিশত। যোৱা বৰ্ষৰ ২৪ ফেব্ৰুৱাৰীত আৰম্ভ হোৱা এই যুদ্ধক লৈ এতিয়াও শংকিত বিশ্ব ৰাজনীতি। পিছে ৰাছিয়াৰ ইউক্ৰেইন আক্ৰমণৰ পূৰ্বে আন এক অকল্পনীয় সংহাৰ হয়তো দেখিলেহেঁতেন বিশ্বই। ৰুছ-ইউক্ৰেইন যুদ্ধৰ ঠিক পূৰ্বে ব্ৰিটেইনৰ তদানীন্তন প্ৰধানমন্ত্ৰী বৰিছ জনছনে লাভ কৰিছিল হত্যাৰ ভাবুকি।
মিছাইল আক্ৰমণেৰে হত্যা কৰাৰ ভাবুকি দিয়া হৈছিল প্ৰাক্তন প্ৰধানমন্ত্ৰীগৰাকীক। ফোনযোগে জনছনক ভাবুকি দিয়া হৈছিল, “বৰিছ, মই আপোনাক আঘাত দিব নিবিচাৰোঁ, কিন্তু মিছাইলৰ সহায়ত মাত্ৰ এক মিনিটৰহে প্ৰয়োজন হ’ব।” ব্ৰিটিছ প্ৰধানমন্ত্ৰীগৰাকীক এই ভাবুকি দিছিল ৰাছিয়াৰ ৰাষ্ট্ৰপতি ভ্লাদিমিৰ পুটিনে!
শেহতীয়াকৈ জনছনে কৰিছে এই চাঞ্চল্যকৰ দাবী। জনছনৰ দাবী মতে, ৰুছ ৰাষ্ট্ৰপতি ভ্লাদিমিৰ পুটিনে ৰাছিয়ান বাহিনীক ইউক্ৰেইনত প্ৰৱেশৰ নিৰ্দেশ দিয়াৰ ঠিক পূৰ্বেই ব্যক্তিগতভাৱে বৰিছ জনছনক ক্ষেপণাস্ত্ৰ আক্ৰমণৰ লক্ষ্য কৰি লোৱাৰ ভাবুকি দিছিল।
আজি সম্প্ৰচাৰ হ’বলগীয়া বিবিচিৰ নতুন তথ্যচিত্ৰ অনুসৰি ২৪ ফেব্ৰুৱাৰীত আক্ৰমণৰ ঠিক আগতেই ফোন কলত এই আপাত ভাবুকি লাভ কৰিছিল তদানীন্তন ব্ৰিটিছ প্ৰধানমন্ত্ৰীগৰাকীয়ে।
পুটিনৰ উদ্ধৃতি দি জনছনে কয় যে তেওঁ মোক এটা সময়ত একপ্ৰকাৰ ভাবুকি দিছিল আৰু কৈছিল, “বৰিছ, মই আপোনাক আঘাত দিব নিবিচাৰোঁ, কিন্তু মিছাইলৰ সহায়ত মাত্ৰ এক মিনিটৰহে প্ৰয়োজন হ’ব।”
উল্লেখ্য যে, ৰুছ আক্ৰমণৰ প্ৰাৰম্ভিক সময়ছোৱাত ইউক্ৰেইনৰ ৰাষ্ট্ৰপতি ভল’ডিমিৰ জেলেনস্কিৰ অন্যতম পশ্চিমীয়া সমৰ্থক হিচাপে সমৰ্থন আগবঢ়াইছিল বৰিছ জনছনে।
জনছনৰ মতে, ৰাছিয়াৰ ইউক্ৰেইন আক্ৰমণৰ পূৰ্বে তেওঁ পুটিনক ইউক্ৰেইনৰ নাটোত যোগদানৰ কোনো আগতীয়া সম্ভাৱনা নাই বুলি জনাবলৈ ইতস্তত: কৰিছিল। কিন্তু একে সময়তে আক্ৰমণৰ ফলস্বৰূপে ৰাছিয়াৰ সীমান্তত নাটোৰ উপস্থিতিৰ বিষয়ে পুটিনক তেওঁ সকীয়াই দিছিল।