পুনৰ উত্তৰ প্ৰদেশত এনকাউণ্টাৰত নিহত হ’ল এগৰাকী দাগী অপৰাধী। বৃহস্পতিবাৰে নিশা উত্তৰ প্ৰদেশৰ ঝিনঝানা অঞ্চলৰ ভোগী মাজৰা গাঁৱত অভিযান চলোৱাৰ সময়ত আৰক্ষীৰ গুলীত মৃত্যু হয় সঞ্জীৱ সজিবা গেঙৰ তীক্ষ্ণ শ্বুটাৰ ফয়জলৰ। যাৰ মূৰৰ দাম আছিল ১ লাখ টকা। এই অভিযানৰ সময়ত দুষ্কৃতিকাৰীৰ গুলীত এজন কনিষ্টবল আহত হৈছে।
আৰক্ষী সূত্ৰে জানিব পৰা মতে, ফয়জলৰ বিৰুদ্ধে হত্যা, ডকাইতিকে ধৰি ১৭টা অপৰাধমূলক গোচৰ ৰুজু কৰা হৈছিল। দীৰ্ঘদিন ধৰি পলাতক হৈ থকা এই অপৰাধীজনক পোৱাৰ বাবে আৰক্ষীয়ে এক লাখ টকাৰ পুৰস্কাৰ ঘোষণা কৰিছিল। শেহতীয়াকৈ বাৰণাই গাঁৱত ফয়জল আৰু তেওঁৰ সহযোগীসকলে এটা দম্পতীৰ মটৰচাইকেল, ম’বাইল আৰু ৩০০০ টকা ডকাইতি কৰিছিল। খবৰ লাভ কৰি আৰক্ষীৰ দল তৎক্ষণাত ঘটনাস্থলীত উপস্থিত হয়। অঞ্চলটো ঘেৰি তালাচী অভিযান আৰম্ভ কৰা হয়। আৰক্ষীৰ হাতৰ পৰা পলাই যাবলৈ ফয়জলে গুলীচালনা কৰে। আৰক্ষীয়েও ইয়াৰ প্ৰত্যুত্তৰ দিয়ে। দীৰ্ঘসময় দুয়োপক্ষৰ মাজত গুলীয়াগুলীৰ পিছত ফয়জল গুৰুতৰভাৱে আহত হয়। তেওঁক হাস্পতাললৈ নিয়াৰ পিছত চিকিৎসকে মৃত বুলি ঘোষণা কৰে। এই অভিযানত এজন কনিষ্টবলৰ ভৰিত গুলী লাগে।
আৰক্ষী অধীক্ষক নৰেন্দ্ৰপ্ৰতাপ সিঙে কয়, “এই দুৰ্বৃত্ত ফয়জল ভয়ংকৰ দুষ্কৃতিকাৰী দল সঞ্জীৱ গেঙৰ তীক্ষ্ণ শ্বুটাৰ। শেহতীয়াকৈ জিলাখনত সংঘটিত দুটা ডকাইতিত তাৰ নাম জড়িত আছিল। এই অপৰাধীজনৰ মূৰৰ দাম আছিল এক লাখ টকা।”
উল্লেখযোগ্য যে, শেহতীয়া তথ্য অনুসৰি উত্তৰ প্ৰদেশত এনকাউণ্টাৰৰ সংখ্যা পুনৰ বৃদ্ধি পাইছে। ডেৰমাহমান পূৰ্বে এছটিএফৰ এনকাউণ্টাৰত আন এজন দাগী অপৰাধী শ্বাহৰুখ পাঠান নিহত হৈছিল। যোৱা মাহত হত্যা, ডকাইতিকে ধৰি ৩৬টা গুৰুতৰ গোচৰত অভিযুক্ত কুখ্যাত অপৰাধী নইমক আৰক্ষীয়ে এনকাউণ্টাৰত হত্যা কৰে। যাৰ মূৰৰ দাম আছিল এক লাখ টকা। আৰক্ষীয়ে অভিযুক্ত নইমৰ ওচৰৰ পৰা দুটা পিষ্টল আৰু এখন বাইক জব্দ কৰিছিল।
