যোৰহাট চহৰৰ মাজমজিয়াতে এগৰাকী মহিলাক ধৰ্ষণ কৰাৰ অভিযোগত সোমবাৰে নিশা আৰক্ষীয়ে দুজন ৰিক্সাচালকক গ্ৰেপ্তাৰ কৰে।
অভিযোগ অনুসৰি, গ্ৰেপ্তাৰ হোৱা ৰিক্সাচালক দুজনে যোৰহাট চহৰৰ আসাম ট্ৰাংক ৰোডৰ কাষৰ তৰাজান অঞ্চলৰ মাছ আৰু শাক-পাচলিৰ দৈনিক বজাৰৰ আমাৰ হাটৰ এখন চালিৰ তলত এগৰাকী মহিলাক ধৰ্ষণ কৰিছিল।
ৰিক্সাচালক দুজনক নগেন শইকীয়া (২৫) আৰু অৰূপজ্যোতি কলিতা(২২) বুলি চিনাক্ত কৰা হৈছে।
নগেন শইকীয়াৰ ঘৰ অজন্তা বাইপাছত আৰু অৰূপজ্যোতি কলিতা মালৌ আলিৰ বাসিন্দা। যোৰহাট আৰক্ষী থানাত এটা গোচৰ (১৩০৩/২০২১নং) ৰুজু কৰি দুয়োজনকে ভাৰতীয় দণ্ডবিধিৰ ৩৭৬ ধাৰাত গ্ৰেপ্তাৰ কৰা হৈছে।
আৰক্ষীৰ এক সূত্ৰই এই সংবাদাতাক জানিবলৈ দিয়ে যে সোমবাৰে নিশা প্ৰায় ৮:৩৫বজাত আৰক্ষীয়ে খৱৰ লাভ কৰে যে বজাৰখনত এগৰাকী মহিলাক ধৰ্ষণ কৰি পেলাই থৈ গৈছে।
‘’আৰক্ষী উপ পৰিদৰ্শক ইন্দুমনি গগৈৰ নেতৃত্বত এটা আৰক্ষীৰ দল ততাতয়াকৈ ঘটনাস্থলীত উপস্থিত হয় আৰু মহিলাগৰাকীক উদ্ধাৰ কৰে। কাপোৰ কানি ফটা-ছিঙা অৱস্থাত উদ্ধাৰ কৰা ঘটনাৰ বলি মহিলাগৰাকীক তাৎক্ষণিকভাৱে যোৰহাট মেডিকেল কলেজ হাস্পাতাললৈ প্ৰেৰণ কৰা হয়,’’- আৰক্ষী সূত্ৰটোৱে কয়।
আৰক্ষীৰ সূত্ৰটোৰ মতে ঘটনাৰ বলি মহিলাগৰাকী যোৰহাট চহৰৰ এখন ৰেষ্টুৰেন্টত কাম কৰে।
ইপিনে, নগেন শইকীয়াক সোমবাৰে নিশা প্ৰায় ১০ বজাত গ্ৰেপ্তাৰ কৰাৰ বিপৰীতে অৰূপজ্যোতি কলিতাক তাৰ কেইঘন্টামান পাছতে গ্ৰেপ্তাৰ কৰা হয়।
আনহাতে, আছুৰ যোৰহাট জিলা ছাত্ৰসন্থাই মঙলবাৰে পুৱা মহিলাগৰাকীৰ ধৰ্ষণৰ বিৰুদ্ধে এক প্ৰতিবাদী সমদল উলিয়ায়।
