উত্তৰ প্ৰদেশৰ বহৰাইচ জিলাত নৰখাদক কুকুৰনেচীয়া বাঘৰ সন্ত্ৰাসৰ অন্ত পৰা নাই। আটাইতকৈ ক্ষতিগ্ৰস্ত মাজহাৰা তৌকলি গাঁৱৰ পৰা মাত্ৰ ১০ কিলোমিটাৰ দূৰত অৱস্থিত ৰচুলপুৰ দাৰেহতা গাঁৱত পুনৰ এক মৰ্মান্তিক ঘটনা সংঘটিত হৈছে।
সোমবাৰে পুৱতি নিশা ঘৰৰ বাৰান্দাত বহি নিজৰ সন্তানক গাখীৰ খুৱাই আছিল এগৰাকী মহিলাই। তেনে সময়তে এটা কুকুৰনেচীয়া বাঘে তেওঁৰ কোলাৰ পৰা তিনি বছৰীয়া শিশুটিক থপিয়াই লৈ পলাই যায়। মাতৃগৰাকীয়ে পিছে পিছে খেদি গৈছিল যদিও সন্তানক বচাবলৈ সক্ষম নহ’ল। কেইঘণ্টামানৰ পিছত গাঁৱৰ পৰা কিছু নিলগত শিশুটিৰ ক্ষত-বিক্ষত মৃতদেহ উদ্ধাৰ কৰা হয়। এই ঘটনাই সমগ্ৰ অঞ্চলটোতে তীব্ৰ আতংকৰ সৃষ্টি কৰিছে।
গাঁৱৰ ৰাইজে জনোৱা মতে, পুৱা পুত্ৰ অংশুক লৈ বাৰান্দাত বহি আছিল নানকাই নামৰ মহিলাগৰাকী। তেওঁৰ স্বামী ৰাম মনোহৰ কৰ্মসূত্ৰে পঞ্জাৱত থাকে। সেইদিনা পুৱা অতি ঘন কুঁৱলী আছিল। সেই সুযোগ লৈয়ে এটা কুকুৰনেচীয়াই ঘৰত সোমাই নিমিষতে শিশুটিক মুখত কামুৰি লৈ পলাই যায়। কুঁৱলীৰ বাবে মাক কিছু দূৰ যোৱাৰ পিছতো বাঘটোৰ কোনো শুংসূত্ৰ নাপালে। পিছত বনকৰ্মী আৰু গাঁৱৰ ৰাইজে শিশুটিৰ মৃতদেহ উদ্ধাৰ কৰে।
যোৱা ছেপ্টেম্বৰ মাহৰ পৰা বহৰাইচ জিলাত কুকুৰনেচীয়াৰ আক্ৰমণত এতিয়ালৈকে ১২ জন লোকৰ মৃত্যু হৈছে, যাৰ ভিতৰত ১০ জনেই শিশু। কাইজাৰগঞ্জ, বৌন্দি আৰু ফখৰপুৰ অঞ্চলৰ কেইবাখনো গাঁৱৰ ৰাইজে এতিয়া চকুৰ টোপনি হেৰুৱাই আতংকত দিন কটাইছে।
বন বিভাগৰ দাবী অনুসৰি, ইয়াৰ আগতে ছটা নৰখাদক কুকুৰনেচীয়াক ধৰা হৈছে যদিও সন্ত্ৰাস কমা নাই।
জিলা বন বিষয়া ৰাম সিঙে জনাইছে যে শিশুটিৰ শৰীৰৰ ক্ষতচিহ্ন চাই এয়া নৰখাদক কুকুৰনেচীয়াৰ কাম বুলি স্পষ্ট হৈছে।
