পুনৰ পত্নীয়ে স্বামীক হত্যা কৰাৰ আন এক ৰোমহৰ্ষক ঘটনা পোহৰলৈ আহিছে। স্বামীক হত্যা কৰাৰ অভিযোগত পত্নীক গ্ৰেপ্তাৰ কৰা হৈছে। গুৱাহাটীত সংঘটিত হৈছে এই ঘটনা।
আৰক্ষীয়ে জনোৱা মতে, নিহত লোকজনৰ নাম ছাবিয়াল ৰহমান (৪০)। ছাবিয়ালক হত্যা কৰাৰ পিছত পত্নী ৰহিমা খাতুনে মৃতদেহটো মাটিত পুতি থয়। এই অভিযোগত গ্ৰেপ্তাৰ কৰা হৈছে ৰহিমা থাতুনক।
গুৱাহাটী (পশ্চিম) উপ আৰক্ষী আয়ুক্ত পদ্মনাভ বৰুৱাই জানিবলৈ দিয়া মতে, মহানগৰীৰ পাণ্ডু অঞ্চলৰ জয়মতী নগৰত সংঘটিত হৈছে এই ঘটনা। ৰহিমাই পাৰিবাৰিক বিবাদৰ বাবেই স্বামীক হত্যা কৰা বুলি আৰক্ষীয়ে দাবী কৰিছে। পিছত ভয়ত মৃতদেহটো মাটিত পুতি পেলায়। আৰক্ষী বিষয়াগৰাকীয়ে জেৰাৰ সময়ত ৰহিমাই হত্যাকাণ্ডৰ কথা স্বীকাৰ কৰা বুলিও দাবী কৰে।
এই হত্যাকাণ্ড ২৬ জুনত সংঘটিত হোৱা বুলি জানিবলৈ দিয়ে আৰক্ষী বিষয়া পদ্মনাভ বৰুৱাই। ৰহিমাই আৰক্ষীক জনোৱা মতে, তেওঁৰ স্বামীয়ে প্ৰতিদিনে মদ্যপান কৰি ঘৰলৈ আহি অশান্তিৰ সৃষ্টি কৰিছিল। সেইদিনা দুয়োৰে মাজত কাজিয়া হৈছিল। দুয়োৰে মাজত হতাহতিও হয়।
কাজিয়াৰ সময়তে ৰহিমাই মাতাল স্বামীক হত্যা কৰে। স্বামীৰ মৃত্যু ঘটাত তেওঁ ভয় খাইছিল। ইয়াৰ পিছত তেওঁ ঘৰৰ ভিতৰতে ৫ ফুটমান গাঁত খান্দি ছাবিয়ালৰ মৃতদেহটো পুতি থৈছিল।
জনা যায় যে ছাবিয়ালৰ স্ক্ৰেপ মেটেলৰ ব্যৱসায় আছিল। ১৫ বছৰ আগতে তেওঁলোকৰ বিয়া হৈছিল। দম্পতীহালৰ দুটা সন্তানো আছে।
আৰক্ষী সূত্ৰৰ পৰা জানিব পৰা মতে, কিছুদিন ছাবিয়ালক দেখা নোপোৱাত চুবুৰীয়াৰ সন্দেহ হৈ পৰে। এই বিষয়ে তেওঁলোকে ৰহিমাক সোধে। ৰহিমাই তেওঁলোকক কয় যে তেওঁৰ স্বামী ব্যৱসায়ৰ বাবে কেৰালালৈ গৈছে। পিছত তেওঁ কয় যে ছাবিয়াল অসুস্থ হৈ চিকিৎসালয়ত ভৰ্তি হৈ আছে।
ইপিনে যোৱা ১২ তাৰিখে ছাবিয়ালৰ এজন ভাতৃয়ে জালুকবাৰী থানাত এখন নিৰুদ্দেশ ডায়েৰী দাখিল কৰে। আৰক্ষীয়ে তদন্ত আৰম্ভ কৰি ৰহিমাকো জেৰা কৰে। জেৰাৰ সময়ত ৰহিমাই স্বামীক হত্যা কৰি মৃতদেহ ঘৰৰ ভিতৰতে পুতি থোৱাৰ কথা স্বীকাৰ কৰে।
এজন আৰক্ষী বিষয়াই জনোৱা মতে, দণ্ডাধীশ আৰু অন্যান্য বিষয়াৰ উপস্থিতিত ছাবিয়ালৰ মৃতদেহ উদ্ধাৰ কৰা হয়।
তদন্তকাৰীয়ে সন্দেহ কৰিছে যে ৰহিমাই এই কাৰ্য্য অকলে কৰা নাছিল। এজন বিষয়াই কয়, “এগৰাকী মহিলাই ইমান ডাঙৰ গাঁত খন্দাটো সম্ভৱ নহয়। আমি সন্দেহ কৰোঁ যে ইয়াৰ লগত আন কোনোবাও জড়িত। আমি সমগ্ৰ বিষয়টোৰ তদন্ত কৰি আছো।”
