ধৰ্ষণৰ গোচৰ ৰুজু কৰিবলৈ অমান্তি আৰক্ষী: ভুক্তভোগী কন্যাসহ আত্মহত্যাৰ পথ বাছি ল’লে মাতৃয়ে
নিজ নাবালিকা সন্তান ধৰ্ষণৰ বলি হোৱা বুলি অভিযোগ উত্থাপন কৰি স্থানীয় আৰক্ষী চকীত অভিযুক্তৰ বিৰুদ্ধে অভিযোগ দাখিল কৰিবলৈ গৈ আৰক্ষীৰ পক্ষপাতিত্বৰ ফলত বিফল হৈ সন্তানসহ আত্মহত্যাৰ দৰে চৰম পথ বাছি লৈছে এগৰাকী মহিলাই। এই চাঞ্চল্যকৰ ঘটনা সংঘটিত হৈছে অন্ধ্ৰ প্ৰদেশত।
ৰাজ্যখনৰ এলুৰু জিলাত সংঘটিত এই ঘটনাৰ বিষয়ে সংবাদ মাধ্যমত প্ৰকাশ পোৱাৰ পিছতে এতিয়া ব্যাপক চাঞ্চল্যৰ সৃষ্টি হৈছে। প্ৰকাশিত খবৰ অনুসৰি মৃত মহিলাগৰাকীয়ে যোৱা ১২ ছেপ্টেম্বৰত ধৰ্ষণৰ গোচৰ ৰুজু কৰাৰ উদ্দেশ্যে এলুৰু জিলাৰ পেদাভেগী আৰক্ষী থানাত উপস্থিত হৈছিল।
স্থানীয় এগৰাকী যুৱকে মৰম কৰাৰ চলেৰে সুযোগ বুজি মহিলাগৰাকীৰ নাবালিকা সন্তানক যৌন নিৰ্যাতন চলাইছিল বুলি গুৰুতৰ অভিযোগ উত্থাপন কৰি অভিযোগ দাখিল কৰিবলৈ আৰক্ষীৰ কাষ চাপিছিল মহিলাগৰাকী।
কিন্তু থানাখনত কৰ্মৰত উপ-পৰিদৰ্শক গৰাকীয়ে এই অভিযোগ পঞ্জীয়ন কৰিবলৈ অস্বীকাৰ কৰে। এনে পৰিস্থিতিত মহিলাগৰাকীয়ে আৰক্ষী বিষয়াগৰাকীয়ে অভিযুক্তৰ বিৰুদ্ধে কিয় কোনো ব্যৱস্থা গ্ৰহণ কৰা নাই বুলি প্ৰশ্ন কৰাত আৰক্ষী বিষয়া গৰাকীয়ে মাতৃ-কন্যাক গালি-গালাজ কৰি অপদস্থ কৰে বুলি অভিযোগ উত্থাপন হৈছে।
এই ঘটনাত অপমানিত অনুভৱ কৰি তথা ন্যায়ৰ পৰা বঞ্চিত হৈ মহিলাগৰাকীয়ে শীতল পানীয়ৰ সৈতে কীটনাশক মিহলি কৰি কন্যা সন্তানটিসহ সেই পানীয় পান কৰি আত্মহত্যা কৰে।
মৃত মহিলাগৰাকীৰ ভাতৃয়ে ঘটনা সন্দৰ্ভত সংবাদ মাধ্যমৰ আগত উল্লেখ কৰা মতে তেওঁলোকে অভিযোগ দাখিলৰ বাবে যোৱাৰ সময়ত আৰক্ষী উপ-পৰিদৰ্শক গৰাকীয়ে অভিযোগ গ্ৰহণ কৰিবলৈ অস্বীকাৰ কৰাৰ লগতে মাতৃ-কন্যাক অতি নিকৃষ্ট আৰু অশালীনভাৱে গালি-গালাজ কৰে।
এই অপমান সহ্য কৰিব নোৱাৰা বাবেই মহিলাগৰাকীয়ে এনে চৰম পন্থা অৱলম্বন কৰে বুলি অভিযোগ কৰি তেওঁৰ ভাতৃয়ে এই আত্মহত্যাৰ বাবে আৰক্ষী বিষয়াগৰাকীক দোষাৰোপ কৰে।
এজন আৰক্ষী বিষয়াই ধৰ্ষণৰ গোচৰ ৰুজু কৰিবলৈ অস্বীকাৰ কৰাৰ পিছত এগৰাকী নাবালক ছোৱালী আৰু তাইৰ মাতৃয়ে আত্মহত্যা কৰিছিল। ঘটনাটো আৱিষ্কাৰ হোৱাৰ পিছত আৰক্ষী বিষয়াজনক তেওঁলোকৰ আত্মহত্যাত উদগনি দিয়াৰ বাবে নিলম্বিত কৰা হৈছিল।
ঘটনাটোৰ বিষয়ে প্ৰচাৰ হোৱাৰ পাছতে অভিযুক্ত উপ-পৰিদৰ্শক গৰাকীক মাতৃ-কন্যাৰ আত্মহত্যাত উচতনি দিয়াৰ অভিযোগত চাকৰিৰ পৰা নিলম্বিত কৰা হয়।