বিশ্ব ক্ৰিকেটৰ আটাইতকৈ আকাংক্ষিত মেচ হিচাপে সদায়ে চৰ্চিত হয় দুই চুবুৰীয়া ৰাষ্ট্ৰ ভাৰত বনাম পাকিস্তানৰ মেচ। ক্ৰিকেট জগতত এই দুই প্ৰতিদ্বন্দীৰ সমুখ যুঁজ উপভোগৰ বাবে ক্ৰিকেটপ্ৰেমীসকলৰ মাজত যথেষ্ট উছাহ দেখিবলৈ পোৱা যায়।
পিছে দেশ দুখনৰ মাজত থকা ৰাজনৈতিক বিবাদৰ ফলস্বৰূপে আইচিচি আৰু এছিয়ান ক্ৰিকেট কাউন্সিলৰ মূল টুৰ্ণামেণ্টৰ বাবে আন কোনো শৃংখলাত দীৰ্ঘদিন ধৰি পৰস্পৰৰ বিপক্ষে অৱতীৰ্ণ হোৱা নাই ভাৰত আৰু পাকিস্তান।
দুই চুবুৰীয়া ক্ৰিকেট শক্তি অন্তিমবাৰৰ বাবে দ্বিপাক্ষিক শৃংখলাত মুখামুখি হৈছিল এটা দশক পূৰ্বেই। ২০১২ চনত সীমিত অভাৰৰ শৃংখলাৰ বাবে পাকিস্তানে ভাৰত ভ্ৰমণ কৰিছিল। তাৰ পাছৰ পৰাই দ্বিপাক্ষিক শৃংখলাত ভাগ লোৱাৰ পৰা আঁতৰি আছে দেশ দুখন।
আনহাতে ২০০৭ চনতেই দুয়ো দেশে শেষবাৰৰ বাবে টেষ্ট শৃংখলাত অৱতীৰ্ণ হৈছিল। ভাৰতত অনুষ্ঠিত এই তিনিখনীয়া শৃংখলাত ভাৰত ১-০ ব্যৱধানত জয়ী হৈছিল।
পিছে তাৰ পাছৰে পৰা দ্বিপাক্ষিক শৃংখলাৰ পৰা আঁতৰি থকা দেশ দুখনৰ মাজত পুনৰ এবাৰ ক্ৰিকেটীয় সম্পৰ্ক গঢ় লৈ উঠাৰ আশা কৰিছে ক্ৰিকেট অনুৰাগীসকলে। আৰু ক্ৰিকেটপ্ৰেমী সকলৰ এই ইচ্ছাৰ প্ৰতি লক্ষ্য ৰাখি ইংলেণ্ডৰ ক্ৰিকেট ব’ৰ্ডে ভাৰত আৰু পাকিস্তানৰ ক্ৰিকেট ব’ৰ্ডলৈ এক বিশেষ প্ৰস্তাৱ আগবঢ়াইছে।
দুয়ো দেশৰ মাজত পুনৰ ক্ৰিকেট সম্পৰ্ক স্থাপনৰ বাবে নিৰপেক্ষ স্থানত এক টেষ্ট শৃংখলাৰ আয়োজনৰ প্ৰস্তাৱ দিছে ইংলেণ্ড এণ্ড ৱেলছ ক্ৰিকেট ব’ৰ্ডে। আৰু ইয়াৰ বাবে ব’ৰ্ডে নিজেই এই শৃংখলাৰ আয়োজক হোৱাৰ ইচ্ছা প্ৰকাশ কৰিছে।
ইংলেণ্ডৰ বিখ্যাত সংবাদ সংস্থা ‘টেলিগ্ৰাফ’ত এই সন্দৰ্ভত এক প্ৰতিবেদন প্ৰকাশ পাইছে। এই প্ৰতিবেদনত উল্লেখ কৰা মতে ইংলেণ্ড এণ্ড ৱেলছ ক্ৰিকেট ব’ৰ্ডৰ উপাধ্যক্ষ মাৰ্টিন ডাৰ্লোৱে ইংলেণ্ড আৰু পাকিস্তানৰ মাজত চলি থকা টুৱেণ্টি-২০ শৃংখলাৰ মাজতে পাকিস্তান ক্ৰিকেট ব’ৰ্ডৰ সৈতে এই বিষয়ত আলোচনা কৰিছে।
প্ৰতিবেদনটোৱে দাবী কৰিছে যে ডাৰ্লোৱে অনাগত সময়ত ভাৰত আৰু পাকিস্তানৰ মাজত তিনিখনীয়া মেচৰ টেষ্ট শৃংখলা অনুষ্ঠিত কৰাৰ পোষকতা কৰিছে আৰু নিৰপেক্ষ স্থান হিচাপে ইংলেণ্ডৰ খেলপথাৰতে এই শৃংখলা আয়োজনৰ প্ৰস্তাৱ দিছে।
পিছে ভাৰতীয় ক্ৰিকেট নিয়ন্ত্ৰণ ব’ৰ্ডে ইংলেণ্ড ক্ৰিকেট ব’ৰ্ডৰ এই প্ৰস্তাৱ নাকচ কৰিছে । দেশ দুখনৰ মাজত অদূৰ ভৱিষ্যতেও দ্বিপাক্ষিক শৃংখলা হোৱাৰ সম্ভাৱনা প্ৰায় শূন্য বুলি উল্লেখ কৰিছে বিচিচিআইৰ এক সূত্ৰই।
বিচিচিআইৰ এগৰাকী জ্যেষ্ঠ বিষয়াই সংবাদ মাধ্যমৰ আগত কয় যে এই বিষয়ত ভাৰত চৰকাৰেহে সিদ্ধান্ত গ্ৰহণ কৰিব পাৰিব। বিচিচিআইৰ এনে সিদ্ধান্ত লোৱাৰ কৰ্তৃত্ব নাই বুলি বিষয়াগৰাকীয়ে লগতে উল্লেখ কৰে।
আনহাতে পাকিস্তান ক্ৰিকেট ব’ৰ্ডেও ইংলেণ্ড ক্ৰিকেট ব’ৰ্ডৰ এই প্ৰস্তাৱ নাকচ কৰিছে ট্ৰেলিগ্ৰাফে বুলি স্পষ্ট কৰি দিয়ে।