‘পুষ্পা ২’ৰ প্ৰিমিয়াৰত পদপিষ্ট হৈ মৃত্যু ঘটিছে এগৰাকী মহিলাৰ। বুধবাৰে নিশা হায়দৰাবাদৰ সন্ধ্যা থিয়েটাৰত ‘পুষ্পা ২: দ্য ৰুল’ৰ প্ৰিমিয়াৰত অংশগ্ৰহণ কৰিবলৈ আহিছিল অভিনেতা আল্লু অৰ্জুন। প্ৰায় ১০:৩০ বজাত অৰ্জুন আহি থকাৰ খবৰ পোৱাৰ পিছতে দৰ্শকৰ মাজত লৰালৰি আৰম্ভ হৈ যায়। দৰ্শকৰ ভিৰৰ হেঁচাত থিয়েটাৰৰ মূল প্ৰৱেশদ্বাৰৰ লোহাৰ গেটখনো ভাঙি পৰে। আৰক্ষীয়ে লাঠিচালনা কৰিও জনতাক ছত্ৰভংগ দিয়াব নোৱাৰিলে।
আৰক্ষীৰ সূত্ৰৰ পৰা জানিব পৰা মতে, এই লৰালৰিত পদপিষ্ট হৈ মৃত্যু হয় এগৰাকী পঁয়ত্ৰিশ বছৰীয়া মহিলাৰ। মহিলাগৰাকীৰ ৯ বছৰীয়া পুত্ৰও গুৰুতৰভাৱে আঘাতপ্ৰাপ্ত হৈ চিকিৎসালয়ত চিকিৎসাধীন হৈ আছে। প্ৰাথমিকভাৱে জানিব পৰা মতে, মৃত মহিলাগৰাকীৰ নাম ৰেৱতী। তেওঁ স্বামী আৰু দুই সন্তানৰ সৈতে চিনেমাখনৰ প্ৰিমিয়াৰলৈ গৈছিল।
বাতৰি অনুসৰি, হায়দৰাবাদৰ থিয়েটাৰত কেৱল চিনেমাখনেই নহয়, আল্লু অৰ্জুন আৰু চিনেমাখনৰ অন্যান্য কলা-কুশলীসকলক চাবলৈও বহুলোকে ভিৰ কৰিছিল। ইতিমধ্যে পৰিস্থিতি চম্ভালিবলৈ তাত আৰক্ষী মোতায়েন কৰা হৈছিল। কিন্তু আল্লু অৰ্জুন আহি পোৱাৰ খবৰ পোৱাৰ পিছত অভিনেতাজনক চাবলৈ হুৱাদুৱা আৰম্ভ হ’ল। আনকি আৰক্ষীয়েও এই পৰিস্থিতি চম্ভালিব পৰা নাছিল।
তাৰমাজতে আৰক্ষীৰ পহৰাৰ মাজেৰে থিয়েটাৰৰ পৰা ওলাই আহে আল্লু অৰ্জুন। তেওঁ অনুৰাগীসকলক হাত জোকাৰি যান-বাহনৰ বাবে পথ এৰি দিবলৈ অনুৰোধ জনায়।
