অবিশ্বাস্য ঘটনা! বিগত দুবছৰ ধৰি যাৰ ‘মৃত্যুৰ’ বাবে স্বামী আৰু শহুৰেকৰ ঘৰৰ লোকসকল যৌতুকৰ বাবে হত্যাত অভিযুক্ত হৈ আছিল, সেই যুৱতীগৰাকীক জীৱিত অৱস্থাত উদ্ধাৰ কৰিছে আৰক্ষীয়ে। প্ৰায় দুবছৰৰ অন্তত মধ্যপ্ৰদেশৰ পৰা উদ্ধাৰ কৰা হৈছে তেওঁক। এই ঘটনাই উত্তৰ প্ৰদেশৰ ঔৰিয়া জিলাত এক তীব্ৰ চাঞ্চল্যৰ সৃষ্টি কৰিছে।
আৰক্ষী সূত্ৰৰ মতে, বিবাহৰ প্ৰায় ১৮ মাহৰ পিছত ২০২৩ চনত ৰহস্যজনকভাৱে যুৱতীগৰাকীয়ে ঔৰিয়া জিলাৰ শহুৰেকৰ ঘৰৰ পৰা নিৰুদ্দেশ হৈছিল। যেতিয়া তেওঁক বিচাৰি নাপালে, যুৱতীগৰাকীৰ পৰিয়ালে ২০২৩ চনৰ ২৩ অক্টোবৰত থানাত মিছিং ডায়েৰী দাখিল কৰে। কিন্তু তাত কোনো সন্ধান নোলাল। পিছত তেওঁৰ পৰিয়ালে অভিযোগ কৰে যে তেওঁলোকৰ কন্যাক যৌতুকৰ বাবে হত্যা কৰি মৃতদেহ পেলাই দিয়া হৈছে।
ইয়াৰ পিছত তেওঁলোকে আদালতৰ কাষ চাপে। আদালতৰ নিৰ্দেশত আৰক্ষীয়ে মহিলাগৰাকীৰ স্বামী আৰু শহুৰেকৰ পৰিয়ালৰ ছয়জনৰ বিৰুদ্ধে ভাৰতীয় দণ্ডবিধিৰ ধাৰা ৩০৪বি ( যৌতুকৰ বাবে হত্যা) ধাৰাত গোচৰ ৰুজু কৰে। বিগত দুবছৰ ধৰি এই গোচৰৰ বিচাৰ চলি আছিল আৰু অভিযুক্তসকল হাৰাশাস্তিৰ সন্মুখীন হৈছিল বুলি জানিব পৰা গৈছে।
ইপিনে, উত্তৰ প্ৰদেশ আৰক্ষীৰ স্পেচিয়েল অপাৰেচন গ্ৰুপ (এছ অ’ জি) আৰু চোৰাংচোৱাগিৰিৰ দলটোৱে গোচৰটোৰ তদন্ত কৰি আছিল। অৱশেষত তেওঁলোকৰ প্ৰচেষ্টাৰ বাবেই মধ্যপ্ৰদেশত নিৰুদ্দেশ হোৱা মহিলাগৰাকীৰ সন্ধান পোৱা যায়।
এই সন্দৰ্ভত ঔৰিয়াৰ আৰক্ষী চক্ৰ বিষয়া অশোক কুমাৰ সিঙে কয় যে, “বিবাহৰ ডেৰ বছৰ পিছত নিৰুদ্দেশ হৈছিল মহিলাগৰাকী। প্ৰথমে তেওঁৰ পৰিয়ালে নিৰুদ্দেশ হোৱা ব্যক্তিৰ ডায়েৰী দাখিল কৰিছিল আৰু পিছত আদালতৰ নিৰ্দেশত তেওঁৰ স্বামী আৰু শহুৰেকৰ পৰিয়ালৰ কেইজনমানৰ বিৰুদ্ধে গোচৰ ৰুজু কৰা হৈছিল। তদন্ত চলি আছিল আৰু আমি মধ্যপ্ৰদেশত তেওঁৰ সন্ধান উলিয়াবলৈ সক্ষম হৈছো। ১ অক্টোবৰত তেওঁক পুনৰ ঔৰিয়ালৈ অনা হৈছে। অধিক তদন্ত চলি আছে।”
তদন্তকাৰীয়ে এতিয়া জানিবলৈ চেষ্টা কৰিছে যে যুৱতীগৰাকীয়ে এইখিনি সময় মধ্যপ্ৰদেশত কি কৰি আছিল আৰু কিয় এই দীৰ্ঘ দুই বছৰে পৰিয়াল বা শহুৰেকৰ পৰিয়ালৰ সৈতে যোগাযোগ কৰাৰ কোনো চেষ্টা কৰা নাই। যুৱতীগৰাকীৰ জীৱিত থকাৰ খবৰটোৱে যৌতুকৰ বাবে মৃত্যুৰ গোচৰটো সম্পূৰ্ণ সলনি কৰি দিয়াটো নিশ্চিত কৰিলে বুলি আৰক্ষীয়ে জানিবলৈ দিয়ে।
